ସମ୍ବଲପୁର, ୧୪।୧ (ବ୍ୟୁରୋ): ବୁର୍ଲା ଭୀମସାରଠାରେ ଠିକା ସଫେଇ କର୍ମଚାରୀଙ୍କ ବିଭିନ୍ନ ଦାବି ନେଇ ବୁଧବାର ଓଡିଶା ଆଦିବାସୀ ଦଳିତ ସେନା ପକ୍ଷରୁ ବିକ୍ଷୋଭ ପ୍ରଦର୍ଶନ କରାଯାଇଛି। ପୂର୍ବାହ୍ନ ସାଢ଼େ ୧୧ଟାରୁ ଅପରାହ୍ନ ୧ଟା ପର୍ଯ୍ୟନ୍ତ ଆନ୍ଦୋଳନକାରୀ ଦାବି ପୂରଣ ଲାଗି ସ୍ଲୋଗାନ ଦେଇଥିଲେ। ଏହାପରେ ଭୀମସାର କର୍ତ୍ତୃପକ୍ଷଙ୍କ ସହ ଆଲୋଚନା କରିଥିଲେ। ଏକମାସ ମଧ୍ୟରେ ଠିକା କର୍ମଚାରୀଙ୍କ ସମସ୍ୟା ସମାଧାନ କରାଯିବ ବୋଲି ପ୍ରତିଶ୍ରୁତି ମିଳିବା ପରେ ଆନ୍ଦୋଳନକାରୀ ଶାନ୍ତ ହୋଇଥିଲେ। ଆଦିବାସୀ ଦଳିତ ସେନାର ସଭାପତି ପ୍ରଶାନ୍ତ କୁମାର ହାଓ, ସାଧାରଣ ସମ୍ପାଦକ ଶ୍ୟାମସୁନ୍ଦର ମୁଣ୍ଡା, ଉପସଭାପତି ପ୍ରୀତି ପ୍ରଧାନ, ନାରୀନେତ୍ରୀ ସୁବର୍ଣ୍ଣ ନାୟକ ଓ ଚନ୍ଦ୍ରକାନ୍ତି ନାୟକ ଆନ୍ଦୋଳନର ନେତୃତ୍ୱ ନେଇଥିଲେ ।
