ନୂଆଦିଲ୍ଲୀ,୩।୩: ନିକଟରେ ଦକ୍ଷିଣ ଆଫ୍ରିକାର ଦ୍ରୁତ ବୋଲର୍ ଡେଲ୍ ଷ୍ଟେଇନ ଇଣ୍ଡିଆନ୍ ପ୍ରିମିୟର ଲିଗ୍(ଆଇପିଏଲ୍) ଏବଂ ପାକିସ୍ତାନ ସୁପର ଲିଗ୍(ପିଏସ୍ଏଲ୍) ମଧ୍ୟରେ ତୁଳନା କରି ବିବାଦୀୟ ବୟାନ ଦେଇଥିଲେ। ଉକ୍ତ ବୟାନକୁ ନେଇ ତାଙ୍କୁ ସମାଲୋଚନା କରାଯାଇଥିଲା। ଆଇପିଏଲ୍ର ପ୍ରଶଂସକ ସୋସିଆଲ ମିଡିଆରେ ବୋଲର୍ଙ୍କୁ ଟ୍ରୋଲ କରି କଟୁ ମନ୍ତବ୍ୟ ଦେଇଥିଲେ। ଏବେ ସେ ନିଜ ବୟାନକୁ ନେଇ କ୍ଷମା ମାଗିଛନ୍ତି।
ତେବେ ୨୦୨୦ ଆଇପିଏଲ୍ରେ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ସହ ଜଡ଼ିତ ଥିଲେ ଷ୍ଟେନ୍। ତାଙ୍କୁ ଦଳ ଖେଳିବାକୁ ସୁଯୋଗ ଦେଇ ନ ଥିବାରୁ ସେ ଚଳିତ ବର୍ଷ ଆଇପିଏଲ୍ରୁ ଦୂରରେ ରହିବାକୁ ନିଷ୍ପତ୍ତି ନେଇଥିଲେ।
ନିଜର ବୟାନକୁ ନେଇ ସେ ନିଜର ଆଧିକାରୀକ ଟୁଇଟର ହ୍ୟାଣ୍ଡେଲରେ ଟୁଇଟ୍ କରି କହିଛନ୍ତି, ଆଇପିଏଲ୍ରେ ମୋ ସହ ଅନେକ ଖେଳାଳିଙ୍କ କ୍ୟାରିୟର ଭଲ ରହିଛି। ମୋ ବୟାନର ଉଦ୍ଦେଶ୍ୟ କାହାର ଅପମାନ କରିବା ନ ଥିଲା। ଏପରିକି କୌଣସି ଲିଗ୍କୁ ତୁଳନା କରିବାକୁ ନ ଥିଲା। ହେଲେ ସୋସିଆଲ ମିଡିଆ ଏବଂ ଅନ୍ୟ ସ୍ଥାନରେ କହିଥିବା କିଛି ଶବ୍ଦ ବେଳେବେଳେ ଏହା କରିଥାଏ। ଏଥିରେ କାହାକୁ କଷ୍ଟ ହୋଇଥିଲେ କ୍ଷମା ପ୍ରାର୍ଥନା କରୁଛି। ସମସ୍ତଙ୍କୁ ଭଲପାଇବା ବୋଲି ସେ କହିଛନ୍ତି।