ନୂଆଦିଲ୍ଲୀ,୧୮।୧୧: ଉତ୍ତରପ୍ରଦେଶରେ ଶିକ୍ଷାମିତ୍ର ନିଯୁକ୍ତି ମାମଲାରେ ସୁପ୍ରିମ୍କୋର୍ଟ ଗୁରୁତ୍ୱପୂର୍ଣ୍ଣ ରାୟ ଦେଇଛନ୍ତି। ଆହ୍ଲାବାଦ୍ ହାଇକୋର୍ଟଙ୍କ ରାୟକୁ କାଏମ୍ ରଖି ସୁପ୍ରିମ୍କୋର୍ଟ କହିଛନ୍ତି ଯେ, ଶିକ୍ଷାମିତ୍ର ନିଯୁକ୍ତି କ୍ଷେତ୍ରରେ କଟ୍ ଅଫ୍ ମାର୍କ ୬୦ରୁ ୬୫ ମଧ୍ୟରେ ରହିବ। ସେଥିମଧ୍ୟରୁ ସଂରକ୍ଷିତ ବର୍ଗଙ୍କ ପାଇଁ କଟ୍ ଅଫ୍ ମାର୍କ ୬୦ ପ୍ରତିଶତ ଏବଂ ସାଧାରଣ ବର୍ଗଙ୍କ ଲାଗି ୬୫ ପ୍ରତିଶତ ରହିବ। ବିଚାରପତି ୟୁ.ୟୁ. ଲଳିତଙ୍କ ଦ୍ୱାରା ଗଠିତ ଖଣ୍ଡପୀଠ ଉତ୍ତରପ୍ରଦେଶ ପ୍ରାଥମିକ ଶିକ୍ଷାମିତ୍ର ସଂଘ ପକ୍ଷରୁ ଦାଖଲ କରାଯାଇଥିବା ମାମଲାକୁ ଖାରଜ କରିଛନ୍ତି। ୨୦୧୮ ଡିସେମ୍ବରରେ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ସରକାରଙ୍କ ପକ୍ଷରୁ ୬୯ ହଜାର ଶିକ୍ଷାମିତ୍ର ନିଯୁକ୍ତି ପାଇଁ ବିଜ୍ଞପ୍ତି ପ୍ରକାଶ ପାଇଥିଲା। ତେବେ ଏଥିରେ କଟ୍ ଅଫ୍ ମାର୍କ ସଂରକ୍ଷିତ ବର୍ଗଙ୍କ ପାଇଁ ୪୦ ଏବଂ ସାଧାରଣ ବର୍ଗଙ୍କ ପାଇଁ ୪୫ ରଖାଯାଇଥିଲା। ପରବର୍ତ୍ତୀ ସମୟରେ କଟ୍ ଅଫ୍ ମାର୍କକୁ ବଢ଼ାଇ ସାଧାରଣ ବର୍ଗଙ୍କ ପାଇଁ ୬୫ ଏବଂ ସଂରକ୍ଷିତ ବର୍ଗଙ୍କ ପାଇଁ ୬୦ ପ୍ରତିଶତ କରାଯାଇଥିଲା। ଏହାକୁ ବିରୋଧ କରି ପୂର୍ବ କଟ୍ ଅଫ୍ ମାର୍କକୁ ରଖିବା ଲାଗି ହାଇକୋର୍ଟରେ ମାମଲା ଦାଏର କରାଯାଇଥିଲା। ହାଇକୋର୍ଟ ସରକାରଭ୍କ ନିଷ୍ପତ୍ତି ସପକ୍ଷରେ ରାୟ ଦେଇଥିଲେ। ଏହାପରେ ହାଇକୋର୍ଟଙ୍କ ରାୟକୁ ବିରୋଧ କରି ସୁପ୍ରିମ୍କୋର୍ଟରେ ଆବେଦନ କରାଯାଇଥିଲା।