ନୂଆଦିଲ୍ଲୀ, ୨୨ା୫: ବିଶ୍ୱର ତୃତୀୟ ସର୍ବାଧିକ ଅଶୋଧିତ ତୈଳ ଆମଦାନୀ କରୁଥିବା ଭାରତ ଏପ୍ରିଲରେ ଗତ ସାଢେ ୩ ବର୍ଷ ମଧ୍ୟରେ ସର୍ବାଧିକ ତୈଳ ଗ୍ରହଣ କରିଛି। ଉପଭୋକ୍ତାଙ୍କ ଚାହିଦାରେ ସୁଧାର ଏବଂ ଦର ବୃଦ୍ଧି ନିୟନ୍ତ୍ରଣ କରିବା ପାଇଁ ଦେଶ ପକ୍ଷରୁ ଅଶୋଧିତ ତୈଳ କ୍ରୟ ଉପରେ ଗୁରୁତ୍ୱାରୋପ କରାଯାଇଛି। ପେଟ୍ରୋଲିୟମ୍ ପ୍ଲାନିଂ ଆଣ୍ଡ ଆନାଲିସିସ୍ ସେଲ୍ ପକ୍ଷରୁ ପ୍ରଦାନ କରାଯାଇଥିବା ତଥ୍ୟ ଅନୁସାରେ ଚଳିତ ବର୍ଷ ଏପ୍ରିଲରେ ମାର୍ଚ୍ଚ ଅପେକ୍ଷା ୯.୭% ଅଧିକ ଅଶୋଧିତ ତୈଳ ଆମଦାନୀ ହୋଇଛି। ପୂର୍ବ ବର୍ଷ ଅର୍ଥାତ୍ ୨୦୨୧ର ଏହି ଅବଧି ଅପେକ୍ଷା ଅଶୋଧିତ ତୈଳ ଆମଦାନୀରେ ୧୪.୩% ବୃଦ୍ଧି ଘଟି ୨୦.୮୭ ମିଲିୟନ ଟନ୍ରେ ପହଞ୍ଚିଛି। ୨୦୧୮ ଅକ୍ଟୋବର ପରଠାରୁ ଏହି ଆମଦାନୀ ପରିମାଣ ସର୍ବାଧିକ ରହିଥିଲା ବୋଲି ସେଲ୍ ପକ୍ଷରୁ ସୂଚନା ଦିଆଯାଇଛି। ରିଷ୍ଟେଡ୍କର ଜଣେ ଡାଉନ୍ଷ୍ଟ୍ରିମ୍ ଆନାଲିଷ୍ଟ ଜାନିବ ଶାହଙ୍କ କହିବା ଅନୁସାରେ, ଆଖିଦୃଶିଆ ରିହାତି ସହିତ ମିଡିୟମ ସୋର ୟୁରାଲ୍ ଗ୍ରେଡ୍ ଏବଂ ଷ୍ଟ୍ରଙ୍ଗ୍ ଡିଜେଲ କ୍ରାକ୍ ଘରୋଇ ଉପଭୋକ୍ତାଙ୍କ ବ୍ୟବହାର ପାଇଁ ରୁଷିଆଠାରୁ ଭାରତ କ୍ରୟ ଜାରି ରଖିଛି। ରିଫାଇନେରି କମ୍ପାନୀଗୁଡ଼ିକ ବର୍ତ୍ତମାନର ବଜାର ସ୍ଥିତି ଉପରେ ଲାଭ ଉଠାଇବା ପାଇଁ ଯୋଜନାବଦ୍ଧ ଭାବରେ ରକ୍ଷଣାବେକ୍ଷଣରେ ବିଳମ୍ବ କରିଥିଲେ। ରିଫାଇନେରିଗୁଡ଼ିକ ନେମ୍ପ୍ଲେଟ୍ କ୍ଷମତାଠାରୁ ଅଧିକରେ ପରିଚାଳିତ ହେଉଥିବା କାରଣରୁ ଏଭଳି ପଦକ୍ଷେପ ନିଆଯାଇଥିବା ଶାହ କହିଛନ୍ତି। ୟୁକ୍ରେନ୍-ରୁଷିଆ ଯୁଦ୍ଧ ଆରମ୍ଭ ହେବା ପରଠାରୁ ଅନେକ ପାଶ୍ଚାତ୍ୟ ଦେଶ ରୁଷିଆ ଉପରେ ବାଣିଜି୍ୟକ କଟକଣା ସମେତ ଅନେକ ପ୍ରତିବନ୍ଧକ ଲଗାଇଥିଲେ। ତେବେ ଏଭଳି ସମୟର ଫାଇଦା ଉଠାଇ ଭାରତ ରୁଷିଆଠାରୁ ଅଧିକ ରିହାତି ସହ ଅଶୋଧିତ ତୈଳ କ୍ରୟ କରିବା ଜାରି ରଖିଛି। ଚଳିତ ଶନିବାର ଶେଷ ହୋଇଥିବା ସପ୍ତାହରେ ରୁଷିଆଠାରୁ ଭାରତ ୪ର୍ଥ ସର୍ବାଧିକ ତୈଳ କ୍ରୟ କରିଥିବା ଟ୍ୟାଙ୍କର ଟ୍ରାକିଂ ତଥ୍ୟରୁ ସୂଚନା ମିଳିଛି। ପୂର୍ବ ବର୍ଷ ଏପ୍ରିଲ ଅପେକ୍ଷା ଗତ ମାସରେ ଦେଶର ତୈଳ ପଦାର୍ଥର ଆମଦାନୀରେ ୨୩.୭% ବୃଦ୍ଧ ଘଟି ୩.୭୯ ମିଲିୟନ ଟନ୍ରେ ପହଞ୍ଚିଥିବା ବେଳେ ରପ୍ତାନି ୩୬.୯% ସହିତ ୫.୩୬ ମିଲିୟନ ଟନ୍ ହୋଇଥିବା ସରକାରୀ ତଥ୍ୟରୁ ଜଣାଯାଇଛି। ଭାରତରେ ତୈଳ ଚାହିଦା କାରଣରୁ ଆମଦାନୀରେ ବୃଦ୍ଧି ହୋଇଥିବା ୟୁବିଏସ୍ ବିଶ୍ଲେଷକ ଜିଓଭାନୀ ଷ୍ଟୋନୋଭୋ କହିଛନ୍ତି।