ପୁରୀ ଅଫିସ,୨୯।୧୦: ବ୍ଲୁ ଫ୍ଲାଗ ବିଚ୍ ବାଥିଂ ଜୋନ୍ରେ ଗାଧୋଉଥିବାବେଳେ ବୁଡ଼ିଯାଇଥିବା ଜଣେ ଯୁକ୍ତ ଦୁଇ ଛାତ୍ରଙ୍କ ମୃତଦେହ ବୁଧବାର ହୋଟେଲ ପିଙ୍କ୍ ହାଉସ୍ ପଛ ସମୁଦ୍ରରୁ ଉଦ୍ଧାର କରାଯାଇଛି। ସେ ହେଲେ ଝାଡଖଣ୍ଡ ରାଞ୍ଚତ୍ର ବିନୟ ରାଏଙ୍କ ପୁଅ ତନୀଷ ବିନୟ(୧୬)। ସେ ପରିବାର ସହ ପୁରୀ ବୁଲିବାକୁ ଆସିଥିଲେ। ମଙ୍ଗଳବାର ବ୍ଲୁ ଫ୍ଲାଗ ବିଚ୍ରେ ଗାଧୋଉଥିବାବେଳେ ହଠାତ୍ ଭାସି ଯାଇଥିଲେ। ସେଠାରେ ମୁତୟନ ଲାଇଫ୍ଗାର୍ଡମାନେ ତାଙ୍କୁ ଉଦ୍ଧାର କରିବାକୁ ଚେଷ୍ଟା କରି ବିଫଳ ହୋଇଥିଲେ। ମଧ୍ୟାହ୍ନ ପ୍ରାୟ ୧୨ଟାରୁ ସନ୍ଧ୍ୟା ୬ଟା ପର୍ଯ୍ୟନ୍ତ ଅଗ୍ନିଶମ ବାହିନୀର ଗୋଟିଏ ଟିମ୍ ନୂଆନଈଠାରୁ ହୋଟେଲ ଷ୍ଟର୍ଲିଂ ପର୍ଯ୍ୟନ୍ତ ସମୁଦ୍ରରେ ଖୋଜାଖୋଜି କରିଥିଲେ ମଧ୍ୟ ତନୀଷଙ୍କର ସନ୍ଧାନ ପାଇ ନ ଥିଲେ। ବୁଧବାର ମଧ୍ୟାହ୍ନ ପ୍ରାୟ ୧୨ଟାରେ ହୋଟେଲ ପିଙ୍କ୍ ହାଉସ୍ ପଛ ପାର୍ଶ୍ୱ ସମୁଦ୍ରରେ ତନୀଷଙ୍କ ମୃତଦେହ ଭାସୁଥିବା ଦେଖି ଅଗ୍ନିଶମ କର୍ମଚାରୀ ଉଦ୍ଧାର କରିଥିଲେ।
ବ୍ଲୁ ଫ୍ଲାଗ ବିଚ୍ରେ ଗାଧୋଇବାବେଳେ ଏହି ଅଘଟଣ ଘଟିଥିବାରୁ ଶ୍ରୀଜଗନ୍ନାଥ ସେନା ପକ୍ଷରୁ ବୁଧବାର ଜିଲାପାଳ ଏବଂ ବ୍ଲୁ ଫ୍ଲାଗ ବିଚ୍ ପରିଚାଳନା ସଂସ୍ଥା ନଁାରେ ସମୁଦ୍ରକୂଳ ଥାନାରେ ଏତଲା ଦିଆଯାଇଛି। ସେନାର ଆବାହକ ପ୍ରିୟଦର୍ଶନ ପଟ୍ଟନାୟକ ଏହି ଏତଲା ଦେଇଛନ୍ତି। ସେ ଏତଲାରେ ଦର୍ଶାଇଛନ୍ତି, ପ୍ରାୟ ପ୍ରତିବର୍ଷ ଝଡ଼ ତୋଫାନ ଭଳି ପ୍ରାକୃତିକ ଦୁର୍ବିପାକକୁ ସାମ୍ନା କରିଥାଏ ପୁରୀ ବେଳାଭୂମି। ଅନେକ ସମୟରେ ଜୁଆର ରାସ୍ତା ପର୍ଯ୍ୟନ୍ତ ମାଡ଼ି ଆସିଥାଏ। ହେଲେ ତରବରିଆ ଭାବେ ଏହାକୁ ବ୍ଲୁ ଫ୍ଲାଗ ବିଚ୍ ଭାବେ ଘୋଷଣା କରାଯିବା ଏବଂ ଏଠାରେ ଗାଧୋଇବାବେଳେ ଜଣେ ଛାତ୍ରଙ୍କ ମୃତ୍ୟୁ ଘଟିବା ପରେ ଏଠାରେ ପର୍ଯ୍ୟଟକଙ୍କ ସୁରକ୍ଷାକୁ ନେଇ ପ୍ରଶ୍ନ ଉଠିଛି। ଏଥିପାଇଁ ଜିଲା ପ୍ରଶାସନକୁ ଦାୟୀ କରି ଜିଲାପାଳ ଏବଂ ବିଚ୍ ପରିଚାଳନା ସଂସ୍ଥା ନଁାରେ ଥାନାରେ ଏତଲା ଦିଆଯାଇଛି। ଗତ ୧୧ ତାରିଖରେ ପୁରୀର ସ୍ବର୍ଣ୍ଣାଭ ବେଳାଭୂମିକୁ ବ୍ଲୁ ଫ୍ଲାଗର ମାନ୍ୟତା ମିଳିଛି। ୩୩ଟି ମାନଦଣ୍ଡକୁ ପୂରଣ କରିବା ପରେ ଏହି ଅନ୍ତର୍ଜାତୀୟ ସଫଳତା ପାଇଥିଲା ପୁରୀ ବେଳାଭୂମୀ। ଯେଉଁଥିରେ ସୁରକ୍ଷିତ ସ୍ନାନ ଥିଲା ଅନ୍ୟତମ। ମାତ୍ର ବ୍ଲୁ ଫ୍ଲାଗ ମାନ୍ୟତା ମିଳିବାର ୧୬ ଦିନ ମଧ୍ୟ ଏଠାରେ ଘଟିଛି ଏହି ବଡଧରଣର ଅଘଟଣ। ଫଳରେ ଏଠାରେ ପର୍ଯ୍ୟଟକଙ୍କ ସୁରକ୍ଷାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି।