ନୂଆଦିଲ୍ଲୀ,୧୯।୨: ଭାରତ ସରକାରଙ୍କ ଶକ୍ତି ମନ୍ତ୍ରଣାଳୟ ଅଧୀନରେ ଥିବା ଦେଶର ପ୍ରମୁଖ ମହାରତ୍ନ ସିପିଏସ୍ୟୁ ସଂସ୍ଥା ପାୱାରଗ୍ରୀଡ୍ କର୍ପୋରେଶନ ଅଫ୍ ଇଣ୍ଡିଆ ଲିମିଟେଡ୍କୁ ଆଉ ଏକ ବିରଳ ସମ୍ମାନରେ ସମ୍ମାନିତ କରାଯାଇଛି ବୋଲି କମ୍ପାନୀ ପକ୍ଷରୁ ସୂଚନା ଦିଆଯାଇଛି। ନୂଆଦିଲ୍ଲୀଠାରେ ଅନୁଷ୍ଠିତ ହୋଇଯାଇଥିବା ୯ମ ପିଏସ୍ୟୁ ଆଓ୍ବାର୍ଡ ସେରେମନିରେ ଉକ୍ତ ସମ୍ମାନ ପାଓ୍ବାରଗ୍ରୀଡ୍କୁ ଦିଆଯାଇଛି ବୋଲି ଆୟୋଜକଙ୍କ ପକ୍ଷରୁ କୁହାଯାଇଛି। ବିଶେଷକରି ଗଭର୍ନାନ୍ସ ନାଓ ପକ୍ଷରୁ ପାୱାରଗ୍ରୀଡ୍କୁ ଏକ ସାଙ୍ଗରେ ୫ଟି ସମ୍ମାନଜନକ ପୁରସ୍କାର ସହ ସମ୍ମାନିତ କରାଯାଇଛି। ସୂଚନାଯୋଗ୍ୟ, ୯ମ ପିଏସ୍ୟୁ ଆଓ୍ବାର୍ଡ ସେରେମନିରେ ପାଓ୍ବାରଗ୍ରୀଡ୍କୁ ଦିଆଯାଇଥିବା ପୁରସ୍କାର ଯଥା ସିଏସ୍ଆର୍ ଲିଡର ଅଫ୍ ଦି ଇୟର ଆଓ୍ବାର୍ଡ, ପରିବେଶ ଏବଂ ସ୍ଥିରତା ପୁରସ୍କାର, ରାଷ୍ଟ୍ର ନିର୍ମାଣ ପୁରସ୍କାର, ଅନୁସନ୍ଧାନ ଏବଂ ଅଭିନବ ପୁରସ୍କାର ସମେତ ଡିଜିଟାଲ ପିଏସ୍ୟୁ ପୁରସ୍କାର। ଏହି ପରିପ୍ରେକ୍ଷୀରେ ପାଓ୍ବାରଗ୍ରୀଡ୍ର ନିର୍ଦ୍ଦେଶକ (ପର୍ସନାଲ) ଡ. ଭି. କେ. ସିଂଙ୍କୁ ସାମଗ୍ରିକ ଭାବେ ସିଏସ୍ଆର୍ ଲିଡର ଅଫ୍ ଦି ଇୟର ପୁରସ୍କାରରେ ସମ୍ମାନିତ କରାଯାଇଛି। ବିଶେଷକରି ସିଏସ୍ଆର୍ ସେବା କ୍ଷେତ୍ରରେ ଅତୁଳନୀୟ ଅବଦାନ ଓ ଯୋଗଦାନ କରିଥିବା ଯୋଗୁ ପାଓ୍ବାରଗ୍ରୀଡ୍କୁ ଭାରତର ପୂର୍ବତନ ପ୍ରଧାନ ବିଚାରପତି ଜଷ୍ଟିସ୍ ଦୀପକ ମିଶ୍ର ଉକ୍ତ ପୁରସ୍କାର ପ୍ରଦାନ କରିଥିଲେ। ସେହିଭଳି ଉକ୍ତ ୫ଟି ପୁରସ୍କାର ଶକ୍ତି ଅବଦାନକୁ ସ୍ବୀକୃତି ପ୍ରଦାନ କରୁଥିବାବେଳେ ରାଷ୍ଟ୍ର ନିର୍ମାଣରେ ସିଏସ୍ଆର୍ ଏବଂ ସ୍ଥିରତା, ନବସୃଜନ ଏବଂ ଆଇଟିର ବ୍ୟବହାରକୁ ବିଶେଷ ଭାବେ ଦର୍ଶାଉଛି।