![](https://www.dharitri.com/wp-content/uploads/2022/02/n-9-20.jpg)
ଓ୍ବାଶିଂଟନ/ନୂଆଦିଲ୍ଲୀ,୨୪।୨ : ୟୁକ୍ରେନ୍ ବିରୋଧରେ ରୁଷିଆର ଯୁଦ୍ଧ ଘୋଷଣା ପରେ ଅନ୍ତର୍ଜାତୀୟ ବଜାରରେ ଅଶୋଧିତ ତୈଳ ଦାମ ରେକର୍ଡସ୍ତରରେ ପହଞ୍ଚିଛି। ବ୍ୟାରେଲ ପିଛା ଏହା ୧୦୧ ଡଲାର ଛୁଇଁଛି। ଏହାର ପ୍ରଭାବ ଭାରତ ଉପରେ ପଡ଼ିବାକୁ ଯାଉଛି।
ଫଳରେ ଦେଶବାସୀ ଖୁବ୍ ଶୀଘ୍ର ମୁଦ୍ରାସ୍ଫୀତିର ଏକ ବଡ଼ ଝଟକା ପାଇବାକୁ ଯାଉଛନ୍ତି। ପେଟ୍ରୋଲ ଏବଂ ଡିଜେଲର ମୂଲ୍ୟରେ ବୃଦ୍ଧି ପାଇବା ପ୍ରାୟ ନିଶ୍ଚିତ ହୋଇଛି। ସେପ୍ଟେମ୍ବର ୨୦୧୪ ପରଠାରୁ ପ୍ରଥମ ଥର ପାଇଁ ଅଶୋଧିତ ତୈଳ ବ୍ୟାରେଲ ପିଛା ୧୦୦ ଡଲାର ଟପିଛି।
ରୁଷିଆ ଏବଂ ୟୁକ୍ରେନ ମଧ୍ୟରେ ଯୁଦ୍ଧ ଆରମ୍ଭ ହୋଇଥିବାରୁ ଅଶୋଧିତ ତୈଳ ପୁଣି ଅଧିକ ମହଙ୍ଗା ହେବାର ଆଶଙ୍କା ସୃଷ୍ଟି ହୋଇଛି। ଫଳରେ ଦେଶରେ ମହଙ୍ଗାଦର ପୁଣି ବଢ଼ିବାର ଆଶଙ୍କା ରହିଛି। ଅଶୋଧିତ ତୈଳର ମୂଲ୍ୟ ଉପରେ ନଜର ରଖିଥିବା ଅନ୍ତର୍ଜାତୀୟ ଅନୁସନ୍ଧାନ ଏଜେନ୍ସିଗୁଡ଼ିକ ଅନୁଯାୟୀ ଅଶୋଧିତ ତୈଳର ମୂଲ୍ୟ ଆହୁରି ବଢ଼ିପାରେ।
ଗୋଲ୍ଡମ୍ୟାନ ସାକ୍ସ କହିଛି ଯେ ୨୦୨୨ରେ ଅଶୋଧିତ ତୈଳର ବ୍ୟାରେଲ ପିଛା ୧୦୦ ଡଲାର ଟପିବାର ପୂର୍ବାନୁମାନ ଠିକ ପ୍ରମାଣିତ ହୋଇଛି। ଏଥି ସହିତ, ଜେପି ମୋର୍ଗାନ ୨୦୨୨ରେ ଅଶୋଧିତ ତୈଳ ଦାମ ବ୍ୟାରେଲ ପିଛା ୧୨୫ ଡଲାର ଏବଂ ୨୦୨୩ରେ ବ୍ୟାରେଲ ପିଛା ୧୫୦ ଡଲାର ପର୍ଯ୍ୟନ୍ତ ଛୁଇଁବ ବୋଲି ପୂର୍ବାନୁମାନ କରିଛି।
ଲଗାତାର ଗତ ଦୁଇ ମାସ ଧରି ଅଶୋଧିତ ତୈଳ ଦାମରେ ନିଆଁ ଲାଗିଛି। ୨୦୨୨ରେ ଅଶୋଧିତ ତୈଳ ମୂଲ୍ୟରେ ୨୫ ପ୍ରତିଶତରୁ ଅଧିକ ବୃଦ୍ଧି ଘଟିଛି। ଗତ ଦୁଇ ମାସ ଧରି ଅଶୋଧିତ ତୈଳର ଦାମ କ୍ରମାଗତ ଭାବରେ ବୃଦ୍ଧି ପାଉଛି।
୧ ଡିସେମ୍ବର ୨୦୨୧ରେ ଏହା ବ୍ୟାରେଲ ପିଛା ୬୮.୮୭ ଡଲାର ଥିଲା। ଯାହା ବର୍ତ୍ତମାନ ବ୍ୟାରେଲ ପିଛା ୧୦୦ ଡଲାର ଟପିଛି। ଅର୍ଥାତ୍ ଦେଢ଼ମାସ ମଧ୍ୟରେ ଅଶୋଧିତ ତୈଳର ଦାମ ନିମ୍ନ ସ୍ତରରୁ ୪୦ ପ୍ରତିଶତ ବୃଦ୍ଧି ପାଇଛି।
ଯଦିଓ ଦେଶରେ ପେଟ୍ରୋଲ ଏବଂ ଡିଜେଲ ମୂଲ୍ୟରେ ଇତି ମଧ୍ୟରେ କୌଣସି ପରିବର୍ତ୍ତନ ହୋଇନାହିଁ। ୪ ନଭେମ୍ବର ୨୦୨୧ଠାରୁ ପେଟ୍ରୋଲ ଏବଂ ଡିଜେଲ ମୂଲ୍ୟ ପରିବର୍ତ୍ତନ କରାଯାଇ ନାହିଁ। ଦେଶର ପାଞ୍ଚଟି ରାଜ୍ୟରେ ବିଧାନସଭା ନିର୍ବାଚନ ଚାଲିଛି ଏବଂ ମାର୍ଚ୍ଚ ୧୦ରେ ଫଳାଫଳ ବାହାରିବ। ନିର୍ବାଚନରେ ହାରିଯିବା ଭୟରେ ଅଶୋଧିତ ତୈଳ ଦାମରେ ଅହେତୁକ ବୃଦ୍ଧି ସତ୍ତ୍ୱେ ସରକାରଙ୍କ ଚାପରେ ତୈଳ କମ୍ପାନୀଗୁଡ଼ିକ ପେଟ୍ରୋଲ ଏବଂ ଡିଜେଲ ମୂଲ୍ୟରେ କୌଣସି ପରିବର୍ତ୍ତନ କରୁନଥିବା କୁହାଯାଉଛି। କିନ୍ତୁ ମାର୍ଚ୍ଚ ୧୦ ପରେ ରାଷ୍ଟ୍ରାୟତ୍ତ ତୈଳ କମ୍ପାନୀଗୁଡିକ କ୍ଷତି ପୂରଣ ପାଇଁ ନିଶ୍ଚିତ ଭାବରେ ପେଟ୍ରୋଲ ଏବଂ ଡିଜେଲ ମୂଲ୍ୟ ବୃଦ୍ଧି କରିବେ।