ବଲାଙ୍ଗୀର ଅଫିସ,୨ା୨: ବଲାଙ୍ଗୀର ସହରରେ ଗତ କିଛିଦିନ ହେଲା ବିଭିନ୍ନ ସ୍ଥାନରେ ଅପରାଧୀଙ୍କ ପ୍ରାଦୁର୍ଭାବ ବଢ଼ି ଚାଲିଥିବା ବେଳେ ପୋଲିସ ଚୁପ୍ ବସି ରହିଛି। ସହରରେ ଏବେ ପ୍ରତିଦିନ ଚୋରି,ଡକାୟତି,ରାହାଜାନୀ ମରଣାନ୍ତକ ଆକ୍ରମଣର ଶିକାର ହେଉଛନ୍ତି ସାଧାରଣ ଲୋକେ। ଏହି ସବୁ ଅପରାଧିକ କାର୍ଯ୍ୟକଳାପରେ ରୋକ ଲଗାଇବା ପାଇଁ ଗୁରୁବାର ବଲାଙ୍ଗୀର ପୌରାଧ୍ୟକ୍ଷା ଲିକା ସାହୁଙ୍କ ନେତୃତ୍ୱରେ ବଲାଙ୍ଗୀର ପୌରପରିଷଦର ସମସ୍ତ କାଉନସିଲର ବଲାଙ୍ଗୀର ଆରକ୍ଷୀ ଅଧୀକ୍ଷକ ନୀତିନ କୁଶଲକରଙ୍କୁ ତାଙ୍କ କାର୍ଯ୍ୟାଳୟରେ ସାକ୍ଷାତ କରି ପରିସ୍ଥିତିକୁ ନିୟନ୍ତ୍ରଣ କରିବା ପାଇଁ କଠୋରରୁ କଠୋର ପଦକ୍ଷେପ ନେବାକୁ ଅନୁରୋଧ କରିଛନ୍ତି। ଏହି ସାକ୍ଷାତକାର ପରିପ୍ରେକ୍ଷୀରେ ପୌରାଧ୍ୟକ୍ଷା ଲିକା ସାହୁ ବଲାଙ୍ଗୀର ସହରର ସମସ୍ତ ଓ୍ବାର୍ଡରେ ପୋଲିସ ପାଟ୍ରୋଲିଂରୁ ଅଧିକରୁ ଅଧିକ ଶକ୍ତ କରି କଡ଼ାକଡ଼ି କରିବା ଏବଂ ବିଭିନ୍ନ ସ୍ଥାନରେ ବେଆଇନ ନିଶା କାରବାରକୁ ବନ୍ଦ କରିବାକୁ ଅନୁରୋଧ କରିଥିଲେ। ଏହି ସାକ୍ଷାତକାର ସମୟରେ ପୌରାଧ୍ୟକ୍ଷାଙ୍କ ସହିତ ପୌର ଉପାଧ୍ୟକ୍ଷା ଗାୟତ୍ରୀ ଭୋଇ ଓ କାଉନସିଲରମାନେ ଉପସ୍ଥିତି ଥିଲେ।
