ପୁରୀ,୭ା୧(ଅଜିତ୍ କୁମାର ମହାନ୍ତି):ଚଳିତ ମାସ ୮ରୁ ୧୦ ତାରିଖ ପର୍ଯ୍ୟନ୍ତ ଭୁବନେଶ୍ୱରରେ ୧୮ତମ ପ୍ରବାସୀ ଭାରତୀୟ ଦିବସ ସମ୍ମିଳନୀ ଅନୁଷ୍ଠିତ ହେବାକୁ ଯାଉଛି। ଏହି ଅବସରରେ ମହାପ୍ରଭୁଙ୍କ ଦର୍ଶନ ସହ ଓ ପୁରୀ ଜିଲାର ଅପରୂପ ପର୍ଯ୍ୟଟନସ୍ଥଳର ସୌନ୍ଦର୍ଯ୍ୟ ଉପଭୋଗ କରିବାକୁ ପ୍ରବାସୀ ଭାରତୀୟଙ୍କ ଉତ୍ସାହ ଦେଖିବାକୁ ମିଳୁଛି। ପୁରୀ ସଜେଇ ହୋଇଥିବାବେଳେ ପ୍ରଶାସନ ପକ୍ଷରୁ ବିଚ୍ ଫେଷ୍ଟିଭାଲ ସହ ବିଭିନ୍ନ କାର୍ଯ୍ୟକ୍ରମ ଆୟୋଜନ କରାଯାଉଛି। ସମ୍ମିଳନୀ ପାଇଁ ପ୍ରବାସୀ ଭାରତୀୟମାନେ ଓଡ଼ିଶାରେ ପହଞ୍ଚତ୍ବାକୁ ଲାଗିଛନ୍ତି। ସୋମବାର ପ୍ରଥମ ପ୍ରବାସୀ ଭାରତୀୟ ଭାବେ ନ୍ୟୁଜିଲାଣ୍ଡରେ ରହୁଥିବା ବନୀଷା ଧୀରୁ ଶ୍ରୀମନ୍ଦିର ଆସି ମହାପ୍ରଭୁଙ୍କୁ ଦର୍ଶନ କରିଛନ୍ତି। ସେ ୟୁନେସ୍କୋରେ ନ୍ୟୁଜିଲାଣ୍ଡର ଜାତୀୟ କମିଶନର, ଲାଇବ୍ରେରି ଓ ଇନ୍ଫର୍ମେଶନ୍ ଆଡ୍ଭାଇଜରି କମିଶନର, ଆଡ୍ଭୋକେଟ ଫର୍ ଏଥେନିକ ଆଣ୍ଡ ଜେଣ୍ଡର ରାଇଟ୍ସ ଇସ୍ୟୁ, ବୋର୍ଡ ମେମ୍ବର ଅଫ ଗ୍ଲୋବାଲ ଓମାନ ନ୍ୟୁଜିଲାଣ୍ଡ, ଜଷ୍ଟିସ ଅଫ୍ ଦି ପିସ୍ ଅଫ୍ ନ୍ୟୁଜିଲାଣ୍ଡର ସଦସ୍ୟ ରହିଛନ୍ତି। ପ୍ରବାସୀ ଭାରତୀୟ ଭାବେ ସେ ପ୍ରବାସୀ ଭାରତୀୟ ଦିବସ ସମ୍ମିଳନୀରେ ଯୋଗଦେବାକୁ ଓଡ଼ିଶା ଆସିଛନ୍ତି। ପୁରୀ ଅତିରିକ୍ତ ଜିଲାପାଳ (ପ୍ରୋଟୋକଲ) ନୀଳମାଧବ ଭୋଇ, ଅତିରିକ୍ତ ଉପ ଜିଲାପାଳ ନୀଳମାଧବ ମାଝୀ, ଶ୍ରୀମନ୍ଦିର ଲୋକ ସମ୍ପର୍କ ଅଧିକାରୀ ଜିତେନ୍ଦ୍ର କୁମାର ମହାନ୍ତି ପ୍ରମୁଖ ଧୀରୁଙ୍କୁ ସ୍ବାଗତ କରିବା ସହ ମନ୍ଦିର ଦର୍ଶନ ଓ ପରିକ୍ରମା ପ୍ରକଳ୍ପ ପରିଦର୍ଶନ କରାଇଥିଲେ। ମହାପ୍ରଭୁଙ୍କ ଦର୍ଶନ କରି ଓ ପୁରୀ ଆସି ସେ ଅନେକ ଆନନ୍ଦିତ ବୋଲି ଧୀରୁ କହିବା ସହ ରାଜ୍ୟ ସରକାର ଓ ଜିଲା ପ୍ରଶାସନଙ୍କୁ ଧନ୍ୟବାଦ ଜଣାଇଥିଲେ। ସେହିପରି ସନ୍ଧ୍ୟାରେ ଇଂଲଣ୍ଡରେ ରହୁଥିବା କେତେଜଣ ପ୍ରବାସୀ ଭାରତୀୟ ଶ୍ରୀମନ୍ଦିର ଆସି ମହାପ୍ରଭୁଙ୍କୁ ଦର୍ଶନ କରିଥିଲେ। ସୁକାନ୍ତ ସାହୁ, ଚିନୁ କିଶୋର, ରଶ୍ମି ମିଶ୍ର, ଡ. ସେହ୍ନା ସୋନି, ନିଲେସ୍ ଜୋଶି, ଫିୟନା ଜୋଶି ଏବଂ ନିରପେନ୍ ବାର୍କାଟିକ୍ ପ୍ରମୁଖ ପ୍ରବାସୀ ଭାରତୀୟ ପୁରୀ ଆସିଥିବା ଜଣାପଡ଼ିଛି। ଏହି ଅତିଥିମାନେ କହିଛନ୍ତି, ପ୍ରବାସୀ ଭାରତୀୟ ସମ୍ମିଳନୀରେ ଯୋଗଦେବାକୁ ଓଡ଼ିଶା ଆସିଛୁ। ତେବେ ସୋମବାର ପୁରୀ ଆସି ଶ୍ରୀମନ୍ଦିରରେ ମହାପ୍ରଭୁଙ୍କ ଦର୍ଶନ କରି ବେଶ୍ ଭାବବିହ୍ବଳ ହୋଇପଡ଼ିଛୁ। ପୁରୀ ବେଳାଭୂମି ବହୁତ ସୁନ୍ଦର, ପର୍ଯ୍ୟଟକଙ୍କୁ ଆକୃଷ୍ଟ କରିବ। ରାଜ୍ୟ ସରକାର ଓ ଜିଲା ପ୍ରଶାସନ ପକ୍ଷରୁ ଭଲ ବ୍ୟବସ୍ଥା କରାଯାଇଛି। ଏଭଳି କାର୍ଯ୍ୟକ୍ରମ ଆୟୋଜନ ପାଇଁ ଭାରତ ସରକାର ଏବଂ ଓଡ଼ିଶା ସରକାରଙ୍କୁ ଧନ୍ୟବାଦ ଜଣାଉଛୁ।
