ଚେନ୍ନାଇ,୩୦।୧୧: ଶନିବାର ତାମିଲନାଡୁ ଏବଂ ପୁଡୁଚେରୀ ନିକଟରେ ସାଇକ୍ଲୋନ ଫେଙ୍ଗାଲ ସ୍ଥଳଭାଗ ଛୁଇଁଛି। ଭାରତୀୟ ପାଣିପାଗ ବିଭାଗ ଅନୁଯାୟୀ, ଏହି ଘୂର୍ଣ୍ଣିବଳୟ ଆସନ୍ତା ତିନିରୁ ଚାରି ଘଣ୍ଟା ମଧ୍ୟରେ ତାମିଲନାଡୁ ଏବଂ ପୁଡୁଚେରୀ ଉପକୂଳ ମଧ୍ୟ ଦେଇ ଅତିକ୍ରମ କରିବ। ଏବେ, ଏହି ତିନିରୁ ଚାରି ଘଣ୍ଟା ବେଶ ଗୁରୁତ୍ୱପୂର୍ଣ୍ଣ ହୋଇପାରେ। ଘୂର୍ଣ୍ଣିବଳୟ ଯୋଗୁଁ ଏହି ଅଞ୍ଚଳରେ ପ୍ରବଳ ବର୍ଷା, ପ୍ରବଳ ପବନ ଓ ଭୂସ୍ଖଳନ ହୋଇଥିଲା। ତେବେ ଏହାପୂର୍ବରୁ ଚେନ୍ନାଇରେ ଟ୍ରେନ ସେବା, ବିମାନବନ୍ଦରରେ ବିମାନ ଉଡ଼ାଣ ବାତିଲ କରାଯାଇଥିଲା ଏବଂ ଲୋକଙ୍କୁ ମଧ୍ୟ ସତର୍କ ସୂଚନା ଜାରି କରାଯାଇଥିଲା। ପ୍ରବଳ ବର୍ଷା ହେତୁ ସହରର ଅନେକ ଡାକ୍ତରଖାନା ଏବଂ ଘର ଜଳବନ୍ଦୀ ହୋଇ ରହିଛି।
ଆଞ୍ଚଳିକ ପାଣିପାଗ କେନ୍ଦ୍ରର ଅତିରିକ୍ତ ମହାନିର୍ଦ୍ଦେଶକ ଏସ ବାଲାଚନ୍ଦ୍ରନ କହିଛନ୍ତି ଯେ ଶନିବାର ସା ପ୍ରାୟ ୫ଟା ୩୦ରେ ଏହି ଘୂର୍ଣ୍ଣିବଳୟର ଲ୍ୟାଣ୍ଡଫଲ ପ୍ରକ୍ରିୟା ଆରମ୍ଭ ହୋଇଛି। ପୁଡୁଚେରୀ ଅଞ୍ଚଳ ନିକଟରେ ଏହା ଲ୍ୟାଣ୍ଡଫଲ କରୁଥିବା ସେ ନିଶ୍ଚିତ କରିଛନ୍ତି ଏବଂ ପ୍ରାୟ ଚାରି ଘଣ୍ଟା ମଧ୍ୟରେ ଏହି ପ୍ରକ୍ରିୟା ଶେଷ ହେବ ବୋଲି ଆକଳନ କରିଛନ୍ତି। ଘୂର୍ଣ୍ଣିବଳୟ ପୁଡୁଚେରୀରେ ପହଞ୍ଚିବା ପୂର୍ବରୁ କର୍ତ୍ତୃପକ୍ଷ ମଧ୍ୟ ଏକ ଚେତାବନୀ ଦେଇଛନ୍ତି। ଶନିବାର ପ୍ରବଳ ବର୍ଷା ହେତୁ ପ୍ରାୟ ୧୨ ଲକ୍ଷ ଲୋକ ସତର୍କ ରହିବାକୁ ଏସଏମଏସ ଆଲର୍ଟ ମିଳିଛି।
ଘୂର୍ଣ୍ଣିବଳୟ ଯୋଗୁଁ ରାଜ୍ୟର ଅନେକ ଜିଲାରେ ସ୍କୁଲ ଓ କଲେଜ ବନ୍ଦ ରହିଛି। ଏହି କାରଣରୁ ଶହ ଶହ ଲୋକ ସୁରକ୍ଷିତ ସ୍ଥାନକୁ ଯାଇଛନ୍ତି। ପୁଡୁଚେରୀର ତଳ ଅଞ୍ଚଳରେ ରହୁଥିବା ଲୋକଙ୍କୁ ମଧ୍ୟ ସେଠାରୁ ସ୍ଥାନାନ୍ତର କରାଯାଇଛି। ଲୋକଙ୍କୁ ଅଧିକ ସତର୍କ ରହିବାକୁ ପ୍ରଶାସନ କହିଛି।
ଆନ୍ଧ୍ରପ୍ରଦେଶର ଦକ୍ଷିଣ ଉପକୂଳ ଏବଂ ରାୟଲସିମା ଅଞ୍ଚଳରେ ଅନେକ ସ୍ଥାନରେ ହାଲୁକା କିମ୍ବା ମଧ୍ୟମ ବର୍ଷା କିମ୍ବା ବଜ୍ରପାତ ହେବାର ପୂର୍ବାନୁମାନ କରାଯାଇଛି। ନେଲୋର, ତିରୁପତି ଏବଂ ଚିତ୍ତୋର ଜିଲା ସମେତ ଆଉ କିଛି ସ୍ଥାନରେ ପ୍ରବଳ ବର୍ଷା ହେବାର ପୂର୍ବାନୁମାନ କରାଯାଇଛି।