ନୂଆଦିଲ୍ଲୀ,୨୬।୧: ଭାରତୀୟ ଦଳର ଷ୍ଟାର୍ ଓପନର୍ ଶିଖର ଧାୱନ ସୋସିଆଲ ମିଡିଆରେ ବହୁତ ସକ୍ରିୟ। ସେ ପ୍ରାୟତଃ ଫଟୋ-ଭିଡିଓ ଶେୟାର୍ କରନ୍ତି। ପ୍ରଶଂସକମାନେ ମଧ୍ୟ ଏହାକୁ ପସନ୍ଦ କରନ୍ତି। ନିକଟରେ ସେ ନିଜ ବାପାଙ୍କ ସହ ଇନଷ୍ଟାଗ୍ରାମରେ ଏକ ଭିଡିଓ କ୍ଲିପ ଶେୟାର କରିଛନ୍ତି। ଭିଡିଓରେ ବାପା ତାଙ୍କୁ ଚାପୁଡ଼ା ମାରିବା ଦେଖିବାକୁ ମିଳିଛି। ଏହା ଏକ ମଜାଦାର ଭିଡିଓ କ୍ଲିପ। ଏହି ଭିଡିଓକୁ ଏପର୍ଯ୍ୟନ୍ତ ୩ ଲକ୍ଷରୁ ଅଧିକ ଉପଭୋକ୍ତା ପସନ୍ଦ କରିଛନ୍ତି। ଏଥିସହିତ ୩ ହଜାରରୁ ଅଧିକ କମେଣ୍ଟ ଦିଆଯାଇଛି।
ଭିଡିଓରେ ଦେଖାଯାଉଛି ଯେ ଧାୱନଙ୍କ ବାପା ତାଙ୍କ ରୁମ୍ରୁ ବାହାରି ପଞ୍ଜାବୀରେ ପଚାରିଛନ୍ତି – ଆପଣ ଭିତରକୁ ବୁଲିବାକୁ ଆସିଛନ୍ତି କି? ଏହା ଉପରେ, ଧାୱନ ମଜା ସହିତ ପଚାରନ୍ତି – ୱାରେଣ୍ଟ ଆଣିଛନ୍ତି, କିଛି ପ୍ରମାଣ ଅଛି କି? ପରବର୍ତ୍ତୀ ମୁହୂର୍ତ୍ତରେ ତାଙ୍କ ବାପା ତାଙ୍କୁ ଚାପୁଡ଼ା ମାରିବା ସହ ତାଙ୍କୁ ରୁମ୍ ଭିତରକୁ ଠେଲି ନେଉଛନ୍ତି। ଧାୱନ ତାଙ୍କ ଗାଲରେ ହାତ ରଖି ଆଶ୍ଚର୍ଯ୍ୟ ହୋଇ ରୁମ୍ ଭିତରକୁ ଚାଲିଯାଆନ୍ତି। ଧାଓ୍ବନ ଏହି ଭିଡିଓ ଶେୟାର କରି ଲେଖିଛନ୍ତି, ବାପ୍, ବାପ୍ ହୋତା ହୈ।
ଦକ୍ଷିଣ ଆଫ୍ରିକା ବିପକ୍ଷ ଦିନିକିଆ ସିରିଜର ୨ଟି ମ୍ୟାଚରେ ଶିଖର ଧାୱନ ଅର୍ଦ୍ଧଶତକ ହାସଲ କରିଛନ୍ତି। ସେ ପାରଲରେ ପ୍ରଥମ ଦିନିକିଆରେ ୭୯ ରନ ସଂଗ୍ରହ କରିଥିବାବେଳେ କେପଟାଉନରେ ତୃତୀୟ ଦିନିକିଆରେ ସେ ୬୧ ରନ ସଂଗ୍ରହ କରିଥିଲେ। ତେବେ ଭାରତୀୟ ଦଳ ସିରିଜରେ କୌଣସି ଦିନିକିଆ ଜିତି ନ ପାରି ୦-୩ରେ ହାରି ଯାଇଥିଲା।