ବାରିପଦା ଅଫିସ, ୯ା୧୧-ବାରିପଦା ମ୍ୟୁନସିପାଲିଟି ଅଧୀନ ୯ନଂ. ୱାର୍ଡରେ ବସବାସ କରୁଥିବା ଆଦିବାସୀ ସମ୍ପ୍ରଦାୟର ଛାତ୍ରୀଛାତ୍ରମାନେ ସରକାରୀ ସୁବିଧାରୁ ବଞ୍ଚିିତ ହେଉଛନ୍ତି। ବାସସ୍ଥାନ ପ୍ରମାଣପତ୍ର ନ ଥିବାରୁ ଆଶ୍ରମ ବିଦ୍ୟାଳୟରେ ନାମ ଲେଖାଇ ନ ପାରି ସରକାରୀ ସ୍କୁଲରେ ପାଠପଢୁଛନ୍ତିା ଫଳରେ ଅଧାରୁ ପାଠପଢ଼ା ଛାଡ଼ି ପରିବାର ସହ ଦାଦନ ଖଟିବାକୁ ବାହାର ରାଜ୍ୟକୁ ଯାଉଛନ୍ତି। ଏନେଇ ୱାର୍ଡବାସୀ ସୋମବାର ଏକ ବୈଠକରେ ଏକାଠି ହୋଇ ଆସନ୍ତା ପଞ୍ଚାୟତ ନିର୍ବାଚନରେ ୱାର୍ଡ ମଧ୍ୟକୁ କୌଣସି ନେତାଙ୍କୁ ପୁରାଇ ଦିଆଯିବ ନାହିଁ ବୋଲି କଡ଼ା ଚେତାବନୀ ଦେଇଛନ୍ତି ା
ବୁଢ଼ାବଳଙ୍ଗ ନଦୀ ତଟବର୍ତ୍ତୀ ଅଞ୍ଚଳରେ ଅବସ୍ଥିତ ଉକ୍ତ ୱାର୍ଡରେ ୫୫ଟି ପରିବାରର ୩ଶହରୁ ଊର୍ଦ୍ଧ୍ୱ ଲୋକ ବସବାସ କରନ୍ତି। ସେଠାରେ ସେମାନେ ୪୫ବର୍ଷ ଧରି ରହିବା ପରେ ମଧ୍ୟ ବାସସ୍ଥାନ ପ୍ରମାଣପତ୍ର ମିଳିପାରୁ ନ ଥିବା ୱାର୍ଡବାସୀ ମାଳତୀ ସିଂ, ମୀନତୀ ସିଂ, ସଞ୍ଜୁଲତା ନାଏକ ପ୍ରମୁଖ ପ୍ରକାଶ କରିଛନ୍ତି। ଏ ସଂକ୍ର୍ରାନ୍ତରେ ବାରମ୍ବାର ପ୍ରଶାସନକୁ ଅବଗତ କରିବା ପରେ ମଧ୍ୟ ଦୀର୍ଘ ବର୍ଷ ଧରି କେବଳ ପ୍ରତିଶ୍ରୁତି ମିଳିଛି। ମାଟ୍ରିକ ପାସ୍ ପରେ ଆବଶ୍ୟକ ପ୍ରମାଣପତ୍ର ଅଭାବରୁ ଛାତ୍ରୀଛାତ୍ରମାନେ ଉଚ୍ଚ ଶିକ୍ଷାରୁ ବଞ୍ଚିତ ହେଉଥିବା ଅଭିଭାବକ ଲକ୍ଷ୍ମଣ ମୁଣ୍ଡା, ରାଜୁ ସିଂ, ମଙ୍ଗଲ ସିଂ ପ୍ରମୁଖ କହିଛନ୍ତି। ସେହିପରି ପ୍ରତିବର୍ଷ ନଦୀର ଜଳସ୍ତର ବୃଦ୍ଧି ପାଇ ଅନେକ ଘର ଭାଙ୍ଗି ଯାଇଥିବା ବେଳେ ପଟ୍ଟା ଅଭାବରୁ କ୍ଷତିଗ୍ରସ୍ତଙ୍କୁ ବିଜୁ ପକ୍କା ଘର କିମ୍ବା ପ୍ରଧାନମନ୍ତ୍ରୀ ଆବାସ ମିଳିପାରୁନି। ନିରାପଦ ଛାତ ତଳେ ରହିବା ପାଇଁ ତହସିଲ କାର୍ଯ୍ୟାଳୟ ଓ ମ୍ୟୁନିସିପାଲିଟି ଅଫିସ ଦୌଡ଼ି ଦୌଡ଼ି ନୟାନ୍ତ ହେବା ପରେ ଭାଗ୍ୟକୁ ଆଦରି ସେମାନେ ପଡ଼ି ରହିଥିବା ମେଘନାଦ ସିଂ, ଦୁର୍ଗାମଣି ସିଂ ଓ ଲକ୍ଷ୍ମୀ ସିଂ ପ୍ରକାଶ କରିଛନ୍ତି।