ନୂଆଦିଲ୍ଲୀ,୪ା୧୨(ପି.ଟି.):ସାରା ବିଶ୍ୱରେ କୋଭିଡ୍ ଟିକା ପାଇଁ ଯେଉଁଭଳି ଆଗ୍ରହ ପ୍ରକାଶ ପାଇଛି, ଏହାର ଫାଇଦା ନେବାକୁ ସଂଗଠିତ ଅପରାଧ ନେଟ୍ଓ୍ବର୍କଗୁଡ଼ିକ ଉଦ୍ୟମ କରିପାରନ୍ତି। ସେମାନେ ନକଲି କୋଭିଡ୍ ଟିକା ଦୋକାନ ମାଧ୍ୟମରେ କିମ୍ବା ଇଣ୍ଟରନେଟ୍ରେ ବିକ୍ରି କରିପାରନ୍ତି ବୋଲି ଇଣ୍ଟରପୋଲ୍ ବିଭିନ୍ନ ଦେଶର ଆଇନ କାର୍ଯ୍ୟକାରୀ କରୁଥିବା ସଂସ୍ଥାକୁ ସତର୍କ କରାଇଦେଇଛି। ଏନେଇ ଇଣ୍ଟରପୋଲ ଏହାର ସମସ୍ତ ୧୯୪ ସଦସ୍ୟ ରାଷ୍ଟ୍ରକୁ ଅରେଞ୍ଜ ନୋଟିସ ଜାରି କରିଛି।
କୋଭିଡ୍-୧୯ ଓ ଫ୍ଲୁ ଭାକ୍ସିନ୍ର ଜାଲିଆତି, ଚୋରି ଓ ବେଆଇନ ବିଜ୍ଞାପନ ଭଳି ଆପରାଧିକ କାର୍ଯ୍ୟକୁ ରୋକିବା ଲାଗି ପ୍ରସ୍ତୁତ ରହିବାକୁ ଇଣ୍ଟରନ୍ୟାଶନାଲ ପୋଲିସ କୋଅପରେଶନ ସଂସ୍ଥା ସତର୍କ କରାଇଦେଇଛି। ଏପରିକି ବ୍ୟକ୍ତିବିଶେଷ ମଧ୍ୟ ଜାଲ୍ ଟିକାର ବିଜ୍ଞାପନ ଦେବା ସହ ବିକ୍ରି କରିପାରନ୍ତି। ଏଭଳି ଜାଲ୍ ଟିକା ଜନସାଧାରଣଙ୍କ ନିରାପତ୍ତା ପ୍ରତି ସାଂଘାତିକ ବିପଦ ଡାକିଆଣିବ। ଏନେଇ ସିବିଆଇକୁ ଇଣ୍ଟରପୋଲ୍ ସହ ସମନ୍ବୟ ରଖିବା ଲାଗି କୁହାଯାଇଛି।
ଆମେରିକାକୁ ପଛରେ ପକାଇ ପ୍ରଥମ ରାଷ୍ଟ୍ର ଭାବେ ବ୍ରିଟେନ ଫାଇଜର ପ୍ରସ୍ତୁତ କରୋନା ଟିକାକୁ ବ୍ୟବହାର ଲାଗି ମଞ୍ଜୁରୀ ପ୍ରଦାନ କରିବା ପରେ ଇଣ୍ଟରପୋଲ ଏଭଳି ସତର୍କ ସୂଚନା ଜାରି କରିଛି। ଯୋଗାଣ ଶୃଙ୍ଖଳର ନିରାପତ୍ତା ନିଶ୍ଚିତ କରିବା ସହ ଜାଲ୍ ସାମଗ୍ରୀ ବିକ୍ରି କରୁଥିବା ବେଆଇନ ଓ୍ବେବ୍ସାଇଟଗୁଡ଼ିକୁ ଚିହ୍ନଟ କରିବା ଲାଗି ପୋଲିସ ସଂଗଠନଗୁଡ଼ିକୁ ପରାମର୍ଶ ଦିଆଯାଇଛି। ସେହିପରି ଅପରାଧ ନେଟ୍ଓ୍ବର୍କଗୁଡ଼ିକ ଜାଲ୍ ଓ୍ବେବ୍ସାଇଟ ଓ ମିଥ୍ୟା ଚିକତ୍ସା ଜରିଆରେ ସନ୍ଦେହ କରାଯାଉ ନ ଥିବା ବ୍ୟକ୍ତିବିଶେଷଙ୍କୁ ଟାର୍ଗେଟ କରିପାରନ୍ତି, ଯାହା ସେମାନଙ୍କ ସ୍ବାସ୍ଥ୍ୟ ଓ ଜୀବନ ପ୍ରତି ଗୁରୁତର ବିପଦ ଆଣିବା ଆଶଙ୍କା ରହିଛି ବୋଲି ଇଣ୍ଟରପୋଲ ମହାସଚିବ ଜୁର୍ଗେନ୍ ଷ୍ଟକ୍ କହିଛନ୍ତି।
