ସମ୍ବଲପୁର,୧୩ା୮(ଶୁଭାଶିଷ ପାଢ଼ୀ)ଛତିଶଗଡ଼ ରାୟପୁରର ଏକ ଘରୋଇ ମେଡିକାଲ ଡାକ୍ତରଙ୍କ ଅବହେଳା ଯୋଗୁ ସମ୍ବଲପୁର ମହାନଗର ନିଗମ ହୀରାକୁଦର ଯୁବକ ସନତ କୁମାର ମହାନ୍ତି ତାଙ୍କ ଡାହାଣ ହାତର ବୁଢା ଅଙ୍ଗୁଳି ହରାଇ ବସିଛନ୍ତି। ଅଙ୍ଗୁଳି ଯୋଡିବା ବଦଳରେ ଡାକ୍ତର ବାରମ୍ବାର ଅପରେଶନ କରି ଶେଷରେ କାଟି ଦେଇଥିବା ସନତ ଅଭିଯୋଗ କରିଛନ୍ତି।
ଜିଲା ସାମ୍ବାଦିକ ଭବନରେ ଶନିବାର ସନତ ଏକ ଖବରଦାତା ସମ୍ମିଳନୀ କରି କହିଛନ୍ତି, ଗତ ଜୁଲାଇ ୨୧ ତାରିଖରେ ସେ ବାଇକ୍ରେ ଆସୁଥିବା ସମୟରେ ଦୁର୍ଘଟଣା ଯୋଗୁ ତାଙ୍କ ବୁଢା ଅଙ୍ଗୁଳିରେ ଗଭୀର ଆଘାତ ଲାଗିଥିଲା। ଚିକିତ୍ସା ପାଇଁ ପ୍ରଥମେ ସେ ଜିଲା ସଦର ଡାକ୍ତରଖାନା ଓ ପରେ ବୁର୍ଲା ଭିମ୍ସାରକୁ ଯାଇଥିଲେ। ସେଠାରେ ପ୍ରାଥମିକ ଚିକିତ୍ସା ପରେ ଡାକ୍ତର ତାଙ୍କୁ ଅଙ୍ଗୁଳି ଯୋଡିବାକୁ କଟକ ବଡ ମେଡିକାଲ ଯିବାକୁ କହିଥିଲେ। ହେଲେ ଶୀଘ୍ର ସୁସ୍ଥ ହେବା ଆଶାରେ ସେ ରାୟପୁରର ଏକ ବର୍ନ ଓ ପ୍ଲାଷ୍ଟିକ ସର୍ଜରି ସେଣ୍ଟର (ଘରୋଇ ମେଡିକାଲ)କୁ ଯାଇଥିଲେ। ସେଠାରେ ଆଡ୍ମିଶନ ହେବା ସମୟରେ ପ୍ରଥମେ ମେଡିକାଲ କର୍ତ୍ତୃପକ୍ଷ ୫୦ ହଜାର ଟଙ୍କା ନେଇଥିଲେ। ଚିକିତ୍ସା ଆରମ୍ଭ କରିବା ପରେ ଆଉ ୫୦ ହଜାର ନେଇଥିଲେ। ଅଙ୍ଗୁଳି ଯୋଡିବା ପାଇଁ ଅପରେଶନ କରିଥିଲେ। ହେଲେ ସେଫ୍ଟିକ୍ ହୋଇଯିବାରୁ ପୁଣି ଅପରେଶନ କରିବା ପାଇଁ କହିଥିଲେ। ଛିଣ୍ଡି ଯାଇଥିବା ଅଙ୍ଗୁଳି ନଷ୍ଟ ହୋଇଯାଇଛି, ଆଉ ହୋଇପାରିବ ନାହିଁ ବୋଲି କହିଥିଲେ। ୩ ଲକ୍ଷ ୭୫ ହଜାର ଟଙ୍କାର ବିଲ୍ ହୋଇଥିବାରୁ ତୁରନ୍ତ ପଇଠ ପାଇଁ କହିଥିଲେ। ଟଙ୍କା ଦେବାରେ ଅକ୍ଷମତା ପ୍ରକାଶ କରିବାରୁ ମେଡିକାଲରେ ପ୍ରାୟ ଏକସପ୍ତାହ ବନ୍ଧକ ରଖିଥିଲେ। ବହୁ କଷ୍ଟରେ ଏକ ଘରୋଇ ଫାଇନାନ୍ସ କମ୍ପାନୀରୁ ଋ଼ଣ ନେଇ ଟଙ୍କା ଦେଇ ମୁକୁଳିଥିଲି। ଆଉ ୨୫ହଜାର ଟଙ୍କା ନେବା ପାଇଁ ମୋଠାରୁ ଚୁକ୍ତିନାମା ମଧ୍ୟ ରଖିଛନ୍ତି। ଘରୋଇ ମେଡିକାଲ ଚିକିତ୍ସା ସେବା ଦେବା ନାମରେ ଶୋଷଣ କରୁଛନ୍ତି। ଏହାକୁ ନେଇ ଖାଉଟି ଅଦାଲତରେ ମାମଲା କରିବି ବୋଲି ସେ କହିଥିଲେ।