ଆବୁ ଧାବି,୨୧।୯: ନିଜର ବ୍ୟାଟିଂକୁ ଗୁରୁତ୍ୱ ଦେବା ପାଇଁ ବିରାଟ କୋହଲି ଟି୨୦ ଫର୍ମାଟରେ ଅଧିନାୟକ ପଦ ତ୍ୟାଗ କରି ଅନେକଙ୍କୁ ଚମକାଇ ଦେଇଛନ୍ତି। ତେବେ ତାଙ୍କର ଏହି ନିଷ୍ପତ୍ତିକୁ ସମର୍ଥନ କରିଛନ୍ତି ଦକ୍ଷିଣ ଆଫ୍ରିକାର ପୂର୍ବତନ ପେସର ଡେଲ ଷ୍ଟେଇନ ଓ ପୂର୍ବତନ ଉଇକେଟକିପର ବ୍ୟାଟ୍ସମ୍ୟାନ ପାର୍ଥିବ ପଟେଲ। ଦୁହେଁ ଅବସର ନେବା ପୂର୍ବରୁ କୋହଲିଙ୍କ ସହ ଆର୍ସିବି ପାଇଁ ଖେଳୁଥିଲେ।
ଟି୨୦ ବିଶ୍ୱକପ୍ ପରେ ଭାରତୀୟ ଟି୨୦ ଦଳର ନେତୃତ୍ୱ ନେବେ ନାହିଁ ବୋଲି ଗତ ସପ୍ତାହରେ ଘୋଷଣା କରିଥିଲେ କୋହଲି। ଏହାର କିଛି ଦିନ ପରେ ଆର୍ସିବିର ଅଧିନାୟକ ଭାବେ ଚଳିତ ଆଇପିଏଲ ତାଙ୍କର ଶେଷ ଆଇପିଏଲ୍ ହେବ ବୋଲି ଘୋଷଣା କରିଥିଲେ।
ଷ୍ଟାର ସ୍ପୋଟର୍ସକୁ ଷ୍ଟେନ କହିଛନ୍ତି, ତାଙ୍କ ଖେଳ ଦେଖିଛି। ସେ ପ୍ରତ୍ୟେକ ବିଭାଗରେ ଜଡ଼ିତ ରୁହନ୍ତି। ଏପରି କି ଟେଷ୍ଟ ମ୍ୟାଚ୍ରେ ମଧ୍ୟ କୋହଲି ସ୍ଲିପ ଅଞ୍ଚଳରେ ଥାନ୍ତୁ କି କଭରରେ ଫିଲ୍ଡିଂ କରୁ ଥାନ୍ତୁ, ବଲ ଉଇକେଟକିପରଙ୍କ ହାତରେ ପହଞ୍ଚିବା ମାତ୍ରେ ତୁରନ୍ତ ବଲ ମାଗନ୍ତି। କିନ୍ତୁ ବର୍ତ୍ତମାନ ସେ କୋଭିଡ୍ ସମୟ, ତାଙ୍କ ପରିବାର, ବିଜ୍ଞାପନରେ ବ୍ୟସ୍ତ ରହୁଛନ୍ତି। ଏଣୁ ଟି୨୦ ଅଧିନାୟକ ପଦ ଛାଡ଼ି ବ୍ୟାଟିଂ ଉପରେ ଧ୍ୟାନ ଦେବାକୁ କୋହଲି ନିଷ୍ପତ୍ତି ନେଇଥାଇପାରନ୍ତି।
