ପୁଣେ,୬।୪: ପାଟ କୁମିନ୍ସଙ୍କ ବିସ୍ଫୋରକ ଅର୍ଦ୍ଧଶତକ ରନ୍ର ପାଳି ବଳରେ କୋଲକାତା ନାଇଟ୍ ରାଇଡର୍ସ (କେକେଆର) ୫ ଉଇକେଟରେ ମୁମ୍ବାଇ ଇଣ୍ଡିଆନ୍ସକୁ ହରାଇ ଦେଇଛି। ୧୬୨ ରନ୍ର ଟାର୍ଗେଟ୍ ଛିଡ଼ା କରିବା ପରେ ଆରମ୍ଭରୁ ଭଲ ବୋଲିଂ ଯୋଗୁ କେକେଆର ଅଧା ଦଳକୁ ପ୍ୟାଭିଲିଅନ ପଠାଇ ଦେଇଥିଲା। କିନ୍ତୁ କୁମିନ୍ସ ସବୁ କିଛି ବଦଳି ରଖି ଦେଇଥିଲେ। ମାତ୍ର ୧୫ ବଲରେ ସେ ଖେଳିଥିଲେ ୫୬ ରନ୍ର ଇନିଂସ। ତାଙ୍କ ପାଳିରେ ୪ ଚୌକା ଓ ୬ ଛକା ସାମିଲ ଥିଲା। ସେ ୧୪ ବଲରେ ଅର୍ଦ୍ଧଶତକ ପୂରଣ କରିଥିଲେ, ଯାହାକି ଆଇପିଏଲରେ ଦ୍ରୁତତମ ଅର୍ଦ୍ଧଶତକ।
କୁମିନ୍ସଙ୍କ ଅପରାଜିତ ୫୬ ଏବଂ ଭେଙ୍କଟେଶ ଆୟାର (୫୦ ରନ୍, ୬ ଚୌକା ଓ ୧ ଛକା)ଙ୍କ ଯୋଗୁ କୋଲକାତା ୧୬ ଓଭରରେ ବିଜୟ ଲକ୍ଷ୍ୟ ହାସଲ କରିନେଇଥିଲା। ଏହି ବିଜୟ ସହ ଶ୍ରେୟାସ ଆୟାରଙ୍କ ଦଳ ୬ ପଏଣ୍ଟ ସହ ଟେବୁଲ ଶୀର୍ଷକୁ ଉନ୍ନୀତ ହୋଇଛି। ଅନ୍ୟପକ୍ଷରେ ରୋହିତ ଶର୍ମାଙ୍କ ମୁମ୍ବାଇ କ୍ରମାଗତ ତୃତୀୟ ପରାଜୟ ବରଣ କରିଛି। ପୂର୍ବରୁ ପ୍ରଥମେ ବ୍ୟାଟିଂ କରିଥିବା ମୁମ୍ବାଇ ସୂର୍ଯ୍ୟ କୁମାର ଯାଦବଙ୍କ (୫୨)ଙ୍କ ବଳରେ ୪ ଉଇକେଟ ହରାଇ ୧୬୧ ରନ୍ କରିଥିଲା।