ଟିଭିରେ ଆଲିଙ୍ଗନ, ବୋଲ୍ଡ ସିନ୍ ଦେଖାଯିବା ଉପରେ ପାକିସ୍ତାନ ଇଲେକ୍ଟ୍ରୋନିକ୍ ମିଡିଆ ନିୟନ୍ତ୍ରକ କର୍ତ୍ତୃପକ୍ଷ(ପିଇଏମ୍ଆର୍ଏ) କଟକଣା ଲଗାଇଛି। ସ୍ଥାନୀୟ ଟିଭି ଚ୍ୟାନେଲଗୁଡ଼ିକୁ ଏ ବାବଦରେ ନୋଟିସ୍ ଜାରି କରାଯାଇ କୌଣସି ଡ୍ରାମାରେ ଆଲିଙ୍ଗନ୍, ବୋଲ୍ଡ ସିନ୍ ଆଦି ନ ଦେଖାଇବାକୁ କୁହାଯାଇଛି। କେତେକ ଡ୍ରାମାରେ ସ୍କ୍ରିନ୍ରେ ଆସୁଥିବା ଏଭଳି ଦୃଶ୍ୟ ଅତ୍ୟନ୍ତ ସମ୍ବେଦନଶୀଳ ଏବଂ ତାହାକୁ ନେଇ ବିବାଦ ସୃଷ୍ଟି ହେଉଛି। ଏହା ‘ସାଧାରଣ ଭାବେ ଗ୍ରହଣୀୟ ମାନକ’ ବିରୋଧରେ ଯାଉଛି। ପାକିସ୍ତାନ ସମାଜରେ ଇସ୍ଲାମିକ ଶିକ୍ଷା ଏବଂ ସଂସ୍କୃତିକୁ ସମ୍ପୂର୍ଣ୍ଣ ଅବମାନନା କରାଯାଇ ବିବାହିତ ଦମ୍ପତିଙ୍କ ଅନ୍ତରଙ୍ଗ ମୁହୂର୍ତ୍ତକୁ ଦେଖାଯାଉଛି ବୋଲି ପିଇଏମ୍ଆର୍ଏ କହିଛି। ତେଣୁ ପ୍ରତ୍ୟେକ ଡ୍ରାମା କଣ୍ଟେଣ୍ଟ୍କୁ ସମୀକ୍ଷା କରି ଏହାର ପ୍ରସାରଣ କରାଯିବାକୁ ସମସ୍ତ ଟିଭି ଚ୍ୟାନେଲକୁ ନିର୍ଦ୍ଦେଶ ଦିଆଯାଇଛି। ଏହାର ଅବମାନନା କଲେ ସେମାନଙ୍କ ଟିଭି ଚ୍ୟାନେଲଗୁଡ଼ିକର ଲାଇସେନ୍ସ ରଦ୍ଦ କରାଯିବ ବୋଲି କୁହାଯାଇଛି।