ଅନୁଗୋଳ ଅଫିସ, ୨୬ା୫: ଅନୁଗୋଳ ଜିଲା ସାତକୋଶିଆର ଘଡିଆଳ କୁମ୍ଭୀର ପ୍ରଜନନ କେନ୍ଦ୍ର ପାଇଁ ଆସିଛି ଖୁସି ଖବର। ଏଠାରେ କ୍ରମାଗତ ତୃତୀୟ ବର୍ଷ ପାଇଁ ଘଡ଼ିଆଳ ପ୍ରଜନନ ସଫଳ ହୋଇଛି। ଗୁରୁବାର ଘଡ଼ିଆଳ ଅଣ୍ଡା ଫୁଟି ୩୫ ଛୁଆ ମା’ କୁମ୍ଭୀର ସହ ପାଣିରେ ଖେଳୁଥିବାର ଫଟୋ ବନ ବିଭାଗ ସିସିଟିଭି କ୍ୟାମେରାରେ ରେକର୍ଡ ହୋଇଛି। ଏହି ସଫଳତା ପାଇଁ ସାତକୋଶିଆ ବନଖଣ୍ଡକୁ ବିଭିନ୍ନ ମହଲରୁ ଶୁଭେଚ୍ଛା ଛୁଟୁଛି।
ପ୍ରକାଶ ଯେ, ସାତକୋଶିଆ ଗଣ୍ଡର ବଳଦମରା ଠାରେ ଘଡ଼ିଆଳ ପ୍ରଜନନ ଦୀର୍ଘ ୪୦ ବର୍ଷ ହେବ ହୋଇ ନ ଥିଲା। ୨୦୨୧ରେ ଘଡ଼ିଆଳ କୁମ୍ଭୀର ଅଣ୍ଡାରୁ ୨୮ଟି ଛୁଆ ବାହାରିଥିଲେ ହେଁ ମାତ୍ର ୩ରୁ ୪ଟି ଗଣ୍ଡରେ ରହିଛନ୍ତି। ସେହିପରି ୨୦୨୨ରେ ୩୨ଟି ଛୁଆ ବାହାରିଥିବା ଦେଖାଯାଇଥିଲା। ସେଥିରୁ ୧୨ରୁ ୧୩ଟିକୁ ଠାବ କରାଯାଇଛି। ଚଳିତବର୍ଷ ବଳଦମରାସ୍ଥିତ ବାଲିରେ ମା’ କୁମ୍ଭୀର ଦେଇଥିବା ଅଣ୍ଡାରୁ ୩୫ଟି ଛୁଆ ଜନ୍ମ ହେବା ପରେ ବନ ବିଭାଗର ଉଦ୍ୟମ ସଫଳ ହୋଇଥିବା କୁହାଯାଉଛି। ତେବେ ଏହି ଘଡ଼ିଆଳ କିଭଳି ଭାବେ ସାତକୋଶିଆ ଗଣ୍ଡରେ ସୁରକ୍ଷିତ ରହିବେ ତାହାକୁ ନେଇ ବ୍ଲୁ ପ୍ରିଣ୍ଟ ପ୍ରସ୍ତୁତ କରାଯାଉଛି। ଏହି ଛୁଆ ବଢ଼ିବା ପାଇଁ ଏବେ ଯଥେଷ୍ଟ ସମୟ ଥିବାରୁ ସ୍ବତନ୍ତ୍ର ଦୃଷ୍ଟି ଦିଆଯିବ ବୋଲି ଡିଏଫଓ ସରୋଜ ପଣ୍ଡା କହିଛନ୍ତି।