ନୂଆଦିଲ୍ଲୀ,୨୮।୧୧- କରୋନା ମହାମାରୀ ସମୟରେ ରିଜର୍ଭ ବ୍ୟାଙ୍କ ମୋରାଟୋରିୟମ ଘୋଷଣା କରିଥିଲା। ଏହାର ଅବଧି ଅଗଷ୍ଟ ୩୧ ଯାଏ ରହିଥିଲା। ମୋଟ ୬ ମାସ ଯାଏ ଏହା ଲାଗୁ ହୋଇଥିଲା। ଏହି ସମୟରେ କିଛି ବ୍ୟାଙ୍କ ସୁଧ ଉପରେ ସୁଧ ଲାଗୁ କରିଥିବା ଦେଖାଯାଇଥିଲା। ସୁପ୍ରିମକୋର୍ଟରେ ଏ ନେଇ ପିଟିଶନ ଫାଇଲ କରାଯାଇଥିଲା। ୨ କୋଟି ଟଙ୍କାର ଋଣର ସୁଧ ଉପରେ ସୁଧ ଲାଗୁ ହେବ ନାହିଁ ବୋଲି ଶୁଣାଣି ବେଳେ ସରକାର ସୁପ୍ରିମକୋର୍ଟଙ୍କୁ କହିଥିଲେ। ୮ ବର୍ଗର ଋଣ ଉପରେ ଏହାକୁ କାର୍ଯ୍ୟକାରୀ କରାଇବା ନେଇ ସମସ୍ତ କାର୍ଯ୍ୟପନ୍ଥା ଗ୍ରହଣ କରିବାକୁ ସୁପ୍ରିମକୋର୍ଟ ଶୁକ୍ରବାର ସରକାରଙ୍କୁ ନିର୍ଦ୍ଦେଶ ଦେଇଛନ୍ତି। ଜଷ୍ଟିସ ଅଶୋକ ଭୂଷଣଙ୍କ ଅଧ୍ୟକ୍ଷତାରେ ଗଠିତ ଖଣ୍ଡପୀଠ କହିଛନ୍ତି, କରୋନା ଯୋଗୁ କେବଳ ଲୋକଙ୍କର ସ୍ବାସ୍ଥ୍ୟ ସମସ୍ୟା ଉପୁଜିନାହିଁ ବରଂ ଏହା ଆର୍ଥତ୍କ ମେରୁଦଣ୍ଡକୁ ଦୋହଲାଇ ଦେଇଛି। ଏଣୁ ଏହାକୁ ବିଚାର କରି ସରକାର ପଦକ୍ଷେପ ନେବାର ଆବଶ୍ୟକତା ରହିଛି। ଚକ୍ରବୃଦ୍ଧି ସୁଧ ଛାଡ ହେବାକୁ ଥିବା ୮ କ୍ଷେତ୍ର ମଧ୍ୟରେ ଅଣୁ, କ୍ଷୁଦ୍ର ଏବଂ ମଧ୍ୟମ ଉଦ୍ୟୋଗ(ଏମ୍ଏସ୍ଏମ୍ଇ), ଶିକ୍ଷା, ହାଉସିଂ, କଞ୍ଜ୍ୟୁମର ଡ୍ୟୁରେବଲ, କ୍ରେଡିଟକାର୍ଡ, ଅଟୋମୋବାଇଲ, ପର୍ସନାଲ ଏବଂ କଞ୍ଜପଶନ ଋଣ ରହିଥିବା ଜଣାପଡିଛି।