ଭୁବନେଶ୍ୱର,୨୬।୧୦(ବ୍ୟୁରୋ): ରାଜଧାନୀ ଭୁବନେଶ୍ୱରର ଅନେକ ସ୍ଥାନର ଉନ୍ନତୀକରଣ ପାଇଁ ବଡ଼ ବଡ଼ ଗଛ କାଟି ପଦା କରିଦିଆଯାଉଛି। ହେଲେ ଯେଉଁ ସ୍ଥାନରେ ଗଛ ନ ଉଠିବା କଥା ସେଠାରେ ଉଠୁଥିଲେ ସୁଦ୍ଧା ଏହା ଉପରେ କାହାର ନଜର ପଡ଼ୁନାହିଁ। ଓଭରବ୍ରିଜ୍ର କାନ୍ଥରେ ବରଗଛ, କଦମ୍ବ ଓ ଅଶ୍ୱତ୍ଥ ଆଦି ଗଛ ଉଠିବାରେ ଲାଗିଲାଣି। ରାଜଧାନୀର ଜୟଦେବ ବିହାର, ରାଜମହଲ ଛକ, ବରମୁଣ୍ଡା ଆଦି ସ୍ଥାନରେ ଏପରି ଦୃଶ୍ୟ ଦେଖିବାକୁ ମିଳିଛି। ବରମୁଣ୍ଡା ବସ୍ଷ୍ଟାଣ୍ଡ ନିକଟ ଓଭରବ୍ରିଜ୍ରେ ଏହା ଆଖିଦୃଶିଆ ଭାବେ ବଢ଼ିବାରେ ଲାଗିଛି। ଓଭରବ୍ରିଜ୍ର ଉଭୟ ପାଶର୍ବରେ ଏହି ଗଛଗୁଡ଼ିକ ବଢ଼ିବାରେ ଲାଗିଛି। ବର, ଅଶତ୍ଥ ଭଳି ବୃକ୍ଷ ୧୫ଫୁଟରୁ ଅଧିକ ଉଚ୍ଚା ହେବା ସହ ଝଙ୍କାଳିଆ ହେବାରେ ଲାଗିଛି। ତେବେ ଏହି ଗଛଗୁଡ଼ିକ ଛୋଟଥିବା ପରିସ୍ଥିତିରୁ ସଫା କରା ନ ଗଲେ ଆଗାମୀ ଦିନରେ ଓଭର ବ୍ରିଜରେ ଫାଟ ସୃଷ୍ଟି କରିବାର ଯଥେଷ୍ଟ ଆଶଙ୍କା ରହିଛି। ଓଭରବ୍ରିଜରେ ଏପରି ଗଛ ଉଠିବା ଯଦିଓ ପ୍ରାକୃତିକ ପ୍ରକ୍ରିୟା ତେବେ ଓଭରବ୍ରିଜକୁ ଅଧିକ ଦିନ ସୁରକ୍ଷିତ ଓ କାର୍ଯ୍ୟକ୍ଷମ ରଖିବା ପାଇଁ ଏହି ଛୋଟ ଛୋଟ କାରକ ଉପରେ ଦୃଷ୍ଟି ଦେବା ଆବଶ୍ୟକ ବୋଲି ସାଧାରଣରେ ମତ ପ୍ରକାଶ ପାଉଛି। ଏନେଇ ଜାତୀୟ ରାଜପଥ ପ୍ରାଧିକରଣ(ଏନ୍ଏଚ୍ଏଆଇ) ଅଧିକାରୀ ରାମନାଥ ପଣ୍ଡାଙ୍କୁ ପଚରାଯିବାରେ ବରମୁଣ୍ଡା ସର୍ଭିସ୍ ରୋଡ୍ ମରାମତି ସମୟରେ ଉକ୍ତ ବୃକ୍ଷଗୁଡ଼ିକୁ ସଫା କରାଯିବା ସହ ଅନ୍ୟାନ୍ୟ ସ୍ଥାନର ତଦାରଖ କରାଯିବ ବୋଲି କହିଛନ୍ତି।
