ଜୋହାନ୍ସବର୍ଗ,୩୧।୮: ଦକ୍ଷିଣ ଆଫ୍ରିକାର କିମ୍ବଦନ୍ତୀ ପେସର ଡେଲ ଷ୍ଟେଇନ ମଙ୍ଗଳବାର କ୍ରିକେଟର ସମସ୍ତ ଫର୍ମାଟରୁ ଅବସର ଘୋଷଣା କରିଛନ୍ତି। ୨୦୧୯ରେ ଟେଷ୍ଟ କ୍ରିକେଟରୁ ବିଦାୟ ନେଇଥିବା ଷ୍ଟେଇନଙ୍କୁ ଇତିହାସର ଅତ୍ୟତମ ଦୁର୍ଦ୍ଧର୍ଷ ବୋଲର ଭାବେ ଗଣନା କରାଯାଏ। ଅନ୍ତର୍ଜାତୀୟ କ୍ରିକେଟରେ ସେ ୯୩ ଟେଷ୍ଟ, ୧୨୫ ଦିନିକିଆ ଓ ୪୭ ଟି୨୦ ଖେଳିଥିଲେ। ଗତବର୍ଷ ଫେବୃୟାରୀରେ ଅନ୍ତିମ ଥର ପାଇଁ ଜାତୀୟ ଦଳରୁ ପ୍ରତିନିଧିତ୍ୱ କରିଥିଲେ।
ଟେଷ୍ଟ କ୍ରିକେଟରେ ସେ ୨୨.୯୫ ହାରରେ ୪୩୯ ଉଇକେଟ ନେଇଥିଲେ। ତାଙ୍କ ନାମରେ ୧୯୬ ଦିନିକିଆ ଓ ୬୪ ଟି୨୦ ଉଇକେଟ ରହିଛି। କ୍ରିକେଟର ଲମ୍ବା ଫର୍ମାଟରେ ଦକ୍ଷିଣ ଆଫ୍ରିକା ପାଇଁ ସର୍ବାଧିକ ଉଇକେଟ ହାସଲ କରିବାର ରେକର୍ଡ ରହିଛି ଷ୍ଟେଇନଙ୍କ ନାମରେ। ୩୮ ବର୍ଷୀୟ ପେସର ୨୦୦୪, ଡିସେମ୍ବର ୧୭ ତାରିଖରେ ଇଂଲଣ୍ଡ ବିପକ୍ଷ ଟେଷ୍ଟ ମ୍ୟାଚ୍ରେ ପଦାର୍ପଣ କରିଥିଲେ। ଅନ୍ତର୍ଜାତୀୟ କ୍ରିକେଟ ଛଡ଼ା ଷ୍ଟେଇନ ଆଇପିଏଲ ଭଳି ବିଭିନ୍ନ ଟି୨୦ ଲିଗ୍ରେ ସକ୍ରିୟ ଥିଲେ। ସେ ଆଇପିଏଲରେ ଡେକାନ ଚାଜର୍ସ (ଡିସି), ସନରାଇଜର୍ସ ହାଇଦ୍ରାବାଦ୍ (ଏସ୍ଆରଏଚ୍) ଓ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର (ଆରସିବି) ପାଇଁ ଖେଳିଥିଲେ। ଆଇପିଏଲର ଉଭୟ ଫ୍ରାଞ୍ଚାଇଜ ଦକ୍ଷିଣ ଆଫ୍ରିକୀୟ କିମ୍ବଦନ୍ତୀଙ୍କୁ ଧନ୍ୟବାଦ୍ ଜଣାଇଛନ୍ତି।