ପାରଳାଖେମୁଣ୍ଡି,୪ା୧୦(ଡି.ଏନ୍.ଏ.):କିଛିବର୍ଷ ତଳେ କଳାହାଣ୍ଡି ଜିଲାର ଜଣେ ଦାଦନ ଶ୍ରମିକଙ୍କ ହାତ କାଟି ଦିଆଯାଇଥିଲା। ଗଜପତି ଜିଲା ଅଡ଼ବା ଥାନା କଲବା ଗାଁର ଶାଙ୍କ ମୁର୍ମୁଙ୍କ କ୍ଷେତ୍ରରେ ଏହାର ପୁନରାବୃତ୍ତି ହୋଇଛି। ଶାଙ୍କଙ୍କୁ ୪ ଜଣ ଦଲାଲ ଦାଦନ ଖଟିବାକୁ ଡାକି ନେଇ ପଇସା ନ ଦେଇ ଗୋଟିଏ ଗୋଡ଼ ଓ ହାତ ପାପୁଲି କାଟି ଦେଇଛନ୍ତି। ବର୍ବରତାର ସୀମା ଟପିଥିବା ଦଲାଲ ଶାଙ୍କଙ୍କୁ ତାଙ୍କ ଗାଁରେ ଛାଡ଼ି ଦେବା ସହ ଥାନାରେ ଜଣାଇଲେ ହତ୍ୟା କରିଦେବେ ବୋଲି ଧମକ ଦେଇଛନ୍ତି।
କଲବା ଗାଁର ଶାଙ୍କ ବହୁ ଅଭାବରେ ଚଳୁଥିଲେ ମଧ୍ୟ ଦାଦନ ଖଟିିବାକୁ ବାହାର ରାଜ୍ୟକୁ ଯିବାକୁ ଚାହୁଁ ନ ଥିଲେ। ୧୩ ତାରିଖରେ ନିକଟସ୍ଥ ଗାଁର ୪ ଯୁବକ ଆସି ତାଙ୍କୁ ଉତ୍ତରପ୍ରଦେଶର ଏକ କମ୍ପାନୀରେ କାମ କଲେ ମାସିକ ୨୦ ହଜାର ଟଙ୍କା ମିଳିବ ବୋଲି କହିଥିଲେ। ସେମାନେ ବିଭିନ୍ନ ପ୍ରକାର ପ୍ରଲୋଭନ ଦେଖାଇବାରୁ ଶାଙ୍କ ଯିବାକୁ ରାଜି ହୋଇଥିଲେ। ଦଲାଲଙ୍କ କଥାରେ ଅନ୍ୟ କେତେଜଣ ଯୁବକଙ୍କ ସହ ଉତ୍ତରପ୍ରଦେଶ ଯାଇ ଏକ ସିମେଣ୍ଟ କମ୍ପାନୀରେ କାମ କଲେ। ୨ ଦିନ କାମ କରିବା ପରେ ନିଜେ ଚଳିବା ପାଇଁ ଦଲାଲଙ୍କୁ ତାଙ୍କ ପାରିଶ୍ରମିକ ମାଗିଥିଲେ। ଦଲାଲ ଟଙ୍କା ଦେବା ବଦଳରେ ଶାଙ୍କଙ୍କୁ ମାର୍ପିଟ କରିଥିଲେ। ଏପରିକି ତାଙ୍କର ବାମ ଗୋଡ଼ ଓ ଡାହାଣ ହାତପାପୁଲି କାଟି ଦେଇଥିଲେ। ଏହାପରେ ତାଙ୍କୁ ଝାନ୍ସିର ଏକ ମେଡିକାଲକୁ ନେଇଥିଲେ। ସେଠାରେ ୨ ଦିନ ପକାଇ ରଖିବା ପରେ ଗତ ୩୦ ତାରିଖରେ ଆଣି ଗାଁରେ ଛାଡ଼ି ଦେଇ ପଳାଇଛନ୍ତି। ଥାନାରେ କୌଣସି ଅଭିଯୋଗ ନ କରିବାକୁ ଦଲାଲ୍ ଧମକ ଦେଇଛନ୍ତି। ସେପଟେ ଚିକିତ୍ସା ପାଇଁ ଅର୍ଥ ଅଭାବରୁ କେଉଁଆଡ଼େ ନେଇ ନ ପାରି ସ୍ତ୍ରୀ ସୁଶୀଳା ଚେରମୂଳି ଔଷଧ ଆଣି ଦେଉଛନ୍ତି। ସ୍ବାମୀ ଅସହ୍ୟ ଯନ୍ତ୍ରଣାରେ ଛଟପଟ ହେବାରୁ ଆମ୍ବୁଲାନ୍ସ ଡକାଇ ତାଙ୍କୁ ମୋହନା ଡାକ୍ତରଖାନାକୁ ନେଇଛନ୍ତି। ସୁଶୀଳା କହିଛନ୍ତି ଯେ, ସ୍ବାମୀ ଫୋନ କରି ଘରକୁ ପ୍ରଥମେ ୧୦ ହଜାର ଟଙ୍କା ପଠାଇବେ ବୋଲି କହିଥିଲେ। ଏହା ପରଦିନ ତାଙ୍କ ହାତଗୋଡ଼ କଟି ଯାଇଥିବା ସ୍ବାମୀଙ୍କୁ ଗାଁରୁ ନେଇଥିବା ଲୋକ ଜଣକ ଫୋନରେ ଜଣାଇଥିଲେ। ଗାଁରେ ଛାଡିବା ବେଳେ ତାଙ୍କୁ ଏ ସମ୍ପର୍କରେ ପଚାରିବାରୁ ଶାଙ୍କ ଟ୍ରେନ ଲାଇନରେ କଟି ଗୋଡ ହରାଇଥିବା କହି ଦଲାଲ ଜଣକ ପଳାଇଥିଲେ ବୋଲି ସୁଶୀଳା କହିଛନ୍ତି। ତେବେ ଏ ନେଇ ପୋଲିସରେ ଅଭିଯୋଗ ହୋଇ ନ ଥିବା ଗଜପତି ଆରକ୍ଷୀ ଅଧୀକ୍ଷକ ଜୟରାମ ଶତପଥୀ କହିଛନ୍ତି। ସୂଚନାଯୋଗ୍ୟ, କିଛିବର୍ଷ ପୂର୍ବରୁ କାଶୀନଗର ଏବଂ ଆର. ଉଦୟଗିରି ବ୍ଲକର ଦାଦନ ଶ୍ରମିକ ରାଜ୍ୟ ବାହାରକୁ ଯାଇ ଦୁର୍ଘଟଣାରେ ପ୍ରାଣ ହରାଇଥିବା ନଜିର ରହିଛି। ଏପରିକି ୩ ନାବାଳକଙ୍କ ମଧ୍ୟ ଜୀବନ ଯାଇଛି। ସାମାଜିକ କର୍ମୀ ଓ ବୁଦ୍ଧିଜୀବୀମାନେ ଦଲାଲଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ପାଇଁ ଦାବି କରିଛନ୍ତି।