ଜଗତ୍ସିଂହପୁର ଅଫିସ,୧୨ା୧୨: ଜଗତ୍ସିଂହପୁର ଜିଲାରେ ପ୍ରତିବର୍ଷ ଶହ ଶହ ସଂଖ୍ୟାରେ ଚାରା ରୋପଣ କରାଯାଉଛି। ବନ ବିଭାଗ ପକ୍ଷରୁ ଏନେଇ ଲୋକଙ୍କ ମଧ୍ୟରେ ସଚେତନତା ସୃଷ୍ଟି କରାଯାଉଥିବା କୁହାଯାଉଛି। ମାତ୍ର ଏସବୁ କେବଳ ପ୍ରହସନ ପାଲଟିଥିବା ପରି ମନେହେଉଛି। ଜିଲାର ଅନେକ ସ୍ଥାନରେ ବାରମ୍ବାର ଜଙ୍ଗଲ କାଟି ନଷ୍ଟ କରି ଦିଆଯାଉଥିବାବେଳେ ବିଭାଗ ପକ୍ଷରୁ କୌଣସି କାର୍ଯ୍ୟାନୁଷ୍ଠାନ ନିଆଯାଉନାହିଁ। ଏନେଇ ସାଧାରଣରେ ଅସନ୍ତୋଷ ପ୍ରକାଶ ପାଇଛି।
କୁଜଙ୍ଗ ରେଞ୍ଜ୍ ଅଧୀନ ବାଲିକଣୀ ଅଞ୍ଚଳରେ ଏହାର ଉଦାହରଣ ଦେଖିବାକୁ ମିଳିଛି। ଏଠାରେ ଥିବା ସରକାରୀ ଜାଗାରେ ଜଙ୍ଗଲ ସୃଷ୍ଟି କରିବା ଉଦ୍ଦେଶ୍ୟରେ କୁଜଙ୍ଗ ବନ ବିଭାଗ ତରଫରୁ ୨୦୦୦ ମସିହାରେ ଅନେକ ଚାରା ରୋପଣ କରାଯାଇଥିଲା। ଏସବୁ ଚାରା ବଢ଼ି ବୃକ୍ଷରେ ପରିଣତ ହେବା ପରେ ଏହାର ସୁରକ୍ଷା ପାଇଁ ବିଭାଗ ପକ୍ଷରୁ କୌଣସି ପଦକ୍ଷେପ ନିଆଯାଇ ନ ଥିଲା। ବିଭାଗୀୟ ଅବହେଳା କାରଣରୁ ଲୋକେ ଗଛ କାଟି ଜଙ୍ଗଲ ନଷ୍ଟ କରି ଦେଇଥିଲେ।
ପୁନର୍ବାର ପଞ୍ଚାୟତ ଓ ଗ୍ରାମବାସୀଙ୍କ ତରଫରୁ ଚାରା ରୋପଣ କରାଯାଇ ନୂତନ ଜଙ୍ଗଲ ସୃଷ୍ଟି କରାଯାଇଥିଲା। ମାତ୍ର ପୁଣିଥରେ ବନ ବିଭାଗର ଅବହେଳା ଯୋଗୁ ଜଙ୍ଗଲ ନଷ୍ଟ ହୋଇଯାଇଥିଲା। ୨୦୧୫-୧୬ରେ ଉକ୍ତ ଅଞ୍ଚଳର ୧୫ ହେକ୍ଟର ଜମିରେ ଝାଉଁଜଙ୍ଗଲ କରାଯାଇଛି। ବର୍ତ୍ତମାନ ସେହି ଜଙ୍ଗଲକୁ କେତେଜଣ ଖଳପ୍ରକୃତ୍ତିର ଲୋକ ଗଛ କାଟିନେଇ ନଷ୍ଟ କରିଦେବାକୁ ବସିଲେଣି। ଲକ୍ଷ ଲକ୍ଷ ଟଙ୍କାର ଚାରା ରୋପଣ କରାଯାଇ ଜଙ୍ଗଲ ସୃଷ୍ଟି କରାଯାଉଥିଲେ ମଧ୍ୟ ଏହା ବାରମ୍ବାର ଧ୍ୱଂସ ପାଇଚାଲିଛି। ବନ ବିଭାଗକୁ ଅଭିଯୋଗ ନିମନ୍ତେ ଫୋନ କରାଗଲେ ରେଞ୍ଜର ଏବଂ ଫରେଷ୍ଟର ନିଜର ଫୋନ୍ ବନ୍ଦ କରିଦେଉଛନ୍ତି। ଲିଖିତ ଅଭିଯୋଗ କରାଗଲେ ମଧ୍ୟ କୌଣସି କାର୍ଯ୍ୟାନୁଷ୍ଠାନ ନିଆଯାଉନାହିଁ ବୋଲି ହଂସୁରା ପଞ୍ଚାୟତ ସରପଞ୍ଚ ରବିନାରାୟଣ ଦାସଙ୍କ ସମେତ ଅନୋଲିପାଟଣା ଗ୍ରାମର ବିଜ୍ଞାନ ପ୍ରସାଦ ସାମନ୍ତରାୟ, କ୍ଷୀରୋଦ ଚନ୍ଦ୍ର ଦାସ, ବିଚିତ୍ରାନନ୍ଦ ଦାସ ଓ ବାଲିକଣୀର ଧରଣୀଧର ଚୌଧୁରୀ ପ୍ରମୁଖ ଅଭିଯୋଗ କରିଛନ୍ତି। ତୁରନ୍ତ ଏନେଇ କାର୍ଯ୍ୟାନୁଷ୍ଠାନ ନେବା ସହ ଜଙ୍ଗଲ ସୁରକ୍ଷା ପାଇଁ ପଦକ୍ଷେପ ନେବାକୁ ସେମାନେ ଜିଲାପାଳ, ଡିଏଫ୍ଓଙ୍କ ନିକଟରେ ଦାବି କରିଛନ୍ତି। ଏ ସମ୍ପର୍କରେ ରେଞ୍ଜ୍ ଅଫିସର ରଞ୍ଜନ କୁମାର ମିଶ୍ରଙ୍କ ମୋବାଇଲ ନମ୍ବରରେ ଯୋଗାଯୋଗ କରିବାକୁ ଉଦ୍ୟମ କରାଯାଇଥିଲେ ମଧ୍ୟ ତାହା ସମ୍ଭବ ହୋଇ ନ ଥିଲା।