ଲଣ୍ଡନ: ଲୋକେ ନଁା କରିବାକୁ ବିଭିନ୍ନ ସ୍ତରକୁ ଯାଇପାରନ୍ତି। ତେବେ ବ୍ରିଟେନର ଜଣେ ବ୍ୟକ୍ତି ନିଜକୁ ଲୌହମାନବ ପ୍ରମାଣିତ କରିବାକୁ ଉଦ୍ୟମ ଚଳାଇଛନ୍ତି। ସେ ପ୍ରାୟତଃ ଏକ ଅସମ୍ଭବ କାର୍ଯ୍ୟକୁ ସମ୍ଭବ କରିବାକୁ ପଣ କରିଛନ୍ତି। ସେ ଦୁନିଆର ସବୁଠୁ ଥଣ୍ଡା ସ୍ଥାନ ଅର୍ଥାତ୍ ଆଣ୍ଟାର୍କଟିକାର ବରଫାବୃତ୍ତ ଅଞ୍ଚଳକୁ ଏକା ଅତିକ୍ରମ କରିବାକୁ ଯାଉଛନ୍ତି। ଏହି ଯାତ୍ରା ତାଙ୍କ ପାଇଁ ବହୁତ ସଂଘର୍ଷମୟ ହେବ। ରିପୋର୍ଟ ମୁତାବକ, ବ୍ରିଟେନ ଡିଭୋନର ବାସିନ୍ଦା ୩୪ ବର୍ଷୀୟ ଶାମ୍ କକ୍ସ ଆସନ୍ତା ମାସରେ ଆଣ୍ଟାର୍କଟିକାର ବରଫାବୃତ୍ତ ଅଞ୍ଚଳକୁ ପାର ପାଇଁ ଯାତ୍ରା ଆରମ୍ଭ କରିବେ। ତାଙ୍କର ଏହି ଯାତ୍ରା ପ୍ରାୟ ୨ ହଜାର କି.ମି. ହେବ। ଯଦି ସେ ତାଙ୍କ ଯାତ୍ରାରେ ସଫଳ ହୋଇଯିବେ ତେବେ ସେ ଏରନେଷ୍ଟ ସାକଲେଟନ୍, ଡଗଲାସ ମଉସନ ଏବଂ ଲଉ ରୁଡ୍ଙ୍କ ଭଳି ଆଣ୍ଟାର୍କଟିକା ପାର୍ କରିଥିବା ବ୍ୟକ୍ତିଙ୍କ ରେକର୍ଡର ସମକକ୍ଷ ହେବେ। ହେଲେ ଏହି ଯାତ୍ରା ତାଙ୍କ ପାଇଁ ବହୁତ କଷ୍ଟକର ହେବ। ତାଙ୍କୁ ବିଯୁକ୍ତ ୫୦ ଡିଗ୍ରୀ ସେଲ୍ସିୟସ୍ରେ ଯାତ୍ରା କରିବାକୁ ପଡ଼ିବ। ସେ ତାଙ୍କ ସହିତ କେବଳ ତାଙ୍କ ଜରୁରୀ ଜିନିଷ ନେଇ ଯାଇପାରିବେ। ସେ ଆଣ୍ଟାର୍କଟିକାର ବର୍କନର ଦ୍ୱୀପରୁ ତାଙ୍କ ଯାତ୍ରା ଆରମ୍ଭ କରିବେ। ପରେ ସେ ଦକ୍ଷିଣ ଅକ୍ଷାଂଶକୁ ଯିବେ। ସେଠାରୁ ସେ ତାଙ୍କ ଲକ୍ଷ୍ୟସ୍ଥଳ ବେସ୍ ଅଫ୍ ଦି ରେଡି ଗ୍ଲାସିୟର୍ ଆଡ଼କୁ ଯାତ୍ରା ଆରମ୍ଭ କରିବେ। ସେ ଏହି ଯାତ୍ରା ପାଇଁ ନିଜକୁ ଫିଟ୍ ରଖିବା ସହ ଟ୍ରେନିଂ ମଧ୍ୟ ନେଉଛନ୍ତି। ୨୦୧୬ରେ ବ୍ରିଟିଶ ଏକ୍ସପ୍ଲୋରର୍ ହେଲ୍ରୀ ଓର୍ସଲେ ପ୍ରଥମ ବ୍ୟକ୍ତି ଭାବେ ଆଣ୍ଟାର୍କଟିକାର ଏହି ବରଫାବୃତ୍ତ ଅଞ୍ଚଳକୁ ଏକା ପାର କରିବାରେ ସକ୍ଷମ ହୋଇଥିଲେ। ସେ ୯୧୩ ମାଇଲ ରାସ୍ତା ଯିବା ପରେ ଇନ୍ଦ୍ରୀୟ ନଷ୍ଟ ହୋଇଯିବାରୁ ତାଙ୍କର ମୃତ୍ୟୁ ଘଟିଥିଲା।
