ଭୁବନେଶ୍ୱର,୩।୩(ବ୍ୟୁରୋ): ଆଖି ଠିକ୍ ଭାବେ ଫିଟି ନାହିଁ। ଦେହରେ ପର ବି ସମ୍ପୂର୍ଣ୍ଣ ଲାଗି ନାହିଁ। ଗୁରୁଣ୍ଡି ଗୁରୁଣ୍ଡି ମା’ ମୁହଁରୁ ଖାଦ୍ୟ, ଆଉ ସ୍ନେହକୁ ଅପେକ୍ଷା କରି ରହୁଥିବା ଶୁଆ ଶାବକଙ୍କୁ ଅତି ନିଷ୍ଠୁର ଭାବେ ଗଛ କୋରଡ଼ରୁ ଉଠାଇ ଆଣୁଛନ୍ତି ଶିକାରୀ। ଏଭଳି ପୂରା ଘଟଣାର ଭିଡିଓ ସୋସିଆଲ ମିଡିଆରେ ଏବେ ଭାଇରାଲ ହେବାରେ ଲାଗିଛି। କନ୍ଧମାଳ ଏଲ୍.କେ. ଚ୍ୟାନେଲ ନାମକ ୟୁଟ୍ୟୁବ୍ ଆକାଉଣ୍ଟରୁ ଅପ୍ଲୋଡ଼ ହୋଇଥିବା ଏହି ଭିଡ଼ିଓରେ ଜଣେ ଯୁବକ ଜଙ୍ଗଲରେ ଏକ ଗଛ ଉପରେ ଚଢ଼ି କୋରଡ ଭିତରୁ ଶୁଆ ଶାବକଙ୍କୁ ବାହାର କରି ଗାମୁଛାରେ ବାନ୍ଧି ତଳକୁ ଓହ୍ଲାଉଥିବାର ଦୃଶ୍ୟ ରହିଛି। ପରେ ସେ ୩ ଆଲେକଜାଣ୍ଡ୍ରିନ୍ ପାରାକିଟ୍ ବା ନାହାକା ଶୁଆ ଛୁଆଙ୍କୁ ତଳେ ଛାଡ଼ୁଛି। ଡେଣାରେ ସମ୍ପୂର୍ଣ୍ଣ ପର ଲାଗି ନ ଥିବାରୁ ସେମାନେ ଉଡି ନ ପାରି ତଳେ ଚାଲୁଛନ୍ତି। ଅନ୍ୟ ଏକ ଭିଡିଓରେ ୮ଟି ଆଲେକଜାଣ୍ଡ୍ରିନ୍ ଶୁଆ ଶାବକଙ୍କୁ ଏକ ଗିନାରେ ଭାତ ଖାଉଥିବା ଦେଖିବାକୁ ମିଳୁଛି। ଏସବୁ ଭିଡିଓକୁ ଡାଉନ୍ଲୋଡ୍ କରି ଇମେଲ୍ ଯୋଗେ ରାଜ୍ୟର ମୁଖ୍ୟ ବନ୍ୟ ପ୍ରାଣୀ ତତ୍ତ୍ୱାବଧାରକଙ୍କୁ ପଠାଇ ବିଧିବଦ୍ଧ ଅଭିଯୋଗ କରିଛନ୍ତି ଖୋର୍ଦ୍ଧା ଜିଲାର ଅବୈତନିକ ବନ୍ୟ ପ୍ରାଣୀ ତତ୍ତ୍ୱାବଧାରକ ଶୁଭେନ୍ଦୁ ମଲ୍ଲିକ। ସେ ଦୁଇଟି ଯାକ ଭିଡ଼ିଓର ୟୁଆର୍ଏଲ୍ ଥାଇ ସ୍କ୍ରିନ୍ସଟ୍କୁ ପ୍ରମାଣ ସ୍ବରୂପ ସଂଲଗ୍ନ କରିଛନ୍ତି। ଏଥିସହ ଅଭିଯୋଗର ଏକ ନକଲ ଓ୍ବାଇଲ୍ଡ ଲାଇଫ କ୍ରାଇମ୍ କଣ୍ଟ୍ରୋଲ ବ୍ୟୁରୋର ଅତିରିକ୍ତ ନିର୍ଦ୍ଦେଶକ ତିଲୋତ୍ତମା ବର୍ମାଙ୍କୁ ମଧ୍ୟ ଦେଇଛନ୍ତି। ହେଲେ ଏହା ଉପରେ କୌଣସି ପଦକ୍ଷେପ ନିଆଯାଇ ନ ଥିବା ଜଣାପଡିଛି।
ବନ ବିଭାଗର ଦାୟିତ୍ୱହୀନତା ଯୋଗୁ ରାଜ୍ୟରେ ବେଆଇନ ବନ୍ୟପ୍ରାଣୀ ଶିକାର ଦିନକୁ ଦିନ ବଢ଼ିବାରେ ଲାଗିଛି। ବେଳେବେଳେ ଶୁଆ ଚାଲାଣ ଧରାଯିବା ସହ ସମ୍ପୃକ୍ତ ବିକ୍ରେତା ବା ଚାଲାଣକାରୀଙ୍କ ଉପରେ କାର୍ଯ୍ୟାନୁଷ୍ଠାନ ହେଉଛି। ହେଲେ କୋହଳ ତଦନ୍ତରୁ ଅଭିଯୁକ୍ତମାନେ ଜାମିନରେ ଖସି ଯାଉଛନ୍ତି। ଶୁଆ କିମ୍ବା ଅନ୍ୟ କୌଣସି ଭାରତୀୟ ବନ୍ୟପ୍ରାଣୀ ବା ଟ୍ରଫିକୁ ଧରି ଫଟୋ ବା ଭିଡ଼ିଓ କରି ସୋସିଆଲ ମେଡିଆରେ ଅପ୍ଲୋଡ୍ କରିବା ଏକ ବେଆଇନ କାର୍ଯ୍ୟ ବୋଲି ୨୦୧୪ରୁ ଓ୍ବାଇଲ୍ଡ ଲାଇଫ କ୍ରାଇମ୍ କଣ୍ଟ୍ରୋଲ ବ୍ୟୁରୋ ତରଫରୁ ନିଷେଧାଜ୍ଞା ଜାରି କରାଯାଇଛି। ହେଲେ ବନ ବିଭାଗ କାର୍ଯ୍ୟାନୁଷ୍ଠାନ ନ ନେବା ଫଳରେ ଏଭଳି ବେଆଇନ କାମ ଓଡ଼ିଶାରେ ଦିନକୁ ଦିନ ବଢ଼ିବାରେ ଲାଗିଛି। ଜଙ୍ଗଲରୁ ଶୁଆ ଶାବକଙ୍କୁ ପର ଉଠି ନ ଥିବା ଅବସ୍ଥାରେ ଧରି ଚାଲାଣ କରାଯାଉଛି। ସମ୍ପୃକ୍ତ ବ୍ୟକ୍ତିଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ନେବାକୁ ଶୁଭେନ୍ଦୁ ଦାବି କରିଛନ୍ତି।