ଭୁବନେଶ୍ୱର,୧୫ା୧(ବ୍ୟୁରୋ): ତ୍ରିସ୍ତରୀୟ ପଞ୍ଚାୟତ ନିର୍ବାଚନ ପାଇଁ ଗୁରୁବାର ବିଜ୍ଞପ୍ତି ପ୍ରକାଶ ପାଇବା ପରେ ଗ୍ରାମାଞ୍ଚଳରେ ରାଜନୈତିକ ଉଷ୍ମତା ଭରିଯାଇଛି। ବିଭିନ୍ନ ସ୍ଥାନରେ ପୋଷ୍ଟର ବ୍ୟାନର ଛାଇଗଲାଣି। ଛକ, ହାଟ ବଜାରରେ ଆଶାୟୀ ପ୍ରାର୍ଥୀମାନେ ନିଜର ପୋଷ୍ଟର ଓ ବ୍ୟାନର ମାରି ନିର୍ବାଚନ ଦୌଡ଼ରେ ଥିବା ସଙ୍କେତ ଦେଇ ସାରିଛନ୍ତି। କେବଳ ସେତିକି ନୁହେଁ, ଦଳୀୟ ସମର୍ଥନ ହାସଲ କରିବାକୁ ସ୍ଥାନୀୟ ନେତାଙ୍କ ଜରିଆରେ ଲବି ମଧ୍ୟ ଆରମ୍ଭ କରି ଦେଇଛନ୍ତି। ଆସନ୍ତା ୧୭ ତାରିଖରୁ ପ୍ରାର୍ଥତ୍ପତ୍ର ଦାଖଲ ଆରମ୍ଭ ହେବ। ଏହା ପୂର୍ବରୁ ଜିଲା ପରିଷଦ ସଭ୍ୟ ଆଶାୟୀମାନେ ଟିକେଟ ହାତେଇବା ପାଇଁ ସ୍ଥାନୀୟ ବିଧାୟକମାନଙ୍କ ଜରିଆରେ ଜୋରସୋରରେ ଉଦ୍ୟମ ଚଳାଇଛନ୍ତି। ଅନ୍ୟପକ୍ଷରେ ଓ୍ବାର୍ଡମେମ୍ବର, ସରପଞ୍ଚ, ସମିତି ସଭ୍ୟଙ୍କର କୌଣସି ଦଳୀୟ ଚିହ୍ନ ନ ଥିଲେ ମଧ୍ୟ ଆଶାୟୀମାନେ ରାଜନୈତିକ ସମର୍ଥନ ହାସଲ କରିବାକୁ ଉଦ୍ୟମ ଚଳାଇଛନ୍ତି।
ଶାସକ ଦଳ ବିଜେଡି ପ୍ରାର୍ଥୀ ହେବାକୁ ଆଶାୟୀଙ୍କ ମଧ୍ୟରେ ପ୍ରତିନ୍ଦ୍ୱନ୍ଦ୍ୱିତା ବଢ଼ିବାରେ ଲାଗିଛି। ଶାସକ ଦଳରୁ ପ୍ରାର୍ଥୀ ପାଇଁ କୂଳକିନାରା ପାଉ ନ ଥିବା ଆଶାୟୀମାନେ ଭାଜପା ଓ କଂଗ୍ରେସ ନେତାଙ୍କୁ ଭରସା କରିଛନ୍ତି। ତେବେ ୩ ପ୍ରମୁଖ ରାଜନୈତିକ ଦଳ ବିଜେଡି, ଭାଜପା ଓ କଂଗ୍ରେସ ପ୍ରାର୍ଥୀଖୋଜା ଆରମ୍ଭ କରି ଦେଇଛନ୍ତି। ବିଜେଡି ପ୍ରାର୍ଥୀ ଚୟନରେ ଆଗରେ ଥିଲେ ମଧ୍ୟ ଆଶାୟୀଙ୍କୁ ମନାଇବା