ବେଜିଂ, ୧୩।୩ : ଚାଇନାରେ କରୋନା ମହାମାରୀ ପୁଣି ଥରେ ବ୍ୟାପିବା ଆରମ୍ଭ କରିଛି। ଫଳରେ ପୁଣି ବିପଦ ଘନେଇବାରେ ଲାଗିଛି। ଚାଇନାକୁ କରୋନା ଫେରିଛି। ବହୁ ସହରରେ କରୋନା ସଂକ୍ରମଣର ବୃଦ୍ଧି ପଞ୍ଜିକୃତ ହୋଇଛି। ରବିବାର ଦିନ, ଚାଇନାରେ ଗୋଟିଏ ଦିନରେ ସର୍ବାଧିକ ୩,୩୯୩ ନୂଆ ଆକ୍ରାନ୍ତଙ୍କୁ ଚିହ୍ନଟ କରାଯାଇଛି।
ପ୍ରାୟ ଦୁଇ ବର୍ଷ ପରେ ପ୍ରଥମ ଥର ପାଇଁ କରୋନା ସଂକ୍ରମଣର ୩,୩୦୦ରୁ ଅଧିକ ମାମଲା ପଞ୍ଜିକୃତ ହୋଇଛି। ଜାତୀୟ ସ୍ବାସ୍ଥ୍ୟ ଆୟୋଗ ଅନୁଯାୟୀ, ଫେବୃଆରୀ ୨୦୨୦ପରଠାରୁ ଏହା ହେଉଛି ଦୈନିକ ସଂକ୍ରମଣର ସର୍ବ ବୃହତ ସଂଖ୍ୟା। କରୋନା ସଂକ୍ରମଣ ବୃଦ୍ଧି ହେତୁ ବହୁ ସହରରେ ପୁନର୍ବାର କଟକଣା ଲଗାଯାଉଛି । କେତେକ ସହରରେ ଲୋକଙ୍କୁ ବାହାରକୁ ଯିବାକୁ ବାରଣ କରାଯାଇଛି । ସ୍କୁଲକୁ ବନ୍ଦ କରାଯାଇଛି।
ଚାଇନାରେ କରୋନା ସଂକ୍ରମଣର ବଢୁଥିବା ମାମଲାକୁ ଦୃଷ୍ଟିରେ ରଖି କର୍ତ୍ତୃପକ୍ଷ ବର୍ତ୍ତମାନ ସତର୍କତାମୂଳକ ଭାବରେ ସାଙ୍ଘାଇରେ ସ୍କୁଲ ବନ୍ଦ କରିଛନ୍ତି। ଏହା ସହିତ କରୋନା ସଂକ୍ରମଣର ପ୍ରସାରକୁ ରୋକିବା ପାଇଁ ଅନେକ ଉତ୍ତର-ପୂର୍ବ ସହରରେ ଲକଡାଉନ ଲଗାଯାଇଛି ।
ଦେଶର ପ୍ରାୟ ୧୯ଟି ପ୍ରଦେଶରେ ଓମିକ୍ରନ ଏବଂ ଡେଲଟା ଭାରିଆଣ୍ଟ ସଂକ୍ରମଣ ବଢ଼ିବାରେ ଲାଗିଛି। ରବିବାର ଦିନ ଜଣେ ଅଧିକାରୀ ସୂଚନା ଦେଇଛନ୍ତି ଯେ ଜିଲିନ ସହର ଆଂଶିକ ବନ୍ଦ ରହିଛି। ସ୍ଥାନୀୟ ଅଧିକାରୀ କହିଛନ୍ତି ଯେ ରୁଷିଆ ଏବଂ ଉତ୍ତର କୋରିଆ ସୀମାବର୍ତ୍ତୀ ହୁଞ୍ଚୁନ ସହରରେ ମାର୍ଚ୍ଚ ୧ଠାରୁ ଲକ୍ଡାଉନ୍ ଘୋଷଣା କରାଯାଇଛି।
ଆକ୍ରାନ୍ତଙ୍କ ଚିକିତ୍ସା ପାଇଁ ସହରରେ ତିନୋଟି ଅସ୍ଥାୟୀ ହସ୍ପିଟାଲ ନିର୍ମାଣ କରାଯାଇଥିବା ଗଣମାଧ୍ୟମ ସଂସ୍ଥା ସିହ୍ନୁଆ ରିପୋର୍ଟ କରିଛି।