ଜେଦାହ (ସୌଦି ଆରବ), ୧୬ା୧ (ଏପି)- ଡାକାର ରାଲିର ଜଣେ ରେସର ପିଏରେ ଚେର୍ପିନଙ୍କର ମୃତ୍ୟୁ ଘଟିଛି। ୪ଦିନ ପୂର୍ବେ ହା’ଇଲ୍୍ଠାରୁ ସାକାକା ମଧ୍ୟରେ ୭ମ ଷ୍ଟଜ୍ ରେସ୍ ବେଳେ ଚେର୍ପିନଙ୍କ ମୋଟରସାଇକେଲ ଦୁର୍ଘଟଣାର ସମ୍ମୁଖୀନ ହୋଇଥିଲା। ୫୨ ବର୍ଷୀୟ ଏହି ରାଇଡର ଘଟଣାସ୍ଥଳରେ ସଂଜ୍ଞାହୀନ ହୋଇପଡ଼ିଥିଲେ। ତାଙ୍କୁ ତୁରନ୍ତ ଜେଦାହସ୍ଥିତ ଏକ ହସ୍ପିଟାଲରେ ଭର୍ତ୍ତି କରାଯାଇଥିଲା। ସାକାକାଠାରେ ତାଙ୍କର ଅସ୍ତ୍ରୋପଚାର ହୋଇଥିଲା। ମାତ୍ର ପରେ ଏକ ମେଡିକାଲ ବିମାନ ଯୋଗେ ତାଙ୍କୁ ସୌଦି ଆରବରୁ ଫ୍ରାନ୍ସକୁ ନିଆଯାଉଥିବାବେଳେ ବାଟରେ ତାଙ୍କର ମୃତ୍ୟୁ ଘଟିଥିଲା। ଚେର୍ପିନ ସବୁବେଳେ କହି ଆସୁଥିଲେ, ପୋଡିୟମ ଫିନିଶ ନୁହେଁ ବରଂ ରେସ୍ରେ ଭାଗ ନେଇ ପାରିପାର୍ଶ୍ୱିକ ଦୃଶ୍ୟ ଉପଭୋଗ କରିବା ତାଙ୍କର ମୂଳ ଲକ୍ଷ୍ୟ। ୬ଟି ଷ୍ଟେଜ୍ ପରେ ଜେନେରାଲ ଷ୍ଟାଣ୍ଡିଂରେ ସେ ୭୭ତମ ସ୍ଥାନରେ ରହିଥିଲେ। ଏହାଥିଲା ତାଙ୍କର ଚତୁର୍ଥ ଡାକାର ରାଲି।