ସ୍ଥାନୀୟ ନେତାଙ୍କ ପାଇଁ ବଡ଼ ଚ୍ୟାଲେଞ୍ଜ ହୋଇଛି। ପଞ୍ଚାୟତ ନିର୍ବାଚନକୁ ହାତେଇବା ପାଇଁ ଉଭୟ ବିଜେଡି ଓ ଭାଜପା ମୁହାଁମୁହିଁ ହେଉଥିବା ବେଳେ କଂଗ୍ରେସ ମଧ୍ୟ ନିଜର ପୁରୁଣା ସ୍ଥିତିକୁ ଫେରିବାକୁ ରଣନୀତି ପ୍ରସ୍ତୁତ କରୁଛି। ବିଜୟୀ ହେବା ଆଶା ଅଧିକ ଥିବା ପ୍ରାର୍ଥୀଙ୍କୁ ନିଜ ସପକ୍ଷରେ ନେବାକୁ ରାଜନୈତିକ ଦଳଗୁଡ଼ିକ ମଧ୍ୟରେ ଏକପ୍ରକାର ପ୍ରତିଯୋଗିତା ଆରମ୍ଭ ହୋଇଯାଇଛି। ପ୍ରାର୍ଥତ୍ପତ୍ର ଦାଖଲକୁ ଆଉ ୨ ଦିନ ବାକି ଥିବାବେଳେ ଆଶାୟୀମାନେ ବିଧାୟକଙ୍କ ଘରେ ଭିଡ଼ ଜମାଉଛନ୍ତି। ଏପରିକି ଅନେକ ଆଶାୟୀ ଭୁବନେଶ୍ୱର ଆସି ଦଳୀୟ ବିଧାୟକଙ୍କୁ ସାକ୍ଷାତ କରି ଟିକେଟ ଲବି ଚଳାଇଛନ୍ତି। ତେବେ କେଉଁ ଦଳରୁ କାହାକୁ ଟିକେଟ ଓ ସମର୍ଥନ ମିଳିବ ତାହା ନାମାଙ୍କନ ବେଳେ ସ୍ପଷ୍ଟ ହୋଇଯିବ।
ରାଜ୍ୟ ନିର୍ବାଚନ କମିଶନଙ୍କ ଘୋଷଣା ଅନୁଯାୟୀ ପଞ୍ଚାୟତ ନିର୍ବାଚନ ପାଇଁ ଜାନୁୟାରୀ ୧୭ରୁ ୨୧ ମଧ୍ୟରେ ନାମାନଙ୍କପତ୍ର ଦାଖଲ ହେବ। ୨୨ତାରିଖରେ ଯାଞ୍ଚ, ୨୫ ତାରିଖ ଅପରାହ୍ନ ୩ଟା ମଧ୍ୟରେ ନାମାଙ୍କନପତ୍ର ପ୍ରତ୍ୟାହାର କରିହେବ। ସେହିଦିନ ସାରେ ଚୂଡ଼ାନ୍ତ ପ୍ରାର୍ଥୀ ତାଲିକା ପ୍ରକାଶ ପାଇବ। ଚଳିତଥର ତ୍ରିସ୍ତରୀୟ ପଞ୍ଚାୟତ ନିର୍ବାଚନରେ ମୋଟ ୯୧,୯୧୩ ୱାର୍ଡମେମ୍ବର, ୬,୭୯୪ ସରପଞ୍ଚ, ୬,୭୯୩ ପଞ୍ଚାୟତ ସମିତି ସଭ୍ୟ ଓ ୮୫୩ଜଣ ଜିଲା ପରିଷଦ ସଭ୍ୟ ପଦ ପାଇଁ ଭୋଟଗ୍ରହଣ ହେବ। ରାଜ୍ୟର ମୋଟ ୨କୋଟି ୭୯ଲକ୍ଷ ୩୫ହଜାର ୫୨୦ଜଣ ଭୋଟର ନିଜର ମତଦାନ କରିବେ।