ବନ୍ତଳା, ୧୯।୪ (ଦିନେଶ ଦେହୁରୀ)
ଅନୁଗୋଳ ଜିଲା ସାତକୋଶିଆ ଅଭୟାରଣ୍ୟ ବ୍ୟାଘ୍ର ପ୍ରକଳ୍ପ କୋର୍ ଅଞ୍ଚଳରେ ଥିବା ଗ୍ରାମଗୁଡିକୁ ବିସ୍ଥାପିତ କରିବା ପାଇଁ ସରକାର ପଦକ୍ଷେପ ନେଉଛନ୍ତି। ପ୍ରାଥମିକତାରେ ରାଇଗୁଡା ଗ୍ରାମକୁ ବିସ୍ଥାପିତ କରାଯାଇଥିବା ବେଳେ ଏବେ ଟିକରପଡା ପଞ୍ଚାୟତ ଅଧୀନରେ ଥିବା ଜିଲିଣ୍ଡା ରେଞ୍ଜର କଟରଙ୍ଗ ଗ୍ରାମକୁ ବିସ୍ଥାପିତ କରିବା ପାଇଁ ବନବିଭାଗ ଓ ଜିଲା ପ୍ରଶାସନ ଅନ୍ତିମ ପ୍ରସ୍ତୁତିରେ ପହଞ୍ଚି ସାରିଛି। ସୋମବାର ଏ ନେଇ ବିସ୍ଥାପିତ ପରିବାରର ସଦସ୍ୟମାନଙ୍କୁ ନେଇ ସାଧାରଣ ବୈଠକରେ ଚୂଡାନ୍ତ ତାଲିକା ପ୍ରସ୍ତୁତ କରିବା ସହିତ ଗ୍ରାମବାସୀଙ୍କ ଅଭିଯୋଗ ଶୁଣାଯାଇଥିଲା। ସାତକୋଶିଆ ଡିଏଫ୍ଓ ସରୋଜ କୁମାର ପଣ୍ଡା, ଅନୁଗୋଳ ତହସିଲଦାର ବିମଳ କୁମାର ଲେଙ୍କା, ଅତିରିକ୍ତ ତହସିଲଦାର ପ୍ରଶାନ୍ତ କୁମାର ସିଙ୍ଗ, ଜିଲିଣ୍ଡା ରେଞ୍ଜର ହରିସ ପ୍ରଧାନ, ପୁରୁଣାକୋଟ ରାଜସ୍ବ ଅଧିକାରୀ, ଟିକରପଡା ସରପଞ୍ଚ ସୌମ୍ୟ ରଞ୍ଜନ ସାହୁ ପ୍ରମୁଖ ଉପସ୍ଥିତ ଥିଲେ।
ବୈଠକରେ ଉପସ୍ଥିତ ଅଧିକାରୀମାନେ କହିଥିଲେ, କଟରଙ୍ଗ ଗ୍ରାମର ମୋଟ୍ ୧୨୩ ସଦସ୍ୟ ବିସ୍ଥାପିତ ହେବେ। ସେଥିମଧ୍ୟରୁ ବର୍ତ୍ତମାନ ଜଣଙ୍କ ଦେହାନ୍ତ ହୋଇଯାଇଛି। ପ୍ରତ୍ୟେକ ସଦସ୍ୟଙ୍କ ପାଇଁ ୨୦ ଲକ୍ଷ ଟଙ୍କା କ୍ଷତିପୂରଣ ପ୍ରଦାନ ନିମନ୍ତେ ଜିଲା ପ୍ରଶାସନ ନିଷ୍ପତ୍ତି ନେଇଛି। ଏଥିସହିତ ସରକାରଙ୍କ ନୂଆ ନିୟମ ଅନୁଯାୟୀ ଜମିର ଭାଲୁଏଶନ କରାଯାଇଛି। ଯାହା ମୂଲ୍ୟ ରହିଛି, ତାହାକୁ ୧୦ ଭାଗ ଅଧିକ ବୃଦ୍ଧି କରି କ୍ଷତିପୂରଣ ଦିଆଯିବ। ଏଥିସହିତ ବନ ବିଭାଗ ପକ୍ଷରୁ କୌଣସି ଚାପ ପ୍ରୟୋଗ କିମ୍ବା ଜୋର ଜବରଦସ୍ତ ବିସ୍ଥାପିତ କରାଯିବ ନାହିଁ। ସହମତିରେ ୨୦ ଲକ୍ଷ ନେଇ ଲୋକେ ବିସ୍ଥାପିତ ହୋଇପାରିବେ। ଅନ୍ୟପକ୍ଷରେ ରୋଜଗାର ପାଇଁ ଗ୍ରାମରୁ ବାହାରେ ଥିବା ୨୬ ଜଣଙ୍କୁ ତାଲିକାରେ ଅନ୍ତର୍ଭୁକ୍ତ କରାଯାଇ ନ ଥିବାରୁ ଉପସ୍ଥିତ କେତେଜଣ ସଦସ୍ୟ ଅସନ୍ତୋଷ ବ୍ୟକ୍ତ କରିଥିଲେ। ଏପରି ଅନୁଗୋଳ ଜିଲାକୁ ସେମାନଙ୍କୁ ବିସ୍ଥାପିତ ନ କରି କଟକ ଜିଲାରେ ରଖିବାକୁ ଦାବି କରିଥିଲେ। ଉକ୍ତ ଦାବିକୁ ବନ ଅଧିକାରୀ ଗ୍ରହଣ କରି ନ ଥିଲେ। ଏହି ସଭାରେ ଗ୍ରାମ ସଭାପତି ନଟବର ବେହେରା, ସମ୍ପାଦକ ବିଦେଶୀ ନାଏକ, କୋଷାଧ୍ୟକ୍ଷ ପହଲି ପଧାନ, ଦନେଇ ଯାନୀ, ସୁଶାନ୍ତ ପଧାନ, ବିକ୍ରମ ପଧାନ, ଜୟ ଯାନୀ, ସନାତନ ବେହେରା, ରମେଶ ଯାନୀ, ନାରଣ ଦାସ,ବିଷ ବେହେରା, ନବିନା ବେହେରା, ଆଶା ଦାସ,ପ୍ରଭାତୀ ବେହେରା, ଅଞ୍ଜଳି ବେହେରା, ନିଶା ବେହେରା ଙ୍କ ସହିତ ଗ୍ରାମର ସମସ୍ତ ସଦସ୍ୟ ଉପସ୍ଥିତ ଥିଲେ।