ଭୁବନେଶ୍ୱର,୪।୧୧(ବ୍ୟୁରୋ): ବହୁ ପ୍ରତିକ୍ଷାର ଅନ୍ତ ପରେ ଏଥର ଫିଲ୍ମ ଫ୍ରାଇଡେ’ ଶୁକ୍ରବାରରେ ଶୁଭମୁକ୍ତି କରୁଛି ଓଡ଼ିଆ ଚଳଚ୍ଚିତ୍ର ‘ଦମନ’। ବର୍ତ୍ତମାନ ଓଡ଼ିଆ ସିନେମାର ସ୍ଥିତି ଠିକ୍ ନ ଥିବାବେଳେ ମୌଳିକ କଥାବସ୍ତୁ ଉପରେ ଆଧାରିତ ଏହି ଫିଲ୍ମ ଓଲିଉଡରେ ବୈପ୍ଳବିକ ପରିବର୍ତ୍ତନ ଆଣିବ ବୋଲି ସମସ୍ତେ ଆଶା ପ୍ରକାଶ କରିଛନ୍ତି। ଡାକ୍ତରୀ ପାଠ ଶେଷ କରିବା ପରେ ଯୁବ ଡାକ୍ତର ସିଦ୍ଧାର୍ଥଙ୍କର ନିଯୁକ୍ତି ମାଲକାନଗିରି ଜିଲାର ଉପାନ୍ତ
ଅଞ୍ଚଳରେ ହୋଇଛି। ମୌଳିକ ସୁବିଧା ସୁଯୋଗର ଅଭାବ, ପୁଣି ନକ୍ସଲ ଉପଦ୍ରୁତ ଏହି ଅଞ୍ଚଳରେ ଏହି ଯୁବ ଡାକ୍ତର ଜଣକ କିଭଳି ନିଜ କର୍ତ୍ତବ୍ୟ ସମ୍ପାଦନ କରୁଛନ୍ତି ଓ ଏଥିପାଇଁ ତାଙ୍କୁ କ’ଣ ସବୁ ଅସୁବିଧା ସାମ୍ନା କରିବାକୁ ପଡ଼ୁଛି ତାହା ଦର୍ଶକଙ୍କୁ ଦେଖିବାକୁ ମିଳିବ। ବିଶାଲ ମୌରୟା ଓ ଦେବୀ ପ୍ରସାଦ ଲେଙ୍କାଙ୍କ ନିର୍ଦ୍ଦେଶନାରେ ନିର୍ମିତ ଏହି ଫିଲ୍ମକୁ ଦୀପେନ୍ଦ୍ର ସାମଲ ପ୍ରଯୋଜନା ଦେଇଛନ୍ତି। ଏହି ଫିଲ୍ମରେ ଅଭିନେତା ବାବୁସାନଙ୍କ ସହ କଳାକାର ଭାବେ ଦୀପନ୍ବିତ ଦାସ ମହାପାତ୍ରଙ୍କୁ ଦେଖିବାକୁ ମିଳିବ। ଜେପି ଓ୍ବାର୍ଡସ୍ମିଥ୍ ଓ ବାପୁ ଗୋସ୍ବାମୀ ଏହାର ଗୀତ ଲେଖିଥିବା ବେଳେ ସଙ୍ଗୀତରେ ସଜାଇଛନ୍ତି ଗୌରବ ଆନନ୍ଦ ଓ ତାଙ୍କର ଟିମ୍। ସେହିପରି ବଲିଉଡରେ କ୍ୟାଟ୍ରିନା କେଫ୍ଙ୍କ ଫୋନ ଭୁତ୍ (phone bhoot), ସୋନାକ୍ଷୀ ସିହ୍ନା ଓ ହୁମା କ୍ୟୁରେଶୀଙ୍କ ଅଭିନୀତ ଫିଲ୍ମ ‘ଡବଲ ଏକ୍ସଏଲ୍’ ଓ ଜାହ୍ନବୀ କପୁରଙ୍କ ଅଭିନୀତ ‘ମିଲି’ ଫିଲ୍ମ ମଧ୍ୟ ରିଲିଜ ହେବ।
