ଦୁବାଇ,୧।୧୧:ଆଇପିଏଲ ୨୦୨୦ର ୫୩ତମ ମ୍ୟାଚରେ ଦୀପକ ହୁଡାଙ୍କ ଚମତ୍କାର ବ୍ୟାଟିଂ ବଳରେ ଚେନ୍ନାଇ ସୁପର କିଙ୍ଗ୍ସ ସମ୍ମୁଖରେ କିଙ୍ଗ୍ସ ଏକାଦଶ ପଞ୍ଜାବ ୧୫୪ ରନ ବିଜୟ ଲକ୍ଷ୍ୟ ରଖିଛି। ଟସ ହାରିବା ପରେ ପ୍ରଥମେ ବ୍ୟାଟିଂ କରି ପଞ୍ଜାବ ୬ ଉଇକେଟ ହରାଇ ୧୫୩ ରନ ସଂଗ୍ରହ କରିଥିଲା। ଲୁଙ୍ଗି ଏଙ୍ଗିଡି ଚେନ୍ନାଇ ପାଇଁ ଚମତ୍କାର ବୋଲିଂ କରିଥିଲେ। ସେ ୪ ଓଭରରେ ୩୯ ରନ ଦେଇ ୩ଟି ଉଇକେଟ ନେଇଥିଲେ। ସେହିପରି ପଞ୍ଜାବ ପକ୍ଷରୁ ଦୀପକ ହୁଡା ୬୨ ରନର ପାଳି ଖେଳିଥିଲେ। ଏହି ମ୍ୟାଚ ପଞ୍ଜାବ ପାଇଁ କର ବା ମର ପରି ହୋଇପଡିଛି। ଯଦି ପଞ୍ଜାବ ଏହି ମ୍ୟାଚ ହାରେ ତେବେ ପ୍ଲେ ଅଫ୍ରୁ ବାଦ୍ ପଡିବ। ସେପଟେ ଚେନ୍ନାଇ ଚଳିତ ଆଇପିଏଲ୍ର ପ୍ଲେ ଅଫ୍ରୁ ପୂର୍ବରୁ ବାଦ୍ ପଡିଥିବାରୁ ଶେଷ ମ୍ୟାଚ୍ ଦଳ ପାଇଁ ସେତେଟା ଗୁରୁତ୍ୱପୂର୍ଣ୍ଣ ନୁହେଁ। ତଥାପି ବିଜୟର ସହ ବିଦାୟ ଦେବାକୁ ଚେଷ୍ଟା କରିବ ଦଳ। ଉଭୟ ଦଳ ଚଳିତ ଆଇପିଏଲରେ ୧୩ଟି ଲେଖାଏ ମ୍ୟାଚ ଖେଳି ସାରିଛନ୍ତି। ଚେନ୍ନାଇ ୫ଟି ବିଜୟ ଓ ୮ଟି ପରାଜୟ ପଏଣ୍ଟ ଟେବୁଲର ଶେଷରେ ରହିଛି। ସେହିପରି ପଞ୍ଜାବ ୬ଟି ବିଜୟ ଓ ୭ଟି ପରାଜୟ ସହ ପଞ୍ଚମ ସ୍ଥାନରେ ରହିଛି।