ଦାରିଙ୍ଗବାଡ଼ି,୧୬ା୧୨(ଅରୁଣ ସାହୁ): କନ୍ଧମାଳ ଜିଲା ଦାରିଙ୍ଗବାଡ଼ି ଓଡ଼ିଶାର କଶ୍ମୀର ଭାବେ ରାଜ୍ୟ ତଥା ରାଜ୍ୟ ବାହାରେ ପରିଚିତ। ଏଠାରେ ଏକାଧିକ ପର୍ଯ୍ୟଟନକ୍ଷେତ୍ର ରହିଥିବା ବେଳେ ସେଥିରୁ ବଣଭୋଜି କରି ମଜା ନେବା ସହ ସୌନ୍ଦର୍ଯ୍ୟର ଅପରୂପ ଦେଖିବାକୁ ପର୍ଯ୍ୟଟକଙ୍କ ଭିଡ଼ ଜମିଥାଏ। ଏଭଳି ଏକ ପର୍ଯ୍ୟଟନ କ୍ଷେତ୍ର ହେଉଛି ଡଡୁବାଡା ଲଭର୍ସ ପଏଣ୍ଟ। ପ୍ରକୃତିକୁ ଭଲ ପାଉଥିବା ଏହି ସ୍ଥାନଟି ଦୁଇ ପାଖରେ ପାହାଡ଼ ସହ ବିସ୍ତୀର୍ଣ୍ଣ ପଥରର ପଡ଼ିଆ ସହ ବହିଯାଉଛି ଟୀକାପାଟା ନଦୀ। ଆଉ ବହିଯାଉଥିବା ନଦୀ ପଥରର ବିଭିନ୍ନ ଖଣ୍ଡ ବିଖଣ୍ଡିତ ପଥର ଉପର ଦେଇ ଜଳ ବହୁଥିବାବେଳେ ସୃଷ୍ଟି ହୋଇଛି ଏକାଧିକ ଜଳ ପ୍ରପାତ ଆଉ ଗଣ୍ଡ ଏବଂ ଖସଡ଼ା। ଯାହାକୁ ଦେଖି ପର୍ଯ୍ୟଟକ ହୋଇଯାଉଛନ୍ତି ଆତ୍ମବିଭୋର। ଆଉ ଘଣ୍ଟା ଘଣ୍ଟା ଧରି ପର୍ଯ୍ୟଟକଙ୍କ ନଜର ସେହି ସୌନ୍ଦର୍ଯ୍ୟମୟ ଶାନ୍ତ ପରିବେଶ ଉପରେ ରହୁଛି। ପରିବାର ନେଇ ଆସୁଥିବା ପର୍ଯ୍ୟଟକ ହୁଅନ୍ତୁ କିମ୍ବା ସାଙ୍ଗସାଥୀ ଏବଂ ବରିଷ୍ଠ ନାଗରିକ ସମସ୍ତ ବର୍ଗଙ୍କ ପାଇଁ ଏହି ପର୍ଯ୍ୟଟନ କ୍ଷେତ୍ର ଲଭର୍ସ ପଏଣ୍ଟଟି ଉପଯୁକ୍ତ କ୍ଷେତ୍ର ଭାବେ ରହିଛି। ବଣଭୋଜି କରିବା ସହ ବିଭିନ୍ନ ପ୍ରକାର ଖେଳ କୁଦ, କ୍ରିୟା କଳାପ ପାଇଁ ମଧ୍ୟ ସ୍ଥାନଟି ଉପଯୁକ୍ତ କ୍ଷେତ୍ର ଭାବେ ରହିଛି। ସେହିପରି ସରକାରୀ ହେଉ କି ବେସରକାରୀ ଅନୁଷ୍ଠାନ ପକ୍ଷରୁ ମଧ୍ୟ ଉକ୍ତ ଲଭର୍ସ ପଏଣ୍ଟରେ ବିଭିନ୍ନ ବୈଠକ ସହ ଭୋଜିଭାତର ଆସର ଜମୁଛି। ଦାରିଙ୍ଗବାଡ଼ିକୁ ଆସୁଥିବା ପର୍ଯ୍ୟଟକ ବିଭିନ୍ନ ପର୍ଯ୍ୟଟନ କ୍ଷେତ୍ର ବୁଲିବା ସହ ନିଶ୍ଚିତ ଏହି ଲଭର୍ସ ପଏଣ୍ଟ ବୁଲୁଥିବା ଜଣାପଡ଼ିଛି।
