ରାଇସୁଆଁ, ୧୩।୯(ଡି.ଏନ.ଏ.)-କେନ୍ଦୁଝର ଜିଲାରୁ ସରକାର କୋଟି କୋଟି ଟଙ୍କା ରାଜସ୍ବ ପାଉଥିଲେ ମଧ୍ୟ ଅନେକ ଗଁା ଅଛି ଯେଉଁଠି ଗମନାଗମନ ସୁବିଧା ନାହିଁ। ଫଳରେ ଲୋକେ ବର୍ଷାଦିନେ ହୁଲି ଡଙ୍ଗାରେ ବିପଦସଙ୍କୁଳ ଅବସ୍ଥାରେ ଜୀବନକୁ ବାଜି ଲଗାଇ ଯାତାୟାତ କରୁଛନ୍ତି। ଏଭଳି ଦୃଶ୍ୟ ଦେଖିବାକୁ ମିଳେ କେନ୍ଦୁଝର ଜିଲା ବାଂଶପାଳ ବ୍ଲକର ଫୁଲଝର ପଞ୍ଚାୟତର କେନ୍ଦୁଘାଟି ଗ୍ରାମରେ।
ଏହି ଗ୍ରାମରେ ୨ହଜାରରୁ ଊର୍ଦ୍ଧ୍ୱ ଜନସାଧାରଣ ବସବାସ କରନ୍ତି। ଏହି ଅଞ୍ଚଳକୁ ବୈତରଣୀ ନଦୀ ଘେରି ରହିଥବା ବେଳେ ପଛପଟେ ରହିଛି ମଲଦା ନଦୀ। ପାହାଡିଆ ଅଞ୍ଚଳ ହୋଇଥିବାରୁ ବର୍ଷାଦିନେ ଏହି ନଦୀର ସ୍ରୋତ ଖୁବ ପ୍ରଖର। ଏହି ଗ୍ରାମ ବର୍ଷାଦିନେ ସମ୍ପୂର୍ଣ୍ଣ ଜଳବନ୍ଦୀ ହୋଇ ରହିଥାଏ। ଗ୍ରାମଠାରୁ ୬କି.ମି. ଦୂରରେ ପଞ୍ଚାୟତ କାର୍ଯ୍ୟାଳୟ ଏବଂ ନଦୀ ଆରପଟେ ବିଦ୍ୟାଳୟ ରହିଥିବାରୁ ସ୍ଥାନୀୟ ଅଞ୍ଚଳର ଲୋକ ଏବଂ ଛାତ୍ରୀଛାତ୍ର ବାଧ୍ୟ ହୋଇ ଏହି ନଦୀରେ ହୁଲିଡଙ୍ଗାରେ ପାରି ହୋଇ ବିପଦସଙ୍କୁଳ ଭାବେ ଯାଇଥାନ୍ତି। ପଞ୍ଚାୟତ କାର୍ଯ୍ୟାଳୟକୁ ରାଶନ ସାମଗ୍ରୀ ଠାରୁ ଆରମ୍ଭ କରି ବିଭିନ୍ନ ଜରୁରୀ କାମରେ ଏହି ନଦୀ ପାର ହୋଇ ଯାଇଥାନ୍ତି। ସ୍ଥାନୀୟ ଅଞ୍ଚଳର ବହୁ ଲୋକ କହିଛନ୍ତି ନିର୍ବାଚନ ଆସିଲେ ବିଧାୟକ ଠାରୁ ଏମ୍ପି ସମସ୍ତେ ଆସି ପୋଲ ନିର୍ମାଣ କରିବାକୁ ପ୍ରତିଶ୍ରୁତି ଦେଇଯାଆନ୍ତି ମାତ୍ର ନିର୍ବାଚନ ସରିଗଲେ ସବୁ ଭୂଲିଯାଆନ୍ତି। ସୂଚନା ଅନୁସାରେ ଏହି ଡଙ୍ଗାରେ ଯେଉଁ ନାଉରିଆ ନଦୀ ପାରି କରନ୍ତି ସେ କେବେ କାହାରିଠୁ ଟଙ୍କା ନିଅନ୍ତି ନାହିଁ। କେବଳ ବର୍ଷକୁ ୨୦ ମାଣ ଧାନ ନେଇଥାନ୍ତି ଏବଂ ସେଥିରେ ପରିବାର ଚଳାଇଥାନ୍ତି। ଏହି ନଦୀରେ ପୋଲ ନିର୍ମାଣ ପାଇଁ ଡିଏମ୍ଏଫ ପାଣ୍ଠିରୁ ୮କୋଟି ୨୨ଲକ୍ଷ ୯୩ହଜାର ଟଙ୍କା ମଞ୍ଜୁର ହୋଇଛି। ୨୦୧୭ରୁ ମାତ୍ର ରାଜନୈତିକ ଇଛାଶକ୍ତିର ଅଭାବ ଯୋଗୁ ଆଜିଯାଏ ଏହି ପୋଲ ନିର୍ମାଣ ହୋଇପାରିନାହିଁ। ଏଥିପ୍ରତି ଜିଲା ପ୍ରଶାସନ ଏବଂ ସରକାର ଦୃଷ୍ଟି ଦେଇ ପୋଲ ନିର୍ମାଣ କରିବାକୁ ବହୁ ଜନସାଧାରଣ ଦାବି କରିଛନ୍ତି।