ଅନୁଗୋଳ ଅଫିସ/ ଆଠମଲ୍ଲିକ, ୨୦ା୮: ଅନୁଗୋଳ ଜିଲାରେ ବନ୍ୟା ପାଣି ହ୍ରାସ ହେଉଥିବାବେଳେ ଶୁକ୍ରବାର ଲଗାଣ ବର୍ଷା ବିପନ୍ନଙ୍କ ଦୁଃଖ ଦୁର୍ଦ୍ଦଶା ବଢ଼ାଇ ଦେଇଛି। ବିଶେଷକରି ଅନୁଗୋଳ ବ୍ଲକ ଅଞ୍ଚଳରେ ୧୩୩ ମିଲିମିଟର ବର୍ଷା ରେକର୍ଡ କରାଯାଇଥିବାରୁ ଦିନ ତମାମ ବହୁ ହଇରାଣ ହରକତ ହେବାକୁ ପଡ଼ିଛି ବନ୍ୟା ପ୍ରଭାବିତ ଟିକରପଡ଼ା ଅଞ୍ଚଳବାସୀଙ୍କୁ। ସେହିପରି ଆଠମଲ୍ଲିକ ବ୍ଲକରେ ୨୬.୮ ମିଲିମିଟର ବର୍ଷା ହୋଇଥିବାରୁ ଦିନତମାମ ବନ୍ୟାବିପନ୍ନଙ୍କୁ ଅସୁବିଧାର ସମ୍ମୁଖୀନ ହେବାକୁ ପଡ଼ିଛି। ତେବେ ବନ୍ୟା ଯୋଗୁ ବହୁ ସ୍ଥାନରେ ଲୋକଙ୍କ ଘର ଭାଙ୍ଗି ଯାଇଥିବା ବେଳେ ଚାଷ ଜମି ଉପରୁ ପାଣି ଧୀରେ ଧୀରେ ଖସିବାରେ ଲାଗିଛି। ହେଲେ ଫସଲ ଅବସ୍ଥା ଏତେ ଖରାପ ହୋଇଯାଇଛି ଯେ ତାହା ବଞ୍ଚିବା ନେଇ ଆଶଙ୍କା ସୃଷ୍ଟି ହୋଇଛି। କୁଦଗାଁ ପଞ୍ଚାୟତର ନଦୀ ଗର୍ଭରେ ଥିବା କୁଦଗାଁ ଗ୍ରାମର ୨୦୦ ଜଣଙ୍କୁ ୬ ଦିନ ହେଲା ଅସ୍ଥାୟୀ ଶିବିରରେ ରଖାଯାଇଥିବା ସରପଞ୍ଚ ସିଦ୍ଧାର୍ଥ ଖେତୀ ପ୍ରକାଶ କରିଛନ୍ତି। ଗ୍ରାମର କିଛି ଲୋକଙ୍କ କଚ୍ଚା ଘର ଭାଙ୍ଗି ଯାଇଥିବା ଜଣାପଡିଛି। ଅଏଡା ପଞ୍ଚାୟତର ଦ୍ୱାରି ବାରିକ, ନିରଞ୍ଜନ ବେହେରା, ଛବି ମହାନନ୍ଦିଆ, ମେଘୁ ବେହେରା, କୁମୁଦିନୀ ତରିଆ, ଲୁହାସିଙ୍ଗା ପଞ୍ଚାୟତର ଲଳିତ ମଲ୍ଲିକ, ଜାମୁଡୋଲୀ ପଞ୍ଚାୟତର ସୁରେଶ ପ୍ରଧାନଙ୍କ ବାସଗୃହ ଭାଙ୍ଗି ଯାଇଛି। ପୂର୍ବରୁ ଘର ଭାଙ୍ଗିଥିବା ୧୦ ଜଣ କ୍ଷତିଗ୍ରସ୍ତଙ୍କୁ ପାଲ ଯୋଗାଇ ଦିଆଯାଇଛି। ବନ୍ୟା ଛାଡିଲା ପରେ କ୍ଷୟକ୍ଷତିର ଆକଳନ କରାଯିବ ବୋଲି ରାଜସ୍ବ ନିରୀକ୍ଷକ ଅମର ଦେହୁରୀ ସୂଚନା ଦେଇଛନ୍ତି। ସେହିପରି କୁଦଙ୍ଗା ପଞ୍ଚାୟତର ନୀଳକଣ୍ଠପଡା ଗ୍ରାମର ଶମ୍ଭୁନାଥ କୁମ୍ଭାରଙ୍କ ଘର ଭାଙ୍ଗିଯାଇଛି। ଆଠମଲ୍ଲିକ ତହସିଲଦାର ସଫି ସଇନିକା ପଇଁଞ୍ଚକୁଳ ଅଞ୍ଚଳକୁ ଯାଇ ବନ୍ୟା ପରିସ୍ଥିତି ସମୀକ୍ଷା କରିଛନ୍ତି।
