ନୂଆଦିଲ୍ଲୀ,୧୪।୧୨: ଗତ କିଛି ମାସ ହେବ ଅଶୋଧିତ ତୈଳ ଦର ପୂର୍ବ ଅପେକ୍ଷା କମ୍ ରହିଛି। ଫଳରେ ଓପେକ୍ ରାଷ୍ଟ୍ରଠାରୁ ତୈଳ ଆମଦାନୀ କରୁଥିବା ଭାରତ ପ୍ରାୟ ୨୨% ତୈଳ ଆମଦାନୀ କରି ତୈଳ ଭଣ୍ଡାରରେ ଗଚ୍ଛିତ ରଖିଛି। ଏପରିକି ଅନ୍ତଃରାଷ୍ଟ୍ରୀୟ ସମସ୍ୟା ଓ ତୈଳ ବଜାରରେ ଅଶୋଧିକ ତୈଳର ଚାହିଦା ବୃଦ୍ଧି ସାଙ୍ଗକୁ ଦର ହ୍ରାସ ପାଇଛି। ଏହାରି ମଧ୍ୟରେ ରୁଷିଆ କ୍ରମାଗତ ୨ୟ ଥର ଲାଗି ଭାରତର ସବୁଠାରୁ ବଡ଼ ତୈଳ ରପ୍ତାନକାରୀ ସହଯୋଗୀ ରାଷ୍ଟ୍ର ଭାବେ ପରିଗଣିତ ହୋଇପାରିଛି। ଏପରିକି ଇରାକ ଓ ସାଉଦି ଆରବକୁ ପଛରେ ପକାଇ ରୁଷିଆ ଚଳିତ ବର୍ଷ ନଭେମ୍ବରରେ ଭାରତକୁ ସର୍ବାଧିକ ତେଲ ରପ୍ତାନି କରିଥିବା ଏନର୍ଜି କାର୍ଗୋ ଟ୍ରାକର ଭୋର୍ଟେକ୍ସା ପକ୍ଷରୁ କୁହାଯାଇଛି। ବିଶେଷକରି ଇନ୍ଧନ ଶକ୍ତି ଯୋଗାଣ ଉପରେ ନଜର ରଖୁଥିବା ସଂସ୍ଥା ଭୋର୍ଟକ୍ସାର ସୂଚନା ଅନୁସାରେ ଭାରତ ୨୦୨୨ ମାର୍ଚ୍ଚ ୩୧ ପର୍ଯ୍ୟନ୍ତ ରୁଷିଆଠାରୁ ମାତ୍ର ୦.୨% ତୈଳ ଆମଦାନୀ କରିଥିଲା। ହେଲେ ୨୦୨୨ ନଭେମ୍ବରରେ ମସ୍କୋ ନୂଆଦିଲ୍ଲୀକୁ ପ୍ରତିଦିନ ପ୍ରାୟ ୯,୦୯,୪୦୩ ବ୍ୟାରେଲ ତୈଳ ରପ୍ତାନି କରିଥିବା ଜଣାପଡ଼ିଛି ବୋଲି ସଂସ୍ଥା ଉକ୍ତ ରିପୋର୍ଟରେ ଉଲ୍ଲେଖ କରିଛି। ସେହିଭଳି ଇରାକ ଓ ସାଉଦି ଆରବଠାରୁ ବି ଭାରତ ବିପୁଳ ପରିମାଣରେ ତୈଳ ଆମଦାନୀ କରିଛି। ଏପରିକି ୨୦୨୨ ନଭେମ୍ବରରେ ଇରାକଠାରୁ ଦୈନିକ ୮.୬୧,୪୬୧ ବ୍ୟାରେଲ ତୈଳ ଆମଦାନୀ ହୋଇଥିବା ବେଳେ ସାଉଦି ଆରବଠାରୁ ଦୈନିକ ୫,୭୦,୯୨୨ ବ୍ୟାରେଲ ତୈଳ ଆମଦାନୀ ହୋଇଛି। ତେବେ ୨୦୨୨ ଅକ୍ଟୋବରରେ ଭାରତ ରୁଷିଆଠାରୁ ଯେତିକି ତୈଳ ଆମଦାନୀ କରିଥିଲା ନଭେମ୍ବରରେ ତା’ଠାରୁ ଅପେକ୍ଷାକୃତ କମ୍ ଆମଦାନୀ କରିଛି ବୋଲି କୁହାଯାଉଛି। ଅପରପକ୍ଷରେ ୨୦୨୧ ଡିସେମ୍ବରରେ ଭାରତ ରୁଷିଆଠାରୁ ଦୈନିକ ହିସାବରେ(ବିପିଡି) ୩୬,୨୫୫ ବ୍ୟାରେଲ ଅଶୋଧିତ ତୈଳ କିଣିଥିଲା। ହେଲେ ସେହି ସମୟରେ ଇରାକଠାରୁ ୧.୦୫ ମିଲିୟନ ବିପିଡି ଓ ସାଉଦି ଆରବଠାରୁ ୯,୫୨,୬୨୫ ବିପିଡି ତୈଳ ଭାରତ ଆମଦାନୀ କରିଥିଲା। ଏହା ପରେ ୨ ମାସ ଧରି ଭାରତ ରୁଷିଆଠାରୁ ତେଲ କିଣିବା ବନ୍ଦ କରିଦେଇଥିଲା। ଏହା ପୁଣି ୨୦୨୨ ମାର୍ଚ୍ଚରେ ଆରମ୍ଭ ହୋଇଥିଲା। ୟୁକ୍ରେନ୍ ଉପରେ ଆକ୍ରମଣ ପରେ ପଶ୍ଚିମ ରାଷ୍ଟ୍ରଗୁଡ଼ିକ ରୁଷିଆ ଉପରେ କଟକଣା ଲଗାଇଥିଲେ।