ବେଜିଂ,୨୫।୧ : ଚାଇନାରେ କରୋନା ତାଣ୍ଡବ ଜାରି ରହିଛି। ଏଠାରେ ପ୍ରାୟ ୮୦ ପ୍ରତିଶତ ଜନସଂଖ୍ୟା ସଂକ୍ରମଣର ଶିକାର ହୋଇଛନ୍ତି ଏବଂ ମୃତକଙ୍କ ସଂଖ୍ୟା କ୍ରମାଗତ ଭାବେ ବୃଦ୍ଧି ପାଉଛି। ଡିସେମ୍ବରରୁ ଚାଇନାରେ କରୋନା କାରଣରୁ ୬୦ ହଜାର ମୃତ୍ୟୁ ହୋଇଥିବା ଖବର ସରକାର ଦେଇଛନ୍ତି। କିନ୍ତୁ ବାସ୍ତବତା ହେଉଛି ରାସ୍ତାଘାଟ ଏବଂ ଡାକ୍ତରଖାନାରେ ବହୁ ମୃତ ଦେହ ପଡ଼ି ରହିଛି। ମୃତ ଦେହ ସଂସ୍କାର ନେଇ ସମସ୍ୟା ଦେଖାଦେଇଛି।
ଗଣମାଧ୍ୟମ ରିପୋର୍ଟ ଅନୁଯାୟୀ, ଚାଇନାରେ ସମାଧି ପାଇଁ କଫିନ ମଧ୍ୟ ମିଳୁନି। ଅଧିକ ଚାହିଦା ଯୋଗୁ କଫିନ ମୂଲ୍ୟ ମଧ୍ୟ ବୃଦ୍ଧି ପାଇଛି। ମୃତଦେହ ସଂସ୍କାର ପାଇଁ ଲମ୍ବା ଲାଇନ ଦେଖିବାକୁ ମିଳୁଛି।
ଚାଇନାର ମୁଖ୍ୟ ମହାମାରୀ ବିଶେଷଜ୍ଞ ୱୁ ଜୁନିଆଓଙ୍କ ଅନୁଯାୟୀ, ଡିସେମ୍ବର ମାସରେ ଚାଇନା କରୋନା ପ୍ରତିବନ୍ଧକ ହଟାଇବା ପରଠାରୁ ଏକ୧୧୦ କୋଟିରୁ ଅଧିକ ଲୋକ ସଂକ୍ରମିତ ହୋଇଛନ୍ତି, ଯାହା ସମୁଦାୟ ଜନସଂଖ୍ୟାର ୮୦ ପ୍ରତିଶତ ଅଟେ। ଏଥି ସହିତ ଗତ ଏକ ସପ୍ତାହ ମଧ୍ୟରେ ଦେଶରେ ୧୩ ହଜାର କରୋନା ମୃତ୍ୟୁ ରେକର୍ଡ କରାଯାଇଛି। କିନ୍ତୁ ଏସବୁ ମୃତ୍ୟୁ ଡାକ୍ତରଖାନାରେ ଘଟିଥିଲା। ସେଥିରେ ଘରେ ମୃତ୍ୟୁ ଘଟିଥିବା ସଂଖ୍ୟାକୁ ବାଦ ଦିଆଯାଇଛି।