କଳିଙ୍ଗନଗର,୬ା୧୧(ଡି.ଏନ.ଏ.): ଦାନଗଦୀ ସ୍ବାସ୍ଥ୍ୟକେନ୍ଦ ପରିସରରେ ପ୍ରାୟ ୬କୋଟି ଟଙ୍କାରେ ଏକ ମେଡିକାଲ ଗୃହ ନିର୍ମାଣ କରାଯାଉଛି। ତେବେ ଏଥିରେ ବ୍ୟାପକ ଅନିୟମିତତା ହେଉଥିବା ଅଭିଯୋଗ ହୋଇଛି। ସାଧାରଣ ଲୋକଙ୍କ ଜାଣିବା ନିମନ୍ତେ ସରକାରଙ୍କ ପକ୍ଷରୁ କାର୍ଯ୍ୟସ୍ଥଳୀରେ ସୂଚନା ଫଳକ ଲଗାଇବାର ନିୟମ ରହିଛି। କିନ୍ତୁ କାର୍ଯ୍ୟରତ ଠିକାଦାର ଏହାକୁ ଅବମାନନା କରି ତିନି ମାସ ହେବ ନିର୍ମାଣ କାର୍ଯ୍ୟ ଜାରି ରଖିଛନ୍ତି। ପିଲର ପାଇଁ ଖୋଳାଯାଇଥିବା ମାଟି ଏବଂ ମୋରମକୁ ପୁଣି ସେଠାରେ ଫିଲିଂ କରାଯାଇଥିବା ଦେଖିବାକୁ ମିଳିଛି। ସରକାରୀ ନିୟମାନୁଯାୟୀ ପିଲର ଗାତରେ ବାଲି ଫିଲିଂ କରିବାର ନିୟମ ଥିବାବେଳେ ଏହାକୁ ସମ୍ପୃକ୍ତ ଠିକାଦାର ଉଲ୍ଲଘଂନ କରୁଛନ୍ତି। ଏହାକୁ ନେଇ ସାଧାରଣରେ ପ୍ରତିକ୍ରିୟା ପ୍ରକାଶ ପାଇଛି। ଏ ସମ୍ପର୍କରେ ଗ୍ରାମ୍ୟ ନିର୍ମାଣ ବିଭାଗର ଯାଜପୁର ନିର୍ବାହୀ ଯନ୍ତ୍ରୀ ବିଜୟ କୁମାର ମହାରଣା କହିଛନ୍ତି, ବ୍ୟୟଅଟକଳ ଅନୁସାରେ କାମ ହେଉଛି। କୌଣସି ଅନିୟମିତତା ହେଉନାହିଁ।