ଯାଜପୁର ଅଫିସ/କୋରେଇ(ସ୍ବ.ପ୍ର.),୫।୨: ଯାଜପୁର, କେନ୍ଦୁଝର ଓ ଭଦ୍ରକ ଜିଲାର ସୀମାରେଖା ଭାବେ ବୈତରଣୀ ନଦୀ ପରିଚିତ। ଏହି ୩ ଜିଲା ମଧ୍ୟରେ ଗମନାଗମନ ଓ ଯୋଗାଯୋଗର ଏକମାତ୍ର ମାଧ୍ୟମ ହୋଇଛି ବୈତରଣୀ ସେତୁ। ବହୁ ଦାବି ପରେ ମୁଖ୍ୟମନ୍ତ୍ରୀ ୨୦୧୩ରେ ବୈତରଣୀ ସେତୁର ଲୋକାର୍ପଣ କରିଥିଲେ। ଏବେ ସେତୁର ସମୁଦାୟ ୨୫ ସ୍ପାନ୍ ମଧ୍ୟରୁ ୧୦ ଓ ୨୩ ନମ୍ବର ପିଲର ପ୍ରାୟ ୬ ଇଞ୍ଚ ଦବି ଯାଇଛି। ଫଳରେ ସେତୁର କେତେକ ସ୍ଥାନରେ ଫାଟ ସୃଷ୍ଟି ହୋଇଛି। ତଥାପି ସେତୁ ଦେଇ ବାଲି ବୋଝେଇ ଭାରିଯାନ ଚଳାଚଳ କରୁଛି। ଏଥିଯୋଗୁ ସେତୁ ପ୍ରତି ବିପଦ ସୃଷ୍ଟି ହେଉଥିବା ଅଭିଯୋଗ ହୋଇଛି।
ସୂଚନା ଅନୁଯାୟୀ, ଯାଜପୁର, କେନ୍ଦୁଝର ଓ ଭଦ୍ରକ ଜିଲାର ପ୍ରାୟ ୨୦ ପଞ୍ଚାୟତବାସୀ ବୈତରଣୀ ନଦୀ ଉପରେ ସେତୁ ନିର୍ମାଣ ପାଇଁ ଦୀର୍ଘଦିନରୁ ଦାବି କରି ଆସୁଥିଲେ। ଶେଷରେ ସେହି ଦାବିକୁ ସରକାର ଗ୍ରହଣ କରିଥିଲେ। କୋରାଇ ବ୍ଲକର ମୁକୁନ୍ଦପୁର ପଞ୍ଚାୟତ ଅଧୀନ ମଥୁରାପୁରରେ ବୈତରଣୀ ସେତୁ ନିର୍ମାଣକୁ ମଞ୍ଜୁରୀ ମିଳିଥିଲା। କୃଷି, ବ୍ୟବସାୟ, ଗମନାଗମନ ଓ ଯୋଗାଯୋଗ କ୍ଷେତ୍ରରେ ଗୁରୁତ୍ୱ ବହନ କରୁଥିବା ଏହି ସେତୁ ଏବେ ଦୁର୍ବଳ ହେବାରେ ଲାଗିଛି। ୩ ଜିଲାକୁ ସଂଯୋଗ କରୁଥିବା ଏହି ସେତୁ ପ୍ରତି ପ୍ରଶାସନିକ ଅଧିକାରୀମାନଙ୍କ ବେପରୁଆ ନୀତି ଓ ବାଲି ମାଫିଆଙ୍କ ବେଫିକର ଭାରିଯାନ ଚଳାଚଳ କାଳ ହୋଇଛି। ଏହି ସେତୁ ଉପରେ ଭାରିଯାନ ଚଳାଚଳକୁ ପୂର୍ତ୍ତ ବିଭାଗ ତରଫରୁ ନିଷିଦ୍ଧ କରାଯାଇଥିବା ବେଳେ ବାଲି ବ୍ୟବସାୟୀମାନେ ଏହାକୁ ମାନୁ ନାହାନ୍ତି। ସେତୁର ସ୍ପାନ୍ ଦବୁ କି ଭାଙ୍ଗିପଡୁ ସେଥିପ୍ରତି ସେମାନଙ୍କ ଖାତିରି ନାହିଁ।
