ଭାରତରେ ପ୍ରତିଭାର ଅଭାବ ନାହିଁ। ହେଲେ ଅନେକ ସମୟରେ ପ୍ରତିଭା ଦେଖାଇବା ପାଇଁ ସମସ୍ତଙ୍କୁ ପ୍ଲାଟଫର୍ମ ମିଳି ନ ଥାଏ। ଫଳରେ ବଣମଲ୍ଲୀର ମହକ ବଣରେ ହିଁ ରହିଯାଉଥିବା ଭଳି କୌଶଳ ଲୋକଲୋଚନକୁ ନ ଆସିପାରି ବ୍ୟକ୍ତିଙ୍କ ପାଖରେ ସୀମିତ ରହିଥାଏ। ସେହିଭଳି ଉତ୍ତରପ୍ରଦେଶର ପିଲିବିଟ୍ ଜିଲାର ଅମାରିଆ ତହସିଲର ବାରା ଡନଓ୍ବା ଗାଁର ଜଣେ ବ୍ୟକ୍ତି ଏବେ ନିଜର କଳାକୁ ନେଇ ଚର୍ଚ୍ଚାରେ।
ଜାତୀୟ ଗଣମାଧ୍ୟମରେ ପ୍ରକାଶିତ ଖବର ଅନୁଯାୟୀ ବ୍ୟକ୍ତିଜଣଙ୍କ ନାମ ଆଲିଶାନ ଖାନ୍। ତାଙ୍କ ବୟସ ୭୮ ବର୍ଷ। ସେ ଏପରି ଶବ୍ଦ କରନ୍ତି ଯାହାକୁ ଶୁଣିବା ମାତ୍ରେ କାଉମାନେ ଏକତ୍ରିତ ହୁଅନ୍ତି। ୨୦ ବର୍ଷ ଧରି ସେ ଏପରି କରିଆସୁଛନ୍ତି। ଗାଁର ପିଲାମାନଙ୍କୁ ଖୁସି କରିବା ପାଇଁ ସେ ପ୍ରାୟତଃ ପକ୍ଷୀମାନଙ୍କୁ ଡାକନ୍ତି।
ଭାଇରାଲ ହେଉଥିବା ଭିଡିଓରେ ମଧ୍ୟ ସେପରି କିଛି ଦୃଶ୍ୟ ଦେଖିବାକୁ ମିଳୁଛି। ଚାରିଆଡେ ଗୋଟିଏ କାଉ ନ ଥିବା ବେଳେ ଆଲିଶାନଙ୍କ ଡାକ ଶୁଣି ସେମାନେ ଚାଲି ଆସୁଛନ୍ତି। ଏହା ଦେଖି ସେଠାରେ ଥିବା ପିଲାମାନେ ଖୁସି ହୋଇଯାଉଥିବା ଦେଖାଯାଉଛି।