ଦୁବାଇ, ୫ା୮ (ପି.ଟି.)-କରୋନା ଭାଇରସ୍ ପାଇଁ ତୃତୀୟ ରାଉଣ୍ଡ ଟେଷ୍ଟିଂ ପରେ ଚେନ୍ନାଇ ସୁପର କିଙ୍ଗ୍ସ (ସିଏସ୍କେ) ଶେଷରେ ଶୁକ୍ରବାର ନେଟ୍ସ ଆରମ୍ଭ କରିଛି। କୋଭିଡ୍-୧୯ ପଜିଟିଭ୍ ପାଇଁ କ୍ୱାରାଣ୍ଟାଇନ୍ରେ ଥିବା ଦୀପକ ଚହର ଓ ଋତୁରାଜ ଗାଏକ୍ୱାଡ୍ଙ୍କୁ ଛାଡ଼ି ଅଧିନାୟକ ମହେନ୍ଦ୍ର ସିଂ ଧୋନୀ ଏବଂ ଚେନ୍ନାଇ ସୁପର କିଙ୍ଗ୍ସର ଅନ୍ୟ ସମସ୍ତ ଖେଳାଳି ଏଥିରେ ଅଂଶଗ୍ରହଣ କରିଥିଲେ। ଗତ ସପ୍ତାହରେ ଦୀପକ ଓ ଋତୁରାଜଙ୍କ ବ୍ୟତୀତ ଚେନ୍ନାଇ ସୁପର କିଙ୍ଗ୍ସ ଦଳର ୧୧ଜଣ ସଦସ୍ୟ ଟେଷ୍ଟିଂରେ ପଜିଟିଭ ଆସିବାରୁ ୬ଦିନିଆ କ୍ୱାରାଣ୍ଟାଇନ ଶେଷ ହେବା ପରେ ମଧ୍ୟ ଦଳର ଟ୍ରେନିଂରେ ବିଳମ୍ବ ଘଟିଥିଲା। ଅଗଷ୍ଟରେ ଦଳ ଏଠାରେ ପହଞ୍ଚତ୍ବା ପରେ ସମସ୍ତେ ୬ଦିନ କ୍ୱାରାଣ୍ଟାଇନ୍ରେ ଥିଲେ। ସମସ୍ତ ସଦସ୍ୟଙ୍କର ୩ଥର ଟେଷ୍ଟ ହୋଇଥିଲା। କରୋନା ଭାଇରସ୍ ମୁକ୍ତ ଖେଳାଳିଙ୍କର ଅତିରିକ୍ତ ରାଉଣ୍ଡ ଟେଷ୍ଟିଂ ଗୁରୁବାର ହୋଇଥିଲା। ଏଥିରେ ସେମାନେ ଉତ୍ତୀର୍ଣ୍ଣ ହେବା ପରେ ଟ୍ରେନିଂ ଆରମ୍ଭ ହୋଇଥିଲା। ୧୪ ଦିନିଆଇ ଆଇସୋଲେଶନ ପରିୟଡ ଶେଷ ହେବା ପରେ ୧୧ଜଣ ଷ୍ଟାଫ୍ ସଦସ୍ୟଙ୍କ ବ୍ୟତୀତ ଦୀପକ ଓ ଋତୁରାଜଙ୍କୁ ଦୁଇଥର କୋଭିଡ୍-୧୯ ଟେଷ୍ଟ ହେବ। ଏଥିରେ ନେଗେଟିଭ୍ ଆସିଲେ ସେମାନେ ଟ୍ରେନିଂରେ ସାମିଲ ହୋଇ ପାରିବେ। ବର୍ତ୍ତମାନର ଲାଇନ୍ ଅପ୍ରେ ଦୀପକଙ୍କୁ ପ୍ରଥମ ଟିମ୍ ଷ୍ଟାର୍ଟର ବିବେଚନା କରାଯାଉଛି। ଟୁର୍ନାମେଣ୍ଟରୁ ଓହରିଯାଇଥିବା ଭେଟେରାନ ସୁରେଶ ରାଇନାଙ୍କୁ ସ୍ଥାନରେ ଟପ୍ ଅର୍ଡରରେ ଋତୁରାଜଙ୍କୁ ଖେଳାଇବା ଲାଗି ଯୋଜନା କରାଯାଇଛି। ସିଏସ୍କେର ଟ୍ରେନିଂ ଆରମ୍ଭ ଆଇପିଏଲ୍ ପାଇଁ ଏକ ଭଲ ଖବର। କାରଣ ସେପ୍ଟେମ୍ବର ୧୯ରେ ଚେନ୍ନଇ ସୁପର କିଙ୍ଗ୍ସ ଓ ମୁମ୍ବାଇ ଇଣ୍ଡିଆନ୍ସ ମଧ୍ୟରେ ଏଥର ଆଇପିଏଲର ଉଦ୍ଘାଟନୀ ମ୍ୟାଚ ଖେଳାଯିବାର କାର୍ଯ୍ୟକ୍ରମ ରହିଛି।
