କଟକ ଅଫିସ, ୧୫ା୧୧: ୩୫ ମିନିଟ୍ରେ ୨୨,୪୭୩ କାଗଜ ଡଙ୍ଗା ପ୍ରସ୍ତୁତ କରି ଗିନିଜ୍ ଓ୍ବାଲ୍ଡ ରେକର୍ଡସ୍ରେ ସ୍ଥାନ ପାଇଛି କଟକ ବାଲିଯାତ୍ରା। ଐତିହାସିକ କଟକ ବାଲିଯାତ୍ରା ଅବସରରେ ମଙ୍ଗଳବାର ସ୍ଥାନୀୟ ବାରବାଟୀ ଷ୍ଟାଡିୟମରେ କାଗଜ ଡଙ୍ଗା ପ୍ରସ୍ତୁତି କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା। ଏଥିରେ ସହରର ୨୨ଟି ସ୍କୁଲର ୨୧୨୧ ଛାତ୍ରୀଛାତ୍ର ଅଂଶଗ୍ରହଣ କରିଥିଲ। କଟକ ମହାନଗର ନିଗମ(ସିଏମ୍ସି) ପକ୍ଷରୁ ୧୫ ମିନିଟ୍ରେ ୧୦,୦୦୦ କାଗଜ ଡଙ୍ଗା ପ୍ରସ୍ତୁତି ପାଇଁ ଲକ୍ଷ୍ୟ ରଖାଯାଇଥିଲା। ହେଲେ ଧାର୍ଯ୍ୟ ଲକ୍ଷ୍ୟଠାରୁ ଢେର ଅଧିକ ଡଙ୍ଗା ପ୍ରସ୍ତୁତ କରାଯାଇଥିଲା, ଯାହାକି କଟକର ଗରିମାକୁ ବିଶ୍ୱ ଦରବାରରେ ପୁଣି ଥରେ ଉଜ୍ଜୀବିତ କରିଛି। ଏହି ଅବସରରେ ବାରବାଟି ଷ୍ଟାଡିୟମରେ ଆୟୋଜିତ କାର୍ଯ୍ୟକ୍ରମରେ ଗିନିଜ୍ ୱାଲର୍ଡ ରେକଡର୍ସର କର୍ତ୍ତୃପକ୍ଷ ସିଏମ୍ସି ମେୟର ସୁବାସ ସିଂଙ୍କୁ ସାର୍ଟିଫିକେଟ୍ ପ୍ରଦାନ କରିଥିଲେ। ଏହି କାର୍ଯ୍ୟକ୍ରମରେ ସିଏମ୍ସି କମିଶନର ନିଖିଲ ପଓ୍ବନ କଲ୍ୟାଣ, ଡେପୁଟି କମିଶନର ସଞ୍ଜୀବିତା ରାଏ, ଅଜୟ ମହାନ୍ତି, ଡେପୁଟି ମେୟର ଦମୟନ୍ତୀ ମାଝି, ଡିସିପି ପିନାକ ମିଶ୍ର ଉପସ୍ଥିତ ଥିଲେ।