ପୁରୀ, ୮ା୨(ଅଜିତ୍ ମହାନ୍ତି)ଯାତ୍ରା ଜଗତର ଜଣାଶୁଣା ଅଭିନେତା ଦୈତାରୀ ପଣ୍ଡା କିଛିଦିନ ତଳେ ମହାପ୍ରଭୁ ଶ୍ରୀଜଗନ୍ନାଥଙ୍କ ସହ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ତୁଳନା କରିଥିଲେ, ଯାହାକୁ ନେଇ ପଣ୍ଡାଙ୍କ ବିରୋଧରେ ସାରା ରାଜ୍ୟରେ ପ୍ରତିକ୍ରିୟା ପ୍ରକାଶ ପାଇଥିଲା। ପଣ୍ଡା ପୁରୀ ଆସି ମହାପ୍ରଭୁଙ୍କୁ ଭୁଲ ମାଗିବା ପାଇଁ ବିଭିନ୍ନ ମହଲରୁ ଦାବି କରାଯାଇଥିଲା। ତେଣୁ ଶେଷରେ ବୁଧବାର ପଣ୍ଡା ପୁରୀ ଆସି ଶ୍ରୀମନ୍ଦିରରେ ମହାପ୍ରଭୁଙ୍କୁ ଦର୍ଶନ କରିବା ସହ ତାଙ୍କର ଏପରି ବକ୍ତବ୍ୟ ପାଇଁ ଭୁଲ୍ ମାଗିଛନ୍ତି।
ପଣ୍ଡା ପ୍ରଥମେ ପୁରୀ ଆସି ସିଂହଦ୍ୱାର ଥାନାକୁ ଯାଇଥିଲେ। ପରେ ଶ୍ରୀମନ୍ଦିର ଯାଇ ମହାପ୍ରଭୁଙ୍କୁ ଦର୍ଶନ କରି ସେ ଦେଇଥିବା ବିବାଦୀୟ ମନ୍ତବ୍ୟ ଉପରେ କ୍ଷମା ପ୍ରାର୍ଥନା କରିଥିଲେ। ସବୁଆଡୁ ବିରୋଧର ସ୍ବର ତେଜିବା ପରେ ଶେଷରେ ସେ ଶ୍ରୀମନ୍ଦିର ଆସି ତାଙ୍କର ମନ୍ତବ୍ୟ ପାଇଁ ପଶ୍ଚାତ୍ତାପ କରିଥିବା ପଣ୍ଡା କହିଛନ୍ତି। ସେ ଆହୁରି କହିଛନ୍ତି ଯେ, ମଣିଷ ମାତ୍ରକେ ଭୁଲ ହୋଇଥାଏ। ମଣିଷ ଅନେକ ସମୟରେ ବେଳେବେଳେ କିଛି ଭୁଲ କରିି ପକାଇଥାଏ। ସେ ମଧ୍ୟ ଭୁଲ୍ କରିଦେଇଛନ୍ତି। ସେ ଭାବପ୍ରବଣ ହୋଇ ଏଭଳି ମନ୍ତବ୍ୟ ଦେଇଥିଲେ। ଏହା ଅଗଣିତ ଦର୍ଶକଙ୍କ ମନକୁ ଦୁଃଖ ଦେବା ସହ ମହାପ୍ରଭୁ ଶ୍ରୀଜଗନ୍ନାଥଙ୍କୁ ଅପମାନିତ କରିଥିବା ଚର୍ଚ୍ଚାକୁ ଆସିଥିଲା। ତେଣୁ ଏପରି ଅପରାଧ ପାଇଁ ମହାପ୍ରଭୁଙ୍କ ସମେତ ସମସ୍ତ ସାଢ଼େ ଚାରିକୋଟି ଓଡ଼ିଆଙ୍କ ନିକଟରେ ସବିନୟ କ୍ଷମା ପ୍ରାର୍ଥନା କରୁଛି। ସମସ୍ତେ କ୍ଷମା କରିଦେବେ ବୋଲି ପଣ୍ଡା ଆଶାବ୍ୟକ୍ତ କରିଛନ୍ତି। ଏଭଳି ମନ୍ତବ୍ୟ କେହି ଦେବା ଉଚିତ ନୁହେଁ। ସେ ଜଣେ କଳାକାର। ତେଣୁ ମହାପ୍ରଭୁ ତାଙ୍କୁ କଳାକାର ହୋଇ ବଞ୍ଚତ୍ବାକୁ ଦିଅନ୍ତୁ ବୋଲି ସେ ପ୍ରାର୍ଥନା କରିଛନ୍ତି। ସେହିପରି ସବୁ ମହାପ୍ରଭୁଙ୍କ ଇଚ୍ଛାରେ ହେଉଛି। ମହାପ୍ରଭୁ ଶ୍ରୀଜଗନ୍ନାଥଙ୍କୁ ଛାଡ଼ି ବଞ୍ଚତ୍ବା ଅସମ୍ଭବ। ତାଙ୍କ ନିକଟରେ ତୁଳସୀ ନ ଲଗାଇଲେ ଓ ନ ପାଇଲେ ସେ ବଞ୍ଚତ୍ପାରିବେନି ବୋଲି ପଣ୍ଡା କହିଛନ୍ତି। ଯାତ୍ରା ଅଭିନେତ୍ରୀ ରାଣୀ ପଣ୍ଡା ସୋସିଆଲ ମିଡିଆରେ ପଣ୍ଡାଙ୍କ ବିରୋଧରେ ମନ୍ତବ୍ୟ ଦେବା ସମ୍ପର୍କରେ ମଧ୍ୟ ସେ ପ୍ରତିକ୍ରିୟା ରଖିଛନ୍ତି। ପଣ୍ଡା କହିଛନ୍ତି, ପ୍ରତିଦିନ ରାଣୀ ପଣ୍ଡା ସୋସିଆଲ ମିଡିଆରେ ତାଙ୍କୁ ଗାଳିଗୁଲଜ କରୁଛନ୍ତି। ତେବେ ସେ ଜଣେ କଳାକାର ଏବଂ ମୁଁ ମଧ୍ୟ କଳାକାର। ତେଣୁ ମହାପ୍ରଭୁ ତାଙ୍କର ମଙ୍ଗଳ କରନ୍ତୁ ବୋଲି ସେ କାମନା କରିଥିବା ପଣ୍ଡା କହିଛନ୍ତି।