ନାଗପୁର,୧୩।୨: ସମଲିଙ୍ଗୀ ଯୌନସମ୍ପର୍କର ଅପରାଧୀକରଣ ଆମ ସମାଜରେ ଅନ୍ୟତମ ଅନ୍ୟାୟ ବୋଲି ଭାରତର ପ୍ରଧାନ ବିଚାରପତି (ସିଜେଆଇ) ଧନଞ୍ଜୟ ଚନ୍ଦ୍ରଚୂଡ଼ କହିଛନ୍ତି। ୭ ଦଶନ୍ଧିରୁ ଊର୍ଦ୍ଧ୍ୱ ସମୟ ପରେ ସମଲିଙ୍ଗୀ ଯୌନସମ୍ପର୍କକୁ ଅପରାଧମୁକ୍ତ କରାଯାଇଥିଲା। ମହାରାଷ୍ଟ୍ର ଜାତୀୟ ଆଇନ ବିଶ୍ୱବିଦ୍ୟାଳୟର ଓ୍ବାରାଙ୍ଗ କ୍ୟାମ୍ପସରେ ଶନିବାର ଅନୁଷ୍ଠିତ ପ୍ରଥମ ସମାବର୍ତ୍ତନ ଉତ୍ସବରେ ଉଦ୍ବୋଧନ ଦେଇ ସିଜେଆଇ ଉପରୋକ୍ତ ମତବ୍ୟକ୍ତ କରିଛନ୍ତିି। ଏହି କାର୍ଯ୍ୟକ୍ରମରେ ପୂର୍ବତନ ସିଜେଆଇ ଶରଦ ଅରବିନ୍ଦ ବୋବ୍ଡେ, ଏମ୍ଏନ୍ଏଲ୍ୟୁର ପ୍ରତିଷ୍ଠାତା କୁଳାଧିପତି ଏବଂ ସୁପ୍ରିମକୋର୍ଟ ବିଚାରପତି ତଥା ଚାନ୍ସେଲର ଜଷ୍ଟିସ ଭୂଷଣ ଗଭାଇ ଯୋଗ ଦେଇଥିଲେ।
ନଭଜେତ୍ ସିଂ ଜୋହର ମାମଲାରେ ସିଜେଆଇ ଦେଇଥିବା ନିଜର ଐତିହାସିକ ରାୟର ଅବତାରଣା କରି କହିଥିଲେ, ଆଇପିସିର ଧାରା ୩୭୭ କାଳଦୋଷଯୁକ୍ତ ଉପନିବେଶୀୟ ଆଇନ ଥିଲା। ଉକ୍ତ ଧାରା ସମାନତା, ବାକ୍ ସ୍ବାଧୀନତା, ଜୀବନ ଧାରଣ ଓ ଗୋପନୀୟତା ଅଧିକାରର ଉଲ୍ଲଂଘନ। ସମ୍ବିଧାନ ସମାନତା ଓ ଭେଦଭାବଶୂନ୍ୟ ଅଧିକାରର ଗ୍ୟାରେଣ୍ଟି ଦେଇଥିବାବେଳେ ଉକ୍ତ ଆଇନ ଏହାକୁ ଦୁର୍ବଳ କରିଦେଉଥିବାରୁ ସିଜେଆଇ ରାୟ ପ୍ରଦାନ ବେଳେ ଉପରୋକ୍ତ ଟିପ୍ପଣୀ ଦେଇଥିଲେ ବୋଲି କହିଛନ୍ତି।
