ଚେନ୍ନାଇ,୧୫।୧୦:ଆଇପିଏଲ୍ରେ ଚେନ୍ନାଇ ସୁପର କିଙ୍ଗସ(ସିଏସ୍କେ)କୁ ପାଓ୍ବାର ହାଉସ୍ କୁହାଯାଏ। ଏହି ଟୁର୍ନାମେଣ୍ଟରେ ଦଳ ତିନିଥର ଟାଇଟେଲ୍ ଜିତିଛି। ସିଏସ୍କେ ପ୍ରତ୍ୟେକଥର ପ୍ଲେ ଅଫରେ ପହଞ୍ଚି। କିନ୍ତୁ ଏଥର ଦଳ ସେତେଟା ଭଲ ପ୍ରଦର୍ଶନ କରିପାରି ନାହିଁ। ୮ଟି ମ୍ୟାଚ ଖେଳି ମାତ୍ର ୩ଟିରେ ବିଜୟ ହାସଲ କରିଛି। କିନ୍ତୁ ସିଏସ୍କେର ପ୍ରଶଂସକଙ୍କ ସଂଖ୍ୟା କୌଣସି ହ୍ରାସ ପାଇ ନାହିଁ। ମହେନ୍ଦ୍ର ସିଂ ଧୋନୀଙ୍କ ନେତୃତ୍ୱରେ ଦଳ ଆଗକୁ ଭଲ ପ୍ରଦର୍ଶନ କରିବ ବୋଲି ଆଶା କରାଯାଉଛି। ଚେନ୍ନାଇ ସୁପର କିଙ୍ଗ୍ସର ସବୁଠାରୁ ବଡ ଶକ୍ତି ହେଉଛି ସେମାନଙ୍କର ବିଶ୍ୱସ୍ତ ପ୍ରଶଂସକ, ଯେଉଁମାନେ ସର୍ବଦା ସେମାନଙ୍କ ପାଖରେ ଛିଡା ହୋଇଛନ୍ତି। ଖେଳାଳିଙ୍କ ମନୋବଳକୁ ସୁଦୃଢ଼ କରିବା ପାଇଁ ସିଏସକେଏ ତାର ଟୁଇଟର୍ରେ ପ୍ରଶଂସକଙ୍କ କିଛି ଫଟୋ ଶେୟାର କରିଛନ୍ତି। ଏହି ଫଟୋରେ ତାମିଲନାଡୁର ଅରଙ୍ଗୁରର ବଡ ପ୍ରଶଂସକ ଗୋପୀ କୃଷ୍ଣନ ଏବଂ ତାଙ୍କ ପରିବାରର ଅଛନ୍ତି। ଧୋନୀ ଏବଂ ସିଏସ୍କେର ଏହି ସୁପର ଫ୍ୟାନ ତାଙ୍କର ପୁରା ଘରକୁ ହଳଦିଆ ରଙ୍ଗରେ ରଙ୍ଗେଇ ଦେଇଛନ୍ତି। ଏହା ସହିତ ସେ ତାଙ୍କ ଘରର ନାମ ରଖିଛନ୍ତି – ହୋମ୍ ଅଫ୍ ଧୋନୀ ଫ୍ୟାନ୍। ଗୋପୀ କୃଷ୍ଣନ କହିଛନ୍ତି, ମୁଁ ଧୋନୀଙ୍କର ଜଣେ ବଡ଼ ପ୍ରଶଂସକ। ଲୋକମାନେ ତାଙ୍କ ବିଷୟରେ ନକାରାତ୍ମକ ମନ୍ତବ୍ୟ ଦେଉଛନ୍ତି। ବିଶ୍ୱ କ୍ରିକେଟର ଶ୍ରେଷ୍ଠ ଫିନିସର୍ ବୋଲି ସେମାନେ ଭୁଲି ଯାଇଛନ୍ତି।