ମୁମ୍ବାଇ,୧୫ା୨: ତେଲଙ୍ଗାନାର ହାଇଦ୍ରାବାଦ ନିବାସୀ ମାନସା ବାରାଣସୀ(୨୩) ଭିଏଲ୍ସିସି ଫେମିନା ମିସ୍ ଇଣ୍ଡିଆ ୱାଲର୍ଡ ୨୦୨୦ ମୁକୁଟ ପିନ୍ଧିଛନ୍ତିି। ମୁମ୍ବାଇରେ ବୁଧବାର ଫେମିନା ମିସ୍ ଇଣ୍ଡିଆ ୨୦୨୦ର ଗ୍ରାଣ୍ଡ ଫିନାଲେ ଆୟୋଜିତ ହୋଇଯାଇଛି। ଏଥିରେ ଉତ୍ତର ପ୍ରଦେଶର ମାନ୍ୟା ସିଂ ରନର ଅପ୍ ଓ ହରିୟାଣାର ମନିକା ଶେୟୋକନ୍ଦ ମିସ୍ ଗ୍ରାଣ୍ଡ ଇଣ୍ଡିଆ ୨୦୨୦ ହୋଇଛନ୍ତି। ମନିକା କେମିକାଲ ଇଞ୍ଜିନିୟରିଂ ଚାକିରି ଛାଡ଼ି ମଡେଲିଂ କରୁଥିବାବେଳେ ଏହି ସଫଳତା ହାସଲ କରିବାରେ ସବୁଠୁ ସଂଘର୍ଷପୂର୍ଣ୍ଣ ଥିଲା ମାନ୍ୟା ସିଂଙ୍କ ଯାତ୍ରା। ଉତ୍ତର ପ୍ରଦେଶର ଦେଓରିୟା ଜିଲା ନିବାସୀ ମାନ୍ୟାଙ୍କୁ କାଲି ଯାଏ କେହି ଜାଣି ନ ଥିଲେ। କିନ୍ତୁ ଆଜି ତାଙ୍କ ବିଷୟରେ ସମସ୍ତେ ଜାଣିବାକୁ ଆଗ୍ରହୀ। ମାନ୍ୟାଙ୍କ ବାପା ଓମ୍ପ୍ରକାଶ ସିଂ ମୁମ୍ବାଇରେ ଅଟୋ ରିକ୍ସା ଚଳାନ୍ତିି। ମା’ ମନୋରମା ଦେବୀଙ୍କ ଏକ ଟେଲର ଦୋକାନ ଅଛି। ନିଜ ସଂଘର୍ଷର କାହାଣୀ ବୟାନ କରିବାକୁ ଯାଇ ମାନ୍ୟା କହନ୍ତି, ଅତୀତରେ ସେ ଅନେକ ରାତି ନ ଖାଇ ନ ଶୋଇ ବିତାଇଛନ୍ତି। ପିଲାବେଳୁ କାମ କରିବାକୁ ପଡ଼ିଥିବାରୁ ସେ ସ୍କୁଲ ମାଡ଼ିପାରି ନ ଥିଲେ। ପରେ ତାଙ୍କ ପାଠପଢ଼ା ପାଇଁ ମା’ ନିଜ ଗହଣା ବନ୍ଧକ ପକାଇଥିଲେ। ଜଣେ ନିଜ ପାଇଁ ଓ ନିଜର ସ୍ବପ୍ନ ପ୍ରତି ପ୍ରତିଶ୍ରୁତିବଦ୍ଧ ହେଲେ ସବୁକିଛି ସମ୍ଭବ। ଦୁନିଆକୁ ଏହାର ପ୍ରମାଣ ଦେବା ପାଇଁ ସେ ମିସ୍ ଇଣ୍ଡିଆ ପିଜେଣ୍ଟରେ ଭାଗନେବାକୁ ନିଷ୍ପତ୍ତି ନେଇଥିବା ସେ କହିଛନ୍ତି।