ବୈତରଣୀ ନଦୀ ବାମପାଖ କେନ୍ଦୁଝର ଜିଲା ହାଟଡିହ ତହସିଲର ହାବଳେଶ୍ୱର, ଡିମିରିଆ, ଜମ୍ଭରା ବାଲିଘାଟ ସମେତ ଯାଜପୁର ଜିଲା ବ୍ୟାସନଗର ତହସିଲ ଅଧୀନ ମୁକୁନ୍ଦପୁର ପଞ୍ଚାୟତର ୩ ବାଲିଘାଟରେ ଏବେ ମେଶିନ ସହାୟତାରେ ନିର୍ଦ୍ଧାରିତ ପରିମାଣଠାରୁ ବହୁ ଗୁଣରେ ବାଲି ଉତ୍ତୋଳନ କରାଯାଉଛି। ଏପରି କି ସେତୁର ଅତି ନିକଟରୁ ବାଲି ଉଠାଯାଇ ବିନା ରୋଡ ମ୍ୟାପ୍ରେ ମଥୁରାପୁର-ଷଠିପୁର ରାସ୍ତାରେ ବିଭିନ୍ନ ସ୍ଥାନକୁ ଚାଲାଣ କରାଯାଉଛି। ମଥୁରାପୁର ସେତୁରେ ଫାଟ ସୃଷ୍ଟି ହେବା ଓ ଦବିବା ସଂକ୍ରାନ୍ତରେ ବର୍ଷକ ପୂର୍ବରୁ ପ୍ରଶାସନ ଓ ବିଭାଗୀୟ ଅଧିକାରୀଙ୍କୁ ଅବଗତ କରାଯାଇଥିଲାା ହେଲେ ପ୍ରଶାସନର ନୀରବତା ବାଲି ବ୍ୟବସାୟୀଙ୍କୁ ବେଶ ସୁହାଉଛି। ପ୍ରଶାସନର ଏଭଳି ଅବହେଳା ଫଳରେ ୨୦୧୧ର ପ୍ରଳୟଙ୍କରୀ ବନ୍ୟାରେ ବୁଢ଼ାନଦୀ ଉପରିସ୍ଥ ରୁଢିଆ ସେତୁ ଭୁଶୁଡି ପଡ଼ିଥିଲା।
ବ୍ୟାସନଗର ତହସିଲ ପକ୍ଷରୁ ଜଳସେଚନ ବିଭାଗର ବିନା ପରାମର୍ଶରେ ବୈତରଣୀ ସେତୁ ନିକଟରେ ଏକାଧିକ ବାଲିଖାଦାନ ପାଇଁ ଲିଜ୍ ଦିଆଯାଇଛି। ମେଶିନରେ ବାଲି ଉତ୍ତୋଳନ କରାଯାଉଛି। ଓଭରଲୋଡିଂ ଯୋଗୁ ବୈତରଣୀ ସେତୁର ସ୍ଥାୟିତ୍ୱ ପ୍ରତି ଆଶଙ୍କା ସୃଷ୍ଟି ହୋଇଛି। ଏନେଇ ଅଞ୍ଚଳବାସୀ ବିଭାଗୀୟ ଅଧିକାରୀଙ୍କ ନିକଟରେ ଏକାଧିକ ଥର ଅଭିଯୋଗ କରିଛନ୍ତି। ହେଲେ କେହି କର୍ଣ୍ଣପାତ କରୁନାହାନ୍ତି ବୋଲି ଅଭିଯୋଗ ହୋଇଛି। ଏ ସଂକ୍ରାନ୍ତରେ ପୂର୍ତ୍ତ ବିଭାଗ ନିର୍ବାହୀ ଯନ୍ତ୍ରୀଙ୍କ ସହ ଯୋଗାଯୋଗ କରାଯାଇଥିଲେ ମଧ୍ୟ ସମ୍ଭବ ହୋଇ ପାରିନାହିଁ।