କେନ୍ଦ୍ରାପଡ଼ା ଅଫିସ/ମାର୍ଶାଘାଇ,୨୧।୪(ଡି.ଏନ.ଏ.): କେନ୍ଦ୍ରାପଡ଼ା ଜିଲା ମାର୍ଶାଘାଇ ଥାନାରେ ମହାକାଳପଡ଼ା ବ୍ଲକ ତିଖିରୀ ପଞ୍ଚାୟତ ସରପଞ୍ଚଙ୍କ ବିରୋଧରେ ମଙ୍ଗଳବାର ଏକ ସଙ୍ଗିନ ଅଭିଯୋଗ ହୋଇଛି।ସମ୍ପୃକ୍ତ ପଞ୍ଚାୟତର ଜଣେ ଦଳିତ ବ୍ୟକ୍ତିଙ୍କୁ ତଳେ ଛେପ ପକାଇ ନାକ ଘଷିବା ପାଇଁ ଗ୍ରାମସଭାରେ ସରପଞ୍ଚ ଚାମେଲି ଓଝା, ସହଯୋଗୀ ବିଜୟ ସ୍ବାଇଁ, ରାକେଶ ସୁତାର ଓ କାଳିଆ ସୁତାର ତାଙ୍କୁ ବାଧ୍ୟ କରିଥିଲେ ବୋଲି ଥାନାରେ ପ୍ରଦାନ କରାଯାଇଥିବା ଅଭିଯୋଗ ପତ୍ରରେ ଉଲ୍ଲେଖ ହୋଇଛି। ସୂଚନା ଅନୁଯାୟୀ, ଅଭିଯୋଗକାରୀ ଗୁରୁଚରଣ ମଲ୍ଲିକ ଥାନାରେ ଅଭିଯୋଗ କରିଛନ୍ତି, ଗ୍ରାମର ଏକ ମନ୍ଦିରର ପୁନରୁଦ୍ଧାର ହେଉଛି।ଏଥିପାଇଁ ଗ୍ରାମରେ ଚାନ୍ଦା ଆଦାୟ ହେଉଥିଲା।ସେ ଚାନ୍ଦା ନ ଦେବାରୁ ଗତ ରବିବାର ଗ୍ରାମସଭା ବସିଥିଲା।ଏଥିରେ ସରପଞ୍ଚ ଓଝାଙ୍କ ସହିତ ଗ୍ରାମର ଯୁବକମାନେ ଚାନ୍ଦା ଦେବାକୁ ତାଙ୍କୁ ବାଧ୍ୟ କରିଥିଲେ।ହେଲେ ଗୁରୁଚରଣ ଚାନ୍ଦା ଦେବାକୁ ମନା କରିବାରୁ ତଳେ ଛେପ ପକାଇ ନାକ ଘଷିବା ପାଇଁ ତାଙ୍କୁ ବାଧ୍ୟ କରାଯାଇଥିଲା।ଏହି ଅଭିଯୋଗ ସମ୍ପର୍କରେ ଥାନା ଅଧିକାରୀ ପ୍ରଦୀପ୍ତ କୁମାର କାନୁନ୍ଗୋ କହିଛନ୍ତି, ଏନେଇ ଏକ ମାମଲା ରୁଜୁ ହେବା ସହ ତଦନ୍ତ ଆରମ୍ଭ ହୋଇଛି।ଅପରପକ୍ଷେ ଜିଲା ଦଳିତ ସମାଜ ସଭାପତି ନଗେନ୍ଦ୍ର ଜେନା ଏହି ଘଟଣାକୁ ନିନ୍ଦା କରିବା ସହିତ ଦୃଢ଼ କାର୍ଯ୍ୟାନୁଷ୍ଠାନ ଦାବି କରିଛନ୍ତି।ସେ କହିଛନ୍ତି, ଗ୍ରାମାଞ୍ଚଳରେ ଦଳିତଙ୍କୁ ନିର୍ଯାତନା ଦିଆଯାଉଥିବା ବେଳେ ପୋଲିସ ପ୍ରଶାସନ ଚୁପ୍ ହୋଇ ବସିଛି।ଅନ୍ୟପକ୍ଷେ ସରପଞ୍ଚ ଓଝା କହିଛନ୍ତି, ଏହି ଅଭିଯୋଗ ସମ୍ପୂର୍ଣ୍ଣ ଭିତ୍ତିହୀନ।ରାଜନୈତିକ ଉଦ୍ଦେଶ୍ୟ ରଖି ସମ୍ପୃକ୍ତ ବ୍ୟକ୍ତି ଥାନାରେ ମୋ ବିରୋଧରେ ଏପରି ଅଭିଯୋଗ କରିଛନ୍ତି ା