ଚେନ୍ନାଇ,୨୨ା୩ (ପି.ଟି.):ବିଶ୍ୱର ସବୁଠାରୁ ଧନଶାଳୀ କ୍ରିକେଟ ଲିଗ୍ ଇଣ୍ଡିଆନ ପ୍ରିମିୟର ଲିଗ୍(ଆଇପିଏଲ୍)ର ୧୭ ତମ ସଂସ୍କରଣ ଶୁକ୍ରବାର ଆରମ୍ଭ ହେବାକୁ ଯାଉଛି। ଚେନ୍ନାଇର ଏମ୍. ଏ. ଚିଦାମ୍ବରମ୍ ଷ୍ଟାଡିୟମରେ ଖେଳାଯିବାକୁ ଥିବା ଉଦ୍ଘାଟନୀ ମ୍ୟାଚ୍ରେ ଦେଖିବାକୁ ମିଳିବ ସାଉଥ୍ ଡର୍ବି। ଦୁଇ ଦକ୍ଷିଣ ଭାରତୀୟ ଦଳ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର(ଆର୍ସିବି) ଓ ଚେନ୍ନାଇ ସୁପର କିଙ୍ଗ୍ସ(ସିଏସ୍କେ) ପରସ୍ପରର ମୁକାବିଲା କରିବେ। ଆଇପିଏଲ୍ର ସବୁଠୁ ଲୋକପ୍ରିୟ ଦଳ ଆର୍ସିବି ଟ୍ରଫି ଶୂନ୍ୟ ରହିଥିବା ବେଳେ ପ୍ରଥମ ଟାଇଟଲ ଆଶାରେ ରହିବ। ଅନ୍ୟପକ୍ଷରେ ୫ ଟ୍ରଫି ସହ ଆଇପିଏଲ୍ ଇତିହାସର ସଫଳ ଦଳ ତଥା ଡିଫେଣ୍ଡିଂ ଚାମ୍ପିୟନ ଚେନ୍ନାଇ ମଧ୍ୟ ନିଜର ଅଭିଯାନ ଆରମ୍ଭ କରିବ। ଆଇପିଏଲ୍ ଉଦ୍ଘାଟନୀ ମ୍ୟାଚ୍ର ଗୋଟିଏ ଦିନ ପୂର୍ବରୁ ମହେନ୍ଦ୍ର ସିଂ ଧୋନୀ ଅଧିନାୟକ ପଦ ଛାଡିବା ସହିତ ଋତୁରାଜ ଗାଏକ୍ୱାଡ୍ଙ୍କୁ ବାଟନ ପାସ୍ କରିଛନ୍ତି। ଧୋନୀଙ୍କ ପରାମର୍ଶରେ ଗାଏକ୍ୱାଡ୍ ସିଜନର ସଫଳ ଆରମ୍ଭ ପାଇଁ ଚେଷ୍ଟା କରିବେ। ଅନ୍ୟପକ୍ଷରେ ଓମେନ୍ସ ପ୍ରିମିୟର ଲିଗ୍ରେ ପ୍ରଥମ ଟାଇଟଲ ଜିତିଥିବା ଆର୍ସିବି ଆଇପିଏଲ୍ରେ ପୁରୁଷ ଦଳ ସହ ସମାନ ସଫଳତା ହାସଲ କରିବାକୁ ପ୍ରୟାସ କରିବ।
ଧୋନୀଙ୍କ ଭୂମିକା ସମ୍ପର୍କରେ କୌଣସି ସ୍ପଷ୍ଟ ସୂଚନା ମିଳି ନ ଥିବା ବେଳେ ସେ ଚଳିତ ସିଜନ ଶେଷରେ ଅବସର ନେବା ସମ୍ଭାବନାକୁ ଏଡାଇ ଦିଆଯାଇ ନ ପାରେ। ତେଣୁ ଆଉ ଏକ ଟାଇଟଲ ସହିତ ଆଇପିଏଲ୍ର ଶ୍ରେଷ୍ଠ ଅଧିନାୟକଙ୍କୁ ବିଦାୟ ଜଣାଇବାକୁ ଚାହିଁବ ସିଏସ୍କେ। ଡେଭନ୍ କନ୍ଓ୍ବେଙ୍କ ଅନୁପସ୍ଥିତିରେ ରାଚିନ୍ ରବୀନ୍ଦ୍ରଙ୍କୁ ଟପ୍ ଅର୍ଡରରେ ଦେଖିବାକୁ ମିଳିବ। ଅନ୍ୟତମ ନ୍ୟୁଜିଲାଣ୍ଡ ଖେଳାଳି ଡାରିଲ୍ ମିଚେଲ୍ଙ୍କୁ ମଧ୍ୟକ୍ରମରେ ଦେଖିବାକୁ ମିଳିପାରେ। ସେହିପରି ଗତ ସିଜନର ଷ୍ଟାର ଅଜିଙ୍କ୍ୟ ରାହାନେଙ୍କ ଅଭିଜ୍ଞତା ଓ ଋତୁରାଜ ଗାଏକ୍ୱାଡ୍ଙ୍କ ଅଧିନାୟକତ୍ୱରୁ ଫାଇଦା ନେବାକୁ ପ୍ରୟାସ କରିବ। ଗାଏକ୍ୱାଡ୍ ସୟଦ ମୁସ୍ତାକ ଅଲୀ ଟି୨୦ ଟୁର୍ନାମେଣ୍ଟରେ ସର୍ବାଧିକ ସ୍କୋରର ଭାବେ ଆଇପିଏଲ୍ ଖେଳିବାକୁ ଯାଉଛନ୍ତି। ସେହିପରି ଏମ୍. ଏ. ଚିଦାମ୍ବରମ୍ ଷ୍ଟାଡିୟମ ସ୍ପିନରଙ୍କୁ ସୁହାଉଥିବା ବେଳେ ଚେନ୍ନାଇ ନିକଟରେ ଏକାଧିକ ସ୍ପିନ ବୋଲିଂ ଅଲରାଉଣ୍ଡର ବିକଳ୍ପ ଉପଲବ୍ଧ ରହିଛି। ରବୀନ୍ଦ୍ର ଜାଡେଜା, ମୋଇନ୍ ଅଲୀ, ମିଚେଲ ସାଣ୍ଟନର ଓ ମହୀଷ ଥିକ୍ସାନାଙ୍କ ଉପସ୍ଥିତି ଦଳକୁ ଶକ୍ତିଶାଳୀ କରୁଛି। ଦୀପକ ଚହର ଓ ଶାର୍ଦ୍ଦୂଳ ଠାକୁରଙ୍କ ରୂପରେ ଦଳ ନିକଟରେ ଦୁଇ ପେସ୍ ବୋଲିଂ ଅଲରାଉଣ୍ଡର ରହିଛନ୍ତି। ତେବେ ଶ୍ରୀଲଙ୍କାର ସ୍ଲିଙ୍ଗର ମଥିଶା ପଥିରାନାଙ୍କୁ ମିସ୍ କରିବ ଚେନ୍ନାଇ।
ପ୍ରଥମ ଟାଇଟଲ୍ ଲକ୍ଷ୍ୟରେ ଥିବା ଆଇପିଏଲ୍ ଫ୍ରାଞ୍ଚାଇଜି ଆର୍ସିବି ପାଇଁ ଆଶାର କିରଣ ରହିବେ ଅଧିନାୟକ ଫାଫ୍ ଡୁ ପ୍ଲେସି ଓ ବିରାଟ କୋହଲି। ଉଭୟ ଖେଳାଳି ଦୁଇ ମାସର ବ୍ରେକ୍ ପରେ ପ୍ରତ୍ୟାବର୍ତ୍ତନ କରିଥିବା ବେଳେ ଚମତ୍କାର ଇନିଂସ ଆଶା କରିବେ ଫ୍ୟାନ୍। ସେହିପରି କାମେରନ୍ ଗ୍ରୀନ୍ ଓ ଗ୍ଲେନ୍ ମ୍ୟାକ୍ସଓ୍ବେଲ ବିସ୍ଫୋରକ ବ୍ୟାଟିଂ ପାଇଁ ଜଣାଶୁଣା। ମଧ୍ୟକ୍ରମରେ ରଜତ ପଟିଦାର ଓ ଦୀନେଶ କାର୍ତ୍ତିକଙ୍କ ଉପରେ ସଭିଙ୍କ ନଜର ରହିବ। ଚଳିତ ସିଜନରେ ଆର୍ସିବିର ପେସ୍ ବୋଲିଂ କିନ୍ତୁ ବେଶ୍ ଶକ୍ତିଶାଳୀ ରହିଛି। ମହମ୍ମଦ ସିରାଜଙ୍କ ନେତୃତ୍ୱରେ ଲୋକି ଫର୍ଗୁସନ, ଆଲଜାରି ଯୋଶେଫ, ଆକାଶ ଦୀପ ଓ ରିସି ଟପ୍ଲେଙ୍କ ପରି ଖେଳାଳି ରହିଛନ୍ତି। ତେବେ ଦଳର ସ୍ପିନ୍ ଆକ୍ରମଣ ସାମାନ୍ୟ ଦୁର୍ବଳ ମନେହେଉଛି। ହସରଙ୍ଗାଙ୍କୁ ଦଳ ରିଲିଜ୍ କରିଥିବା ବେଳେ କର୍ନ ଶର୍ମା ଓ ଗ୍ଲେନ୍ ମ୍ୟାକ୍ସଓ୍ବେଲଙ୍କ ଉପରେ ସ୍ପିନ ବୋଲିଂ ଭାର ରହିବ। ଦଳ ନିକଟରେ ହିମାଂଶୁ ଶର୍ମା ଓ ମୟଙ୍କ ଡାଗର ରହିଥିଲେ ମଧ୍ୟ ଉଭୟଙ୍କ ନିକଟରେ ଅଭିଜ୍ଞତାର ଅଭାବ ରହିଛି। ଉଲ୍ଲେଖଯୋଗ୍ୟ ଯେ ଗୁରୁବାର ଚେନ୍ନାଇରେ କ୍ୟାପଟେନ୍ସ ମିଟ୍ ହୋଇଥିବା ବେଳେ ୮ ଫ୍ରାଞ୍ଚାଇଜର ଅଧିନାୟକ ଯୋଗ ଦେଇଥିଲେ। ଶିଖର ଧାଓ୍ବନଙ୍କ ଅନୁପସ୍ଥିତିରେ ପଞ୍ଜାବ କିଙ୍ଗ୍ସ ଉପ ଅଧିନାୟକ ଜୀତେଶ ଶର୍ମା କ୍ୟାପଟେନ୍ସ ମିଟ୍ରେ ଯୋଗ ଦେଇଥିଲେ।