ଗୁରୁଗ୍ରାମ,୩୧।୮- ୧୩ ବର୍ଷୀୟା ଦଳିତ ନାବାଳିକାଙ୍କୁ ବଳାତ୍କାର ପରେ ହତ୍ୟା କରାଯାଇଛି। ଏଭଳି ଘଟଣା ଘଟିଛି ଉତ୍ତର ଦିଲ୍ଲୀର ନରେଲା ଅଞ୍ଚଳରେ। ହତ୍ୟା ପରେ ମୃତଦେହକୁ ଯଥା ଶୀଘ୍ର ସଂସ୍କାର କରିବା ପାଇଁ ପୀଡ଼ିତାଙ୍କ ପରିବାରବର୍ଗଙ୍କ ଉପରେ ଅଭିଯୁକ୍ତ ଚାପ ପକାଇଥିଲେ। ଏ ନେଇ ପୀଡ଼ିତାଙ୍କ ବାପା ପିସିଆର୍କୁ ଫୋନ କରି ଜଣାଇବା ପରେ ଘର ମାଲିକଙ୍କ ଭାଇ ପ୍ରବୀଣ ବର୍ମାଙ୍କୁ ଗିରଫ କରାଯାଇଛି।
ଗତ ୧୭ ତାରିଖରେ ମୋ ଘର ମାଲିକଙ୍କ ସ୍ତ୍ରୀ କହିଥିଲେ ଯେ, ତାଙ୍କ ନଣନ୍ଦ ମାତୃତ୍ୱ ଲାଭ କରିଛନ୍ତି। ଏଣୁ ତାଙ୍କ ଭାଇ ଘର ଗୁରୁଗ୍ରାମକୁ ମୋ ଝିଅକୁ ସାଙ୍ଗରେ ନେଇଥିଲେ। ସେଠାରେ ମୋ ଝିଅ ତାଙ୍କ ଭାଇଙ୍କ ଝିଅ ସହ ଖେଳିବ ବୋଲି ସେ କହିଥିଲେ। କିନ୍ତୁ ଗତ ୨୩ ତାରିଖ ଅପରାହ୍ନ ୩ଟା ବେଳେ ଝିଅର ମୃତ୍ୟୁ ହୋଇଥିବା ଜଣାଇଥିଲେ ଘର ମାଲିକ। ପ୍ରାୟ ସନ୍ଧ୍ୟା ୭ଟା ବେଳେ ଏକ ବେସରକାରୀ ଆମ୍ବୁଲାନ୍ସରେ ଝିଅର ମୃତଦେହ ଫେରିଥିଲା ବୋଲି ପୀଡ଼ିତାଙ୍କ ବାପା ଅଭିଯୋଗରେ ଦର୍ଶାଇଛନ୍ତି।
ଝିଅର ମୃତଦେହ ଦେଖିବା ପରେ ସନ୍ଦେହ ହେବାରୁ ସେ ପିସିଆରକୁ ଫୋନ କରିଥିଲେ। ନରେଲା ପୋଲିସ ଘଟଣା ସ୍ଥଳରେ ପହଞ୍ଚିବା ପରେ ମୃତଦେହକୁ ଜାହାଙ୍ଗିରପୁରୀସ୍ଥିତ ବାବୁ ଜଗଜିବନ ରାମ ହସ୍ପିଟାଲରେ ନିଆଯାଇଥିଲା। ଗୁରୁଗାଓଁ ପୋଲିସ ଅଭିଯୁକ୍ତଙ୍କ ବିରୋଧରେ ୩୦୨ (ହତ୍ୟା) ଓ ୧୨୦ ବି (ଅପରାଧିକ ଷଡ଼ଯନ୍ତ୍ର) ଦଫାରେ ମାମଲା ରୁଜୁ କରିଛି। ଶବ ବ୍ୟବଚ୍ଛେଦ ରିପୋର୍ଟରେ ଯୌନ ନିର୍ଯାତନା ପ୍ରାମାଣିତ ହେଲେ ସେହି ସମ୍ପର୍କୀତ ଦଫା ଯୋଡ଼ାଯିବ ବୋଲି ପୋଲିସ ପକ୍ଷରୁ କୁହାଯାଇଛି।