ଖୋର୍ଦ୍ଧା ଅଫିସ,୨୬।୨: ରାଜ୍ୟରେ ସାଇବର ଠକେଇ ଦିନକୁ ଦିନ ବଢ଼ିବାରେ ଲାଗିଛି। ଖୋର୍ଦ୍ଧା ସଦର ଥାନା ଅଧୀନ ବାଜପୁର ଗ୍ରାମର ଚାରୁଲତା ଦାଶ ବ୍ୟାଙ୍କ ଠକେଇର ଶିକାର ହୋଇଛନ୍ତି। ତାଙ୍କ ଆକାଉଣ୍ଟରୁ ଏକ ମିନଟ୍ ମଧ୍ୟରେ ୨ଟି କିସ୍ତିରେ ୧ଲକ୍ଷ ୮ହଜାର ଟଙ୍କା ଉଠାଯାଇଛି ବୋଲି ଗୁରୁବାର ଥାନାରେ ଅଭିଯୋଗ କରିଛନ୍ତି। ସୂଚନା ମୁତାବକ, ବାଜପୁରସ୍ଥିତ ଏକ ବ୍ୟାଙ୍କରେ ଚାରୁଲତାଙ୍କ ଆକାଉଣ୍ଟ ରହିଛି। ବୁଧବାର ଅପରାହ୍ନ ସାଢେ ୫ଟାରେ ସେ ପ୍ରତ୍ୟେକ ଦିନ ଭଳିି ସନ୍ଧ୍ୟାଧୂପରେ ବ୍ୟସ୍ତ ଥିଲେ। ଏହି ସମୟରେ ତାଙ୍କ ମୋବାଇଲ ନମ୍ବରକୁ +୯୧୮୯୬୭୨୯୯୮୯୨ ନମ୍ବରରୁ କଲ୍ ଆସିଥିଲା। ବ୍ୟାଙ୍କରୁ କହୁଥିବା କହି ତାଙ୍କୁ ମୋବାଇଲକୁ ଯାଇଥିବା ଏସ୍ଏମ୍ଏସ୍ର ନମ୍ବର ମାଗିଥିଲେ। ବ୍ୟସ୍ତତା କାରଣରୁ ଚାରୁଲତା ତାଙ୍କୁ ନମ୍ବର କହିଦେଇଥିଲେ। ତାଙ୍କ ଆକାଉଣ୍ଟରୁ ୧ଲକ୍ଷ ଟଙ୍କା ଉଠାଯାଇଥିବା ନେଇ ୫ଟା ୩୮ରେ ମେସେଜ୍ ଆସିଥିଲା। ପରେ ପୁଣି ୮ହଜାର ଉଠାଯାଇଥିବା ନେଇ ମେସେଜ୍ ଆସିଥିଲା। ଏତେ ଟଙ୍କା ଉଠାଯିବା ନେଇ ସେ ଘଟଣା ସମ୍ପର୍କରେ ପରିବାର ଲୋକଙ୍କୁ ଜଣାଇଥିଲେ। ପରେ ଏନେଇ ଥାନାରେ ଲିଖିତ ଅଭିଯୋଗ କରିଛନ୍ତି। ପ୍ରକାଶ ଯେ, ଗତ ଜାନୁୟାରୀରେ ଜଣେ କାଠଗୋଲା ବ୍ୟବସାୟୀ ୧୬ଲକ୍ଷ ଟଙ୍କାର ସାଇବର ଠକେଇର ଶିକାର ହୋଇଥିଲେ। ଟଙ୍କା ଫେରି ପାଇବା ଲାଗି ବିଭିନ୍ନ ସ୍ଥାନରେ ଅଭିଯୋଗ କରି ବିଫଳ ହେବା ପରେ ଜିଲାପାଳଙ୍କ କାର୍ଯ୍ୟାଳୟ ଆଗରେ ଆତ୍ମହୁତି ଉଦ୍ୟମ କରିଥିଲେ।