କଟକ ଅଫିସ,୧୫।୫: କଟକ ମାଲଗୋଦାମ ଡାଲି ବ୍ୟବସାୟୀ ସେକ୍ ଫାରୁକ ହତ୍ୟା ମାମଲାରେ ଡି-ବ୍ରଦର୍ସ ସୋମବାର ନିର୍ଦ୍ଦୋଷରେ ଖଲାସ ହୋଇଛନ୍ତି। ଉଭୟ ସୁଶାନ୍ତ ଧଳସାମନ୍ତ ଓ ସୁଶୀଲ ଧଳସାମନ୍ତଙ୍କ ସହ ତାଙ୍କ ସହଯୋଗୀ ଆରିଫ ଖାଁ ମଧ୍ୟ ନିର୍ଦ୍ଦୋଷରେ ଖଲାସ ହୋଇଛନ୍ତି। ୩ ଅଭିଯୁକ୍ତଙ୍କୁ କଟକ ଜିଲା ଓ ଦୌରାଜଜ ନିର୍ଦ୍ଦୋଷରେ ଖଲାସ କରିଛନ୍ତି। ଏହି ମାମଲାରେ କେବଳ ଭରତ ସ୍ବାଇଁ ନାମକ ଅଭିଯୁକ୍ତ ଫେରାର ଅଛି । ପୂର୍ବରୁ ଅନ୍ୟ ୪ ଅଭିଯୁକ୍ତଙ୍କୁ କୋର୍ଟ ଦୋଷମୁକ୍ତ କରିଥିଲେ ।
୨୦୧୪ ମସିହା ନଭେମ୍ବର ମାସ ୧୨ ତାରିଖରେ ମାଲଗୋଦାମ ଡାଲି ବ୍ୟବସାୟୀ ଫାରୁକ ଗୁଳିକାଣ୍ତର ଶୀକାର ହୋଇଥିଲେ । ଫଳରେ ଫାରୁକଙ୍କର ଘଟଣାସ୍ଥଳରେ ହିଁ ମୃତ୍ୟୁ ହୋଇଥିଲା । ତାଙ୍କ ଗୋଦାମର ଜଣେ କର୍ମଚାରୀ ଗୁରୁତର ହୋଇଥିଲେ । ଦାଦାବଟି ଯୋଗୁ ଏହି ହତ୍ୟାକାଣ୍ତ ହୋଇଥିଲା ବୋଲି ପୋଲିସ କହିଥିଲା। ପରେ କଟକ ସହରର ଚର୍ଚ୍ଚିତ ଡି ବ୍ରଦର୍ସଙ୍କ ନାଁ ଏଥିରେ ଯୋଡ଼ାଯାଇଥିଲା। ଧଳ ଭ୍ରାତାଙ୍କ ଇଙ୍ଗିତରେ ସୁପାରୀ କିଲର ଫାରୁକଙ୍କୁ ହତ୍ୟା କରିଥିବା ମଧ୍ୟ ପୋଲିସ ପକ୍ଷରୁ ସେତେବେଳେ କୁହାଯାଇଥିଲା